കൊളംബോ: ട്വന്റി20 ലോകകപ്പിൽ വമ്പൻ അട്ടിമറിയുമായി സിംബാബ്‌വെ ക്രിക്കറ്റ് ലോകത്തെ അമ്പരപ്പിച്ചു. ഗ്രൂപ്പ് ബി പോരാട്ടത്തിൽ മുൻ ചാമ്പ്യൻമാരായ ഓസ്ട്രേലിയൻ ദേശീയ ടീമിനെ 23 റൺസിന് തോൽപ്പിച്ചാണ് സിംബാബ്വവെ ദേശീയ ക്രിക്കറ്റ് ടീം ചരിത്ര വിജയം സ്വന്തമാക്കിയത്.ടോസ് നഷ്ടപ്പെട്ട് ആദ്യം ബാറ്റ് ചെയ്ത സിംബാബ്‌വെ 20 ഓവറിൽ രണ്ട് വിക്കറ്റ് നഷ്ടത്തിൽ 169 റൺസ് നേടി. മറുപടിയായി 170 റൺസ് ലക്ഷ്യം പിന്തുടർന്ന ഓസീസ് 19.3 ഓവറിൽ 146 റൺസിന് ഓൾഔട്ടായി.

ബൗളിങ്ങിൽ ബ്ലെസ്സിങ് മുസറബാനി നാല് ഓവറിൽ 17 റൺസ് വഴങ്ങി നാല് വിക്കറ്റ് വീഴ്ത്തി ഓസീസ് നിര തകർത്തപ്പോൾ ബ്രാഡ് ഇവാൻസ് 3.3 ഓവറിൽ 23 റൺസിന് മൂന്ന് വിക്കറ്റ് നേടി മികച്ച പിന്തുണ നൽകി. ഇരുവരുടെയും പ്രകടനമാണ് മത്സരത്തിന്റെ ഗതി നിർണയിച്ചത്.

മറുപടി ബാറ്റിം​ഗിനിറങ്ങിയ ഓസ്ട്രേലിയക്ക് തുടക്കത്തിൽ തന്നെ കനത്ത തിരിച്ചടി നേരിട്ടു. ജോഷ് ഇംഗ്ലിസ്, കാമറൂൺ ഗ്രീൻ, ടിം ഡേവിഡ്, ട്രാവിസ് ഹെഡ് എന്നിവരെ വേഗത്തിൽ പുറത്താക്കി സിംബാബ്‌വെ നാല് വിക്കറ്റ് നഷ്ടത്തിൽ 29 റൺസെന്ന നിലയിലേക്ക് അവരെ ചുരുക്കി. തുടർന്ന് ഗ്ലെൻ മാക്‌സ്‌വെൽ–മാറ്റ് റെൻഷോ കൂട്ടുകെട്ട് 77 റൺസ് ചേർത്ത് പ്രതിരോധം കെട്ടിപ്പടുക്കാൻ ശ്രമിച്ചു. എന്നാൽ മാക്‌സ്‌വെല്ലിന്റെ പുറത്താകൽ ഓസീസിന്റെ പ്രതീക്ഷകൾക്ക് തിരിച്ചടിയായി.

പരിക്കേറ്റിട്ടും ബാറ്റിങ്ങിനിറങ്ങിയ മാർക്കസ് സ്റ്റോയ്നിസ് ഉൾപ്പെടെയുള്ള മിഡിൽ ഓർഡർ താരങ്ങൾ പരാജയപ്പെട്ടതോടെ സമ്മർദ്ദം വർധിച്ചു. 44 പന്തിൽ 65 റൺസ് നേടിയ റെൻഷോ പുറത്തായതോടെ മത്സരം പൂർണമായും സിംബാബ്‌വെയുടെ കൈവശമായി. അവസാന ഘട്ടത്തിൽ മാത്യു കുനെമാനും റണ്ണൗട്ടായതോടെ ഓസീസ് പോരാട്ടം അവസാനിച്ചു.

മുമ്പ് ബാറ്റിങ്ങിൽ ബ്രിയാൻ ബെന്നെറ്റിന്റെ 64 റൺസും ടി. മറുമാനിയും റയാൻ ബേളും നേടിയ വേഗമേറിയ ഇന്നിംഗ്സുകളും സിംബാബ്‌വെയ്ക്ക് ഉറച്ച അടിത്തറ നൽകി. ക്യാപ്റ്റൻ സിക്കന്ദർ റാസ പുറത്താകാതെ 25 റൺസോടെ നിന്നു.

ജയത്തോടെ രണ്ട് മത്സരങ്ങളിലും വിജയിച്ച സിംബാബ്‌വെ നാല് പോയിന്റോടെ പോയിന്റ് പട്ടികയിൽ രണ്ടാം സ്ഥാനത്തെത്തി. രണ്ട് കളികളിൽ നിന്ന് രണ്ട് പോയിന്റ് മാത്രമുള്ള ഓസ്ട്രേലിയ മൂന്നാം സ്ഥാനത്തേക്ക് പിന്തള്ളപ്പെട്ടു. ശ്രീലങ്കക്കെതിരായ അടുത്ത മത്സരം ഓസീസിന് നിർണായകമാണ്.