മലപ്പുറം: പ്രണയബന്ധത്തിൽനിന്ന് ആൺസുഹൃത്തിനെ ഒഴിവാക്കാൻ സുഹൃത്തുക്കളെ ഉപയോഗിച്ച് ആക്രമണം ആസൂത്രണം ചെയ്ത 19കാരിയും സംഘവും പിടിയിൽ. കാമുകിയെ അന്വേഷിച്ച് തിരൂരിലെത്തിയ പട്ടാമ്പി സ്വദേശിയായ യുവാവിനാണ് ക്രൂരമർദനമേറ്റത്. സംഭവവുമായി ബന്ധപ്പെട്ട് യുവതിയുൾപ്പെടെ അഞ്ചുപേരെ തിരൂർ പൊലീസ് അറസ്റ്റ് ചെയ്തു.
പട്ടാമ്പി പനങ്ങാട് സ്വദേശിനിയായ സഫാനയാണ് സംഭവത്തിന് പിന്നിലെന്നാണ് പൊലീസ് പറയുന്നത്. യുവാവിനെ നേരിട്ട് ഒഴിവാക്കുന്നതിനുപകരം സുഹൃത്തുക്കളുടെ സഹായത്തോടെ ആക്രമിക്കാൻ പദ്ധതി തയ്യാറാക്കുകയായിരുന്നു. കാമുകിയെ കാണാനായി കഴിഞ്ഞ ദിവസം അർധരാത്രിയോടെ തിരൂരിലെത്തിയ യുവാവിനെ സഫാനയെ കാണിച്ചുതരാമെന്ന് പറഞ്ഞ് പ്രതികൾ കാറിൽ കയറ്റി.
തുടർന്ന് വാഹനത്തിനുള്ളിൽവെച്ച് യുവാവിനെ സംഘം ക്രൂരമായി മർദിച്ചു. മൊബൈൽ ഫോൺ ഉൾപ്പെടെയുള്ള സാധനങ്ങൾ കൈക്കലാക്കിയ ശേഷം പുഴയോരത്തോട് ചേർന്നുള്ള പാതയോരത്ത് ഉപേക്ഷിക്കുകയായിരുന്നു. സംഭവത്തിൽ അന്വേഷണം നടത്തിയ പൊലീസ് യുവതിയെയും കൂട്ടുപ്രതികളെയും പിടികൂടി.
തിരൂർ നോർത്ത് അന്നാറ സ്വദേശികളായ നാദിയ (20), റബീബ (25), പറവണ്ണ സ്വദേശികളായ ഇർഷാദ് (28), അസ്റുദീൻ എന്നിവരാണ് അറസ്റ്റിലായ മറ്റുള്ളവർ. ഇവരിൽ ഇർഷാദും അസ്റുദീനും നേരത്തെ ലഹരിമരുന്ന് കേസിൽ പ്രതികളായി ജയിലിൽ കഴിഞ്ഞിട്ടുള്ളവരാണ്.
അറസ്റ്റിലായ അഞ്ചുപേരെയും തിരൂർ കോടതി റിമാൻഡ് ചെയ്തു.
