ന്യൂഡൽഹി: ഇന്ത്യയുടെ ചീഫ് ജസ്റ്റിസ് സൂര്യകാന്തിനെതിരെ ഔദ്യോഗിക എക്സ് അക്കൗണ്ടിൽ പ്രസിദ്ധീകരിച്ച അനാദരവുള്ള പോസ്റ്റിൽ കേരള പ്രദേശ് കോൺഗ്രസ് കമ്മിറ്റി (കെപിസിസി) നിരുപാധികം മാപ്പുപറഞ്ഞു. പോസ്റ്റിന് ഉത്തരവാദിയായ വിജയ് തോട്ടത്തിലിനെ ചുമതലയിൽനിന്ന് നീക്കിയതായും കെപിസിസി അറിയിച്ചു.
സുപ്രീംകോടതി ബാർ അസോസിയേഷൻ ജോയിന്റ് സെക്രട്ടറി അഡ്വ. മീനേഷ് ദുബെ അയച്ച നിയമനോട്ടീസിന് നൽകിയ മറുപടിയിലാണ് കെപിസിസി പ്രസിഡന്റ് സണ്ണി ജോസഫ് ഇക്കാര്യം വ്യക്തമാക്കിയത്. നേതൃത്വത്തിന്റെ മുൻകൂർ അറിവോ അനുമതിയോ കൂടിയാലോചനയോ ഇല്ലാതെയാണ് പോസ്റ്റ് പ്രസിദ്ധീകരിച്ചതെന്നും വിജയ് തോട്ടത്തിലിനോട് പരസ്യമായി മാപ്പുപറയാൻ ആവശ്യപ്പെട്ടിട്ടുണ്ടെന്നും മറുപടിയിൽ പറയുന്നു.
ഒക്ടോബർ 12-ന് പ്രസിദ്ധീകരിച്ച പോസ്റ്റിൽ ചീഫ് ജസ്റ്റിസ് രാജിവയ്ക്കണമെന്നും പകരം ആളെ കണ്ടെത്തുമെന്നുമുള്ള പരാമർശങ്ങളുണ്ടായിരുന്നു. വിവാദമായതിനെത്തുടർന്ന് പോസ്റ്റ് പിന്നീട് നീക്കം ചെയ്തു.
ഇത്തരത്തിലുള്ള പ്രസ്താവനകൾ നടത്താൻ താനോ പാർട്ടി നേതൃത്വമോ അനുമതി നൽകിയിട്ടില്ലെന്ന് സണ്ണി ജോസഫ് വ്യക്തമാക്കി. പ്രസ്തുത പരാമർശങ്ങളെ കെപിസിസി വ്യക്തമായി തള്ളിക്കളയുകയും പിൻവലിക്കുകയും ചെയ്തു. അവ കെപിസിസിയുടെയോ ഇന്ത്യൻ നാഷണൽ കോൺഗ്രസിന്റെയോ നയത്തെയോ ഔദ്യോഗിക നിലപാടിനെയോ പ്രതിനിധീകരിക്കുന്നില്ലെന്നും മറുപടിയിൽ വിശദീകരിച്ചു.
ഒരു ഔദ്യോഗിക പാർട്ടി വേദിയിൽ ഉപയോഗിക്കാൻ പാടില്ലാത്ത അനുചിതമായ ഭാഷയാണ് പോസ്റ്റിലുണ്ടായിരുന്നതെന്ന് കമ്മിറ്റി സമ്മതിച്ചു. ഭരണഘടനയോടും നീതിന്യായവ്യവസ്ഥയുടെ സ്വാതന്ത്ര്യത്തോടും ഇന്ത്യയുടെ ചീഫ് ജസ്റ്റിസ് എന്ന ഭരണഘടനാപദവിയോടുമുള്ള ആദരവ് കെപിസിസി ആവർത്തിച്ചു വ്യക്തമാക്കി. രാഷ്ട്രീയ വിയോജിപ്പ് ഇത്തരം പ്രയോഗങ്ങളെ ന്യായീകരിക്കുന്നില്ലെന്നും കമ്മിറ്റി ചൂണ്ടിക്കാട്ടി.
പോസ്റ്റ് തയ്യാറാക്കുകയും പരിശോധിക്കുകയും പ്രസിദ്ധീകരിക്കുകയും ചെയ്ത സാഹചര്യങ്ങൾ പരിശോധിക്കുമെന്നും കെപിസിസി അറിയിച്ചു. ഓരോ ഘട്ടത്തിലും പങ്കെടുത്ത വ്യക്തികൾ, അക്കൗണ്ട് ഉപയോഗിക്കുന്നതിനുള്ള അനുമതികൾ, ഉപയോഗിച്ച ഉപകരണങ്ങൾ, ബന്ധപ്പെട്ട ആഭ്യന്തര നിർദേശങ്ങൾ എന്നിവ പരിശോധനയുടെ പരിധിയിൽ വരും.
നിയമാനുസൃതമായ ഏതൊരു അന്വേഷണത്തിനും പ്രസക്തമായ ഇലക്ട്രോണിക് രേഖകൾ, അക്കൗണ്ട് പ്രവേശന വിവരങ്ങൾ, അനുമതിസംബന്ധമായ രേഖകൾ, ആഭ്യന്തര ആശയവിനിമയങ്ങൾ എന്നിവ സംരക്ഷിക്കുമെന്നും കമ്മിറ്റി ഉറപ്പുനൽകി. പോസ്റ്റ് പൊതുജനങ്ങൾക്ക് കാണാനാകാത്തവിധം നീക്കം ചെയ്തതിന്റെ പേരിൽ ബന്ധപ്പെട്ട തെളിവുകൾ നശിപ്പിക്കപ്പെടരുതെന്നും മറുപടിയിൽ വ്യക്തമാക്കി.
പോസ്റ്റ് പ്രസിദ്ധീകരിക്കാൻ സണ്ണി ജോസഫ് വ്യക്തിപരമായി നിർദേശിക്കുകയോ അനുമതി നൽകുകയോ അതിനെ അംഗീകരിക്കുകയോ ചെയ്തിട്ടില്ലെന്ന് വ്യക്തമാക്കിയതോടൊപ്പം, ഔദ്യോഗിക ആശയവിനിമയത്തിന്റെ നിയന്ത്രണ സംവിധാനത്തിൽ വീഴ്ചയുണ്ടായോയെന്ന് പരിശോധിക്കേണ്ടതുണ്ടെന്നും കമ്മിറ്റി സമ്മതിച്ചു. ഡിജിറ്റൽ ആശയവിനിമയത്തിൽ പുറത്തുനിന്നുള്ള പ്രൊഫഷണൽ ഏജൻസി പ്രവർത്തിക്കുന്നുണ്ടെങ്കിലും ഫലപ്രദമായ മേൽനോട്ടത്തിന്റെ ആവശ്യകത ഇല്ലാതാകുന്നില്ലെന്നും ഇത്തരം സംഭവങ്ങൾ ആവർത്തിക്കാതിരിക്കാൻ ഉചിതമായ നടപടികൾ സ്വീകരിക്കുമെന്നും കെപിസിസി അറിയിച്ചു.
പോസ്റ്റ് തയ്യാറാക്കിയതും പ്രസിദ്ധീകരിച്ചതും അതിന് അനുമതി നൽകിയതും ആരാണെന്ന് വെളിപ്പെടുത്തണമെന്നായിരുന്നു അഡ്വ. മീനേഷ് ദുബെയുടെ നിയമനോട്ടീസിലെ ആവശ്യം. ഉത്തരവാദിക്കെതിരെ സ്വീകരിച്ച അച്ചടക്കനടപടികളുടെ വിശദാംശങ്ങളും ചീഫ് ജസ്റ്റിസിനോട് വ്യക്തമായ പരസ്യ മാപ്പുപറച്ചിൽ നടത്താതിരുന്നതിന്റെ വിശദീകരണവും നോട്ടീസിൽ ആവശ്യപ്പെട്ടിരുന്നു.