ഏറെ ജനപ്രിയമായ ചൂരമീനിനെക്കുറിച്ച് ഞെട്ടിക്കുന്ന കണ്ടെത്തൽ. തെക്കൻ ബ്രസീലിലെ ഫെഡറൽ യൂണിവേഴ്സിറ്റി ഓഫ് സാന്താ കാറ്ററിനയിലെ ഗവേഷകരാണ് ചൂരമീനിൽ പരാന്നഭോജികളായ വിരകളുടെ സാന്നിധ്യം സംബന്ധിച്ച് പഠനം നടത്തിയത്. പരിശോധിച്ച 53 സ്കിപ്പ്ജാക്ക് ട്യൂണകളിൽ 51 എണ്ണത്തിലും, അതായത് ഏകദേശം 96 ശതമാനം മീനുകളിലും, വിരകളുടെ സാന്നിധ്യം കണ്ടെത്തുകയായിരുന്നു. മൈക്രോസ്കോപ്പ് ഉപയോഗിച്ച് നടത്തിയ വിശദമായ പരിശോധനയിൽ മീനുകളിൽനിന്ന് 1,600-ലേറെ ചെറുവിരകളെ വേർതിരിച്ചെടുത്തു.

മീനുകളുടെ കുടലിലാണ് ഏറ്റവും കൂടുതൽ വിരകളെ കണ്ടെത്തിയത്. എന്നാൽ അതിൽ മാത്രം ഒതുങ്ങിയില്ല. മനുഷ്യർ സാധാരണയായി ഭക്ഷിക്കുന്ന മാംസപേശികളിലും വയറിലുമെല്ലാം പരാന്നഭോജികളുടെ സാന്നിധ്യമുണ്ടായിരുന്നു.

ട്രിപനോറിൻക (Trypanorhyncha), അനിസാക്കിസ് (Anisakis) എന്നീ വിഭാഗങ്ങളിൽപ്പെട്ട വിരകളാണ് പ്രധാനമായും കണ്ടെത്തിയത്. വൃക്കയും ഹൃദയവും ഒഴികെയുള്ള വിവിധ അവയവങ്ങളിൽ ഇവയുടെ സാന്നിധ്യം കണ്ടെത്തിയതായാണ് റിപ്പോർട്ട്.

ദിവസവും കഴിക്കുന്ന ചൂരയിൽ എത്രത്തോളം?

ലോകത്ത് ഏറ്റവുമധികം പിടിക്കപ്പെടുന്ന കടൽമത്സ്യങ്ങളിൽ ഒന്നാണ് സ്കിപ്പ്ജാക്ക് ട്യൂണ. 2022-ൽ മാത്രം ഏകദേശം 31 ലക്ഷം ടൺ സ്കിപ്പ്ജാക്ക് ട്യൂണ ലോകവിപണിയിലെത്തിയിരുന്നു.

ഇത്ര വലിയ തോതിൽ മത്സ്യം ഉപഭോഗം ചെയ്യപ്പെടുമ്പോൾ, ചൂരമീനിലെ പരാന്നഭോജികളുടെ സാന്നിധ്യം ഭക്ഷ്യസുരക്ഷ സംബന്ധിച്ച ചർച്ചകൾക്ക് വഴിയൊരുക്കുകയാണ്.

പാകം ചെയ്താൽ അപകടമുണ്ടോ?

വിരകളുടെ സാന്നിധ്യം അറിഞ്ഞാൽ ചൂരമീൻ കഴിക്കുന്നതിനെക്കുറിച്ച് ആശങ്ക തോന്നാം. എന്നാൽ നന്നായി പാകം ചെയ്ത മത്സ്യം സാധാരണയായി സുരക്ഷിതമാണ്. ശരിയായ ചൂടിൽ പാചകം ചെയ്യുമ്പോൾ ഇത്തരം പരാന്നഭോജികൾ നശിക്കും.

കാനിൽ അടച്ച് സംസ്കരിക്കുന്ന മത്സ്യവിഭവങ്ങളിലും ഇവയുടെ ഭീഷണി കുറവാണ്.

എന്നാൽ പച്ചമീനാണ് പ്രധാന അപകടസാധ്യത ഉയർത്തുന്നത്. സഷിമി പോലുള്ള പൂർണമായി പാകം ചെയ്യാത്ത വിഭവങ്ങളിലൂടെ ജീവനുള്ള അനിസാക്കിസ് വിരകൾ ശരീരത്തിലെത്തിയാൽ വയറുവേദന, ഛർദ്ദി, അതിസാരം തുടങ്ങിയ പ്രശ്നങ്ങൾ ഉണ്ടാകാം. ഗുരുതരമായ സാഹചര്യങ്ങളിൽ ദഹനനാളത്തിന് പരിക്കേൽക്കാനും സാധ്യതയുണ്ട്.

മീൻ പിടിച്ച ഉടൻ ചെയ്യേണ്ടത് എന്ത്?

മത്സ്യം പിടിച്ചശേഷം അതിന്റെ കുടലും ആന്തരാവയവങ്ങളും എത്രയും വേഗം നീക്കം ചെയ്യുന്നത് പ്രധാനമാണെന്ന് ഗവേഷകർ മുന്നറിയിപ്പ് നൽകുന്നു.

കാരണം, മത്സ്യത്തിന്റെ ആന്തരാവയവങ്ങളിൽ കഴിയുന്ന പരാന്നഭോജികൾ പിന്നീട് മാംസപേശികളിലേക്ക് കുടിയേറാനുള്ള സാധ്യതയുണ്ട്. അതിനാൽ മത്സ്യത്തിന്റെ ശരിയായ സംഭരണവും വേഗത്തിലുള്ള സംസ്കരണവും ഭക്ഷ്യസുരക്ഷയിൽ നിർണായകമാണ്.

മീനുകളിൽ ധാരാളം പരാന്നഭോജികളെ കാണുന്നത് കടൽ മലിനീകരണത്തിന്റെയോ പരിസ്ഥിതി നാശത്തിന്റെയോ സൂചനയായിരിക്കുമെന്നാണ് പൊതുവെയുള്ള ധാരണ. എന്നാൽ പ്രശസ്ത പരാന്നഭോജി ഗവേഷകയും വാഷിങ്ടൻ സർവകലാശാലയിലെ പ്രഫസറുമായ ചെൽസി വുഡ് പറയുന്നത് മറ്റൊന്നാണ്.

മീനുകളിൽ ഇത്തരം വിരകൾ കാണപ്പെടുന്നത് ആരോഗ്യകരമായ സമുദ്ര ആവാസവ്യവസ്ഥയുടെ സൂചനയായിരിക്കാമെന്നാണ് അവരുടെ വിലയിരുത്തൽ.

തിമിംഗലങ്ങൾ കൂടിയപ്പോൾ വിരകളും കൂടി

അനിസാക്കിസ് വിരകളുടെ ജീവിതചക്രം കടലിലെ ഭക്ഷ്യശൃംഖലയുമായി അടുത്ത ബന്ധമുള്ളതാണ്. പ്ലവകങ്ങളിൽ നിന്ന് ചെറിയ മത്സ്യങ്ങളിലേക്കും അവിടെ നിന്ന് ചൂര പോലുള്ള വലിയ മത്സ്യങ്ങളിലേക്കും ഇവ സഞ്ചരിക്കുന്നു. ഒടുവിൽ തിമിംഗലങ്ങൾ, ഡോൾഫിനുകൾ തുടങ്ങിയ വലിയ സമുദ്രജീവികളിലാണ് ജീവിതചക്രം പൂർത്തിയാകുന്നത്.

1970-കൾക്ക് ശേഷം കടലിലെ ഇത്തരം വിരകളുടെ എണ്ണത്തിൽ വലിയ വർധനയുണ്ടായതായി മുൻ പഠനങ്ങൾ സൂചിപ്പിക്കുന്നു. സമുദ്ര സസ്തനികളുടെ എണ്ണത്തിലുണ്ടായ വർധന ഇതിന് പ്രധാന കാരണങ്ങളിലൊന്നാകാമെന്നാണ് ഗവേഷകരുടെ നിഗമനം.

1972-ൽ അമേരിക്കയിൽ നടപ്പാക്കിയ സമുദ്ര സസ്തനി സംരക്ഷണ നിയമവും പിന്നീട് തിമിംഗലവേട്ടയ്‌ക്കെതിരായ അന്താരാഷ്ട്ര നിയന്ത്രണങ്ങളും തിമിംഗലങ്ങളുടെയും മറ്റ് വലിയ സമുദ്രജീവികളുടെയും എണ്ണം വർധിക്കാൻ സഹായിച്ചു. ഇതോടെ അവയെ ആശ്രയിച്ച് ജീവിക്കുന്ന പരാന്നഭോജികൾക്കും ജീവിതചക്രം പൂർത്തിയാക്കാൻ കൂടുതൽ അവസരം ലഭിച്ചു.

ചൂരമീൻ കഴിക്കാമോ?

കഴിക്കുന്ന രീതിയാണ് പ്രധാനപ്പെട്ടത്. നന്നായി പാകം ചെയ്ത മത്സ്യം കഴിക്കുന്നതിലൂടെ പരാന്നഭോജികളിൽനിന്നുള്ള അപകടസാധ്യത കുറയ്ക്കാം. എന്നാൽ പച്ചമീൻ ഉപയോഗിക്കുന്ന വിഭവങ്ങളിൽ കൂടുതൽ ജാഗ്രത ആവശ്യമാണ്.

ചൂരമീനിൽ കണ്ടെത്തിയ ഈ വിരകൾ മനുഷ്യർക്ക് മാത്രമല്ല, സമുദ്രത്തിലെ ഭക്ഷ്യശൃംഖലയ്ക്കും ഒരു വലിയ കഥയാണ് പറയുന്നത്. പുറത്തുനിന്ന് നോക്കുമ്പോൾ ‘വിരകളുള്ള മീൻ’ എന്നത് ഭയപ്പെടുത്തുന്ന കാഴ്ചയായേക്കാം. എന്നാൽ കടലിനുള്ളിൽ നോക്കിയാൽ, പ്ലവകങ്ങളിൽ തുടങ്ങി തിമിംഗലങ്ങളിൽ അവസാനിക്കുന്ന സങ്കീർണമായ പ്രകൃതിചക്രത്തിലെ ഒരു പ്രധാന കണ്ണിയാണ് ഈ ചെറുജീവികൾ.