ചിങ്ങമാസത്തെ വരവേൽക്കാൻ കേരളം ഒരുങ്ങുകയാണ്. ആഗസ്റ്റ് 17 തിങ്കളാഴ്ച രാവിലെ 7.58നാണ് ചിങ്ങരവി സംക്രമം. ഇതോടെ മലയാള മാസമായ ചിങ്ങത്തിനും മകം ഞാറ്റുവേലയ്ക്കും തുടക്കമാകും. ചിങ്ങം പത്തിനാണ് ഇത്തവണ തിരുവോണം. ചിങ്ങം 11, 12 തീയതികളിൽ പൗർണമിയും 25, 26 തീയതികളിൽ അമാവാസിയും വരും.

ചിങ്ങമാസത്തിലെ ഗ്രഹനിലയിൽ ശനിയുടെ വക്രസഞ്ചാരം തുടരുകയാണ്. രാഹുവും കേതുവും കുംഭം, ചിങ്ങം രാശികളിലായി സഞ്ചരിക്കുന്നു. വ്യാഴം കർക്കടകത്തിൽ പൂയം–ആയില്യം നക്ഷത്രങ്ങളിലൂടെയാണ് കടന്നുപോകുന്നത്. ബുധൻ കർക്കടകം, ചിങ്ങം, കന്നി രാശികളിൽ സഞ്ചരിക്കും. ചിങ്ങം 17 വരെ കന്നിയിൽ തുടരുന്ന ശുക്രൻ പിന്നീട് തുലാം രാശിയിലെത്തും. ചൊവ്വ മിഥുനത്തിൽ തന്നെ തുടരും.

ഈ ഗ്രഹനിലയുടെ അടിസ്ഥാനത്തിൽ അശ്വതി മുതൽ രേവതി വരെയുള്ള നക്ഷത്രക്കാർക്ക് ചിങ്ങമാസത്തിൽ ലഭിക്കാവുന്ന പ്രധാന ഫലങ്ങൾ ഇങ്ങനെ:

അശ്വതി

ആത്മവിശ്വാസം കൈവിടാതെ മുന്നേറാൻ കഴിയും. ജോലിയിൽ ഉത്തരവാദിത്വങ്ങൾ കൃത്യമായി പൂർത്തിയാക്കാൻ ശ്രമിക്കും. ഭാവിപദ്ധതികൾ ആസൂത്രണം ചെയ്യാനും ഉപരിപഠനത്തിന് സാധ്യത കണ്ടെത്താനും കഴിയും. കുടുംബജീവിതം പൊതുവേ തൃപ്തികരമായിരിക്കും. സൗഹൃദകാര്യങ്ങളിൽ ചെറിയ അസ്വസ്ഥതകൾക്കും കഫജന്യ ആരോഗ്യപ്രശ്നങ്ങൾക്കും സാധ്യതയുണ്ട്.

ഭരണി

മാസത്തിന്റെ ആദ്യപകുതിയിൽ തൊഴിൽരംഗത്ത് ചെറിയ മന്ദഗതി അനുഭവപ്പെട്ടേക്കാം. വ്യക്തിപരമായ ചില ബുദ്ധിമുട്ടുകളും ഉണ്ടാകാം. എന്നാൽ ധൈര്യവും സാഹസികതയും വർധിക്കും. ബിസിനസ്, പഠനം, സാമ്പത്തിക കാര്യങ്ങൾ എന്നിവയിൽ പുരോഗതി നേടാം. ദീർഘയാത്രയ്ക്കും സാധ്യതയുണ്ട്.

കാർത്തിക

ആത്മവിശ്വാസം വർധിക്കുകയും തടസ്സങ്ങളെ മറികടക്കാനുള്ള കഴിവ് ലഭിക്കുകയും ചെയ്യും. സാമ്പത്തിക കാര്യങ്ങളിൽ ചില തടസ്സങ്ങൾ ഉണ്ടായേക്കാം. ബിസിനസ് വിപുലീകരണത്തിന് ശ്രമിക്കും. പാരമ്പര്യ തൊഴിലുകളിൽനിന്ന് വരുമാനം ലഭിക്കും. ആഗ്രഹിച്ച സ്ഥലങ്ങളിലേക്ക് യാത്ര ചെയ്യാനും സാധ്യതയുണ്ട്. പ്രണയബന്ധങ്ങളിൽ ചെറിയ നിരാശകൾ ഉണ്ടായേക്കാം.

രോഹിണി

ബന്ധുക്കളുമായുള്ള കൂടിക്കാഴ്ചകളും ആഘോഷങ്ങളും സന്തോഷം നൽകും. യാത്രകൾ ഗുണകരമാകും. എന്നാൽ പഠനത്തിലും ജോലിയിലും ശ്രദ്ധ കുറയാൻ സാധ്യതയുള്ളതിനാൽ ജാഗ്രത വേണം. ബിസിനസിലെ ലാഭം നിക്ഷേപമാക്കാം. കൂട്ടുകെട്ടുകളിൽ കൂടുതൽ ശ്രദ്ധ ആവശ്യമാണ്.

മകയിരം

സാമ്പത്തികമായി നേട്ടങ്ങൾക്ക് സാധ്യതയുണ്ട്. അവകാശങ്ങൾ നേടിയെടുക്കാനും ഉന്നതാധികാരികളുടെ പിന്തുണ ലഭിക്കാനും കഴിയും. വിദേശയാത്രകൾ ഫലപ്രദമാകും. കുടുംബത്തിലെ തെറ്റിദ്ധാരണകൾ മാറും. എന്നാൽ സംസാരത്തിൽ മിതത്വം പാലിക്കണം. ആരോഗ്യകാര്യങ്ങളിലും ശ്രദ്ധ വേണം.

തിരുവാതിര

സാമ്പത്തിക വരുമാനം മെച്ചപ്പെടും. വിദ്യാഭ്യാസത്തിൽ മുന്നേറ്റമുണ്ടാകും. സാഹിത്യരംഗത്തുള്ളവർക്ക് മികച്ച അവസരങ്ങൾ ലഭിക്കാം. ജോലിയിൽ അർഹമായ അംഗീകാരം ലഭിക്കും. വാഹനം വാങ്ങാനോ പുതുക്കാനോ സാധ്യതയുണ്ട്. അതേസമയം ചില തടസ്സങ്ങളും മാനസിക സമ്മർദങ്ങളും നേരിടേണ്ടിവരാം.

പുണർതം

വ്യാഴത്തിന്റെ അനുകൂല സ്ഥിതി നേട്ടങ്ങൾക്ക് വഴിയൊരുക്കും. നവസംരംഭങ്ങൾക്കും സ്ഥാപനവിപുലീകരണത്തിനും അനുമതി ലഭിക്കാം. ബൗദ്ധികവും സാമ്പത്തികവുമായ വളർച്ച ഉണ്ടാകും. എന്നാൽ തിടുക്കത്തിലുള്ള തീരുമാനങ്ങൾ ഒഴിവാക്കണം. നിർമാണപ്രവർത്തനങ്ങൾ വൈകാനും ആരോഗ്യത്തിൽ ശ്രദ്ധ ആവശ്യമായി വരാനും സാധ്യതയുണ്ട്.

പൂയം

പുതിയ കരാറുകൾ, താൽക്കാലിക ജോലി, അഭിമുഖങ്ങളിലെ വിജയം എന്നിവയ്ക്ക് സാധ്യതയുണ്ട്. സ്റ്റാർട്ടപ്പ് മേഖലയിൽ പുതിയ പദ്ധതികൾ ആലോചിക്കാം. ആശയവിനിമയശേഷി മെച്ചപ്പെടും. എന്നാൽ അനാവശ്യ സമ്മർദങ്ങൾ ഒഴിവാക്കണം. ഭൂമി ഇടപാടുകളിൽ മന്ദഗതി ഉണ്ടായേക്കാം.

ആയില്യം

തീരുമാനങ്ങളെടുക്കുന്നതിൽ മറ്റുള്ളവരുടെ ഇടപെടലുകൾ ബുദ്ധിമുട്ടുണ്ടാക്കാം. ഭൂമിയിൽനിന്നുള്ള വരുമാനം കുറയാം. അതേസമയം ചെറുകിട സംരംഭങ്ങളും കരാർ ജോലികളും ഗുണം ചെയ്യും. മാസത്തിന്റെ രണ്ടാംപകുതിയിൽ വാഹനം വാങ്ങാൻ സാധ്യതയുണ്ട്. ആഘോഷങ്ങൾക്കും ആഡംബരങ്ങൾക്കുമുള്ള ചെലവ് നിയന്ത്രിക്കണം. ജീവിതശൈലീ രോഗങ്ങളുള്ളവർ പ്രത്യേകം ശ്രദ്ധിക്കണം.

മകം

ആത്മീയവും ഭൗതികവുമായ പുരോഗതി പ്രതീക്ഷിക്കാം. പഠനത്തിലും ഗവേഷണത്തിലും താൽപര്യം വർധിക്കും. സംരംഭകർക്ക് ലാഭം ലഭിക്കും. എന്നാൽ തൊഴിൽരംഗത്തും വ്യക്തിജീവിതത്തിലും ചെറിയ സമ്മർദങ്ങൾ ഉണ്ടാകാം. പ്രണയകാര്യങ്ങളിൽ സന്തോഷം ലഭിക്കാനുള്ള സാധ്യതയുണ്ട്.

പൂരം

മാസത്തിന്റെ തുടക്കത്തിൽ പ്രതീക്ഷിക്കാത്ത ചില തടസ്സങ്ങൾ നേരിടാം. സുഹൃദ്ബന്ധങ്ങളിൽ വിള്ളൽ വരാതിരിക്കാൻ ശ്രദ്ധ വേണം. സാമ്പത്തിക വരുമാനം കുറയാമെങ്കിലും പൂർണമായി തടസ്സപ്പെടില്ല. പ്രണയബന്ധങ്ങൾ സന്തോഷം നൽകും. കലാകാരന്മാർക്ക് മാസത്തിന്റെ രണ്ടാംപകുതിയിൽ കൂടുതൽ അവസരങ്ങൾ ലഭിക്കും.

ഉത്രം

തിരക്കേറിയ മാസമായിരിക്കും. നിരവധി ദൗത്യങ്ങൾ പൂർത്തിയാക്കേണ്ടിവരും. യാത്രകളും പുതിയ തൊഴിൽ അവസരങ്ങളും ലഭിക്കാം. വ്യാപാര ലൈസൻസ്, കരാറുകൾ എന്നിവയിൽ നേട്ടമുണ്ടാകും. വിദേശത്തേക്ക് പോകാൻ ശ്രമിക്കുന്നവർക്ക് അവസരം ലഭിക്കും. സാമ്പത്തിക ജാമ്യത്തിൽ ജാഗ്രത വേണം. അമിത ഉത്കണ്ഠ ഒഴിവാക്കണം.

അത്തം

കഠിനാധ്വാനത്തിന് ഫലം ലഭിക്കും. വ്യക്തമായ ലക്ഷ്യബോധത്തോടെ മുന്നേറുന്നത് നേട്ടമാകും. ബിസിനസിൽ പുതിയ വിപണന തന്ത്രങ്ങൾ വിജയിക്കാം. പഠനത്തിലും അന്വേഷണാത്മക പ്രവർത്തനങ്ങളിലും താൽപര്യം വർധിക്കും. ചെലവുകളിൽ നിയന്ത്രണം വേണം.

ചിത്തിര

തൊഴിൽരംഗത്തെ മന്ദഗതി മാറിത്തുടങ്ങും. ഉപഭോക്താക്കളുടെ ആവശ്യങ്ങൾ മനസ്സിലാക്കി പ്രവർത്തിക്കുന്നത് ബിസിനസിൽ നേട്ടമാകും. സംയുക്ത സംരംഭങ്ങൾ പുനരാരംഭിക്കാൻ സാധ്യതയുണ്ട്. ലോൺ അപേക്ഷയിൽ അനുകൂല പരിഗണന ലഭിക്കാം. വിവാഹകാര്യങ്ങളിൽ ശുഭതീരുമാനം ഉണ്ടാകാനും സാധ്യതയുണ്ട്.

ചോതി

ജോലിയിൽ നേട്ടവും പദവിയും പ്രമോഷനും ലഭിക്കാനുള്ള സാധ്യതയുണ്ട്. സാമ്പത്തിക നിക്ഷേപങ്ങൾ നടത്താം. വിദ്യാർത്ഥികൾക്ക് പഠനത്തിൽ മുന്നേറാം. ഓൺലൈൻ മേഖലയിൽനിന്നും നേട്ടം ലഭിക്കും. കുടുംബകാര്യങ്ങളിൽ ചെറിയ പ്രശ്നങ്ങൾ ഉണ്ടാകാൻ സാധ്യതയുള്ളതിനാൽ ശ്രദ്ധ വേണം.

വിശാഖം

തൊഴിൽരംഗത്ത് മികച്ച മുന്നേറ്റം പ്രതീക്ഷിക്കാം. നിയമനോത്തരവും പുതിയ പദവികളും ലഭിക്കാം. സാമൂഹിക അംഗീകാരം വർധിക്കും. വ്യാപാരികൾക്ക് വരുമാനം ഉയരും. സ്ഥാപനവിപുലീകരണത്തിന് തുടക്കമിടാം. വിദേശയാത്രകൾക്കും പുതിയ ഇലക്ട്രോണിക് ഉപകരണങ്ങൾ വാങ്ങുന്നതിനും സാധ്യതയുണ്ട്. ഭൂമി സംബന്ധമായ തർക്കങ്ങളിൽ ജാഗ്രത വേണം.

അനിഴം

മിക്ക മേഖലകളിലും അനുകൂല ഫലങ്ങൾ പ്രതീക്ഷിക്കാം. ആസൂത്രണശേഷിയും സാങ്കേതിക അറിവും തൊഴിൽരംഗത്ത് നേട്ടമാകും. മേലധികാരികളുടെ പിന്തുണ ലഭിക്കും. വരുമാനം മെച്ചപ്പെടും. കുടുംബജീവിതത്തിൽ പരസ്പര വിശ്വാസം സന്തോഷം നൽകും. ആരോഗ്യകാര്യങ്ങളിൽ ജാഗ്രത പുലർത്തണം.

തൃക്കേട്ട

തൊഴിൽരംഗത്ത് വളർച്ചയ്ക്കുള്ള സാധ്യതയുണ്ട്. ജോലി അന്വേഷിക്കുന്നവർക്ക് പുതിയ അവസരങ്ങൾ ലഭിക്കും. വ്യാപാരത്തിൽ പുരോഗതിയും പുതിയ പദ്ധതികൾക്ക് തുടക്കവും ഉണ്ടാകും. പിതാവിന്റെയും ഗുരുക്കന്മാരുടെയും പിന്തുണ ലഭിക്കും. ഇടയ്ക്കിടെ മാനസിക സമ്മർദങ്ങൾ ഉണ്ടായേക്കാമെങ്കിലും അവ മറികടക്കാൻ സാധിക്കും.

മൂലം

ഭാഗ്യാനുഭവങ്ങളും കുടുംബപിന്തുണയും ലഭിക്കും. ഔദ്യോഗിക രംഗത്ത് പ്രതീക്ഷിച്ചത്ര വളർച്ചയില്ലെങ്കിലും മുന്നോട്ടുപോകാനുള്ള ആത്മവിശ്വാസം നഷ്ടപ്പെടില്ല. ബിസിനസിലൂടെ വരുമാനം നേടാം. മാസത്തിന്റെ രണ്ടാംപകുതിയിൽ ജോലിയിൽ കൂടുതൽ സ്വാതന്ത്ര്യം ലഭിക്കും. കുടുംബജീവിതത്തിൽ അഭിപ്രായവ്യത്യാസങ്ങൾ ഒഴിവാക്കണം.

പൂരാടം

ഭാഗ്യം അനുകൂലമാകും. കഴിവുകൾ അംഗീകരിക്കപ്പെടും. ജോലി മാറ്റത്തിനും പുതിയ സംരംഭങ്ങൾക്കുമുള്ള അവസരങ്ങൾ ലഭിക്കും. സർക്കാർ അനുമതികൾ ലഭിക്കാം. സാമ്പത്തിക സ്ഥിതി പൊതുവേ മെച്ചമായിരിക്കും. വീട്, വാഹനം, സ്വത്ത് എന്നിവ വാങ്ങാനോ പുതുക്കാനോ സാധ്യതയുണ്ട്. തിടുക്കത്തിലുള്ള തീരുമാനങ്ങൾ ഒഴിവാക്കുക.

ഉത്രാടം

തൊഴിൽരംഗത്ത് കൂടുതൽ ഉത്തരവാദിത്വങ്ങൾ ലഭിക്കും. ഔദ്യോഗിക യാത്രകൾ വർധിക്കും. കുടിശ്ശികയായി ലഭിക്കാനുള്ള പണം കൈവശമെത്താം. വ്യാപാര വിപുലീകരണത്തിനും ഭൂമിയിൽനിന്നുള്ള വരുമാനത്തിനും സാധ്യതയുണ്ട്. വിദ്യാർത്ഥികൾക്ക് പരീക്ഷകളിൽ മികച്ച നേട്ടം നേടാം. മാസത്തിന്റെ രണ്ടാംപകുതിയിൽ ഭൗതികമായ പുരോഗതി പ്രതീക്ഷിക്കാം.

തിരുവോണം

വ്യാഴത്തിന്റെ അനുകൂല സ്ഥിതി ജീവിതത്തിൽ മനസ്സമാധാനവും പുരോഗതിയും നൽകും. ദാമ്പത്യജീവിതം സന്തോഷകരമാകും. കഴിവുകൾ പ്രകടിപ്പിക്കാൻ അവസരങ്ങൾ ലഭിക്കും. എന്നാൽ ഉദ്യോഗസ്ഥർക്ക് സമ്മർദം വർധിക്കാം. മാർക്കറ്റിംഗ് രംഗത്തുള്ളവർക്ക് ലക്ഷ്യങ്ങൾ കൈവരിക്കാൻ കൂടുതൽ പരിശ്രമം ആവശ്യമാണ്. കലാരംഗത്ത് നേട്ടങ്ങൾ പ്രതീക്ഷിക്കാം.

അവിട്ടം

ജന്മനക്ഷത്രത്തിലെ രാഹുസഞ്ചാരം കാരണം ആലസ്യവും ആശങ്കയും ഉണ്ടാകാം. ഔദ്യോഗിക കാര്യങ്ങളിൽ കൂടുതൽ കൃത്യത വേണം. കരാർ, താൽക്കാലിക ജോലികൾ ലഭിക്കാൻ സാധ്യതയുണ്ട്. വ്യവസായ-വ്യാപാര മേഖലകളിൽ പുതിയ ആശയങ്ങൾ രൂപപ്പെടും. വലിയ നിക്ഷേപങ്ങളിൽ ജാഗ്രത വേണം. സോഷ്യൽ മീഡിയയിലെ തിടുക്കത്തിലുള്ള പ്രതികരണങ്ങൾ ഒഴിവാക്കുന്നതാണ് നല്ലത്.

ചതയം

അനുകൂലവും പ്രതികൂലവുമായ സാഹചര്യങ്ങൾ മാറിമാറി വരാം. പാരമ്പര്യ തൊഴിലുകളിൽ നേട്ടമുണ്ടാകും. ഓൺലൈൻ ബിസിനസ് വളരും. വിദേശപഠനത്തിനും തൊഴിൽ അവസരങ്ങൾക്കും സാധ്യതയുണ്ട്. പ്രധാന തീരുമാനങ്ങൾ ഒറ്റയ്ക്ക് എടുക്കുന്നത് ഒഴിവാക്കണം. മാസത്തിന്റെ രണ്ടാംപകുതിയിൽ കൂടുതൽ അനുകൂല അനുഭവങ്ങൾ ഉണ്ടാകും.

പൂരൂരുട്ടാതി

ആത്മവിശ്വാസവും അംഗീകാരവും വർധിക്കും. കൂട്ടുകച്ചവടത്തിൽ പുരോഗതിയുണ്ടാകും. പുതിയ വാഹനം വാങ്ങാനും പുതിയ കരാറുകൾ ലഭിക്കാനും സാധ്യതയുണ്ട്. യാത്രകൾ വർധിക്കും. ചെലവുകൾ കൂടിയാലും സാമ്പത്തികമായി കാര്യങ്ങൾ മുന്നോട്ടുകൊണ്ടുപോകാൻ കഴിയും. ദാമ്പത്യത്തിൽ വിട്ടുവീഴ്ചകൾ ആവശ്യമാണ്.

ഉത്രട്ടാതി

പുതിയ അവസരങ്ങൾ തേടിയെത്തും. ജോലി അന്വേഷിക്കുന്നവർക്ക് പുതിയ മേഖലകളിൽ പ്രവേശിക്കാം. കരാർ ജോലികൾ നീട്ടിക്കിട്ടാം. വ്യാപാരികൾക്ക് വരുമാനം തൃപ്തികരമായിരിക്കും. പഠനത്തിൽ വ്യക്തമായ ദിശാബോധം ലഭിക്കും. വിവാഹകാര്യങ്ങളിൽ തീരുമാനമുണ്ടാകാം. പ്രണയബന്ധങ്ങളിൽ ചെറിയ തടസ്സങ്ങൾ ഉണ്ടാകാം. വാഹനയാത്രയിൽ ജാഗ്രത വേണം.

രേവതി

വക്രശനിയുടെ സ്വാധീനത്തിൽ അലസതയും ആശങ്കയും ഉണ്ടാകാം. എന്നാൽ തൊഴിൽരംഗത്ത് വളർച്ചയ്ക്കുള്ള സാധ്യതകൾ ശക്തമാണ്. ജോലി തേടുന്നവർക്ക് അവസരങ്ങൾ ലഭിക്കും. വലിയ കരാറുകൾ ഏറ്റെടുക്കാനും വരുമാനം വർധിപ്പിക്കാനും കഴിയും. പുതിയ കാര്യങ്ങൾ പഠിക്കാനുള്ള താൽപര്യം ഉയരും. അനാവശ്യ ചെലവുകൾ നിയന്ത്രിക്കണം. കുടുംബാന്തരീക്ഷത്തിൽ ചെറിയ സമ്മർദങ്ങൾ ഉണ്ടായേക്കാം.