ദോഹ: ഖത്തറിൽ മുതിർന്നവരിൽ നാലിൽ ഒരാൾ വീതം (25 ശതമാനം) പുകയില ഉപയോഗിക്കുന്നതായി ഏറ്റവും പുതിയ സ്ഥിതിവിവരക്കണക്കുകൾ. ആഗോള പുകയിലവിരുദ്ധ ദിനത്തോടനുബന്ധിച്ച് പുറത്തുവിട്ട റിപ്പോർട്ടുകളിലാണ് രാജ്യത്തെ ആശങ്കപ്പെടുത്തുന്ന ഈ കണക്കുകളുള്ളത്. പുകയില ഉപയോഗം കുറയ്ക്കുന്നതിനും ലഹരിമുക്തി പ്രോത്സാഹിപ്പിക്കുന്നതിനുമായി രാജ്യം ശക്തമായ നടപടികളുമായി മുന്നോട്ടുപോവുകയാണെന്ന് പൊതുജനാരോഗ്യ മന്ത്രാലയം വ്യക്തമാക്കി.
​"വ്യാജ ആകർഷണങ്ങളുടെ മുഖംമൂടി അഴിച്ചുമാറ്റുക: പുകയില-നികോട്ടിൻ ആസക്തികൾക്കെതിരെ പോരാടുക" (Unmasking the Allure: Combating Tobacco and Nicotine Addiction) എന്നതാണ് ഈ വർഷത്തെ ലോക പുകയിലവിരുദ്ധ ദിന സന്ദേശം.പുകയില ഉൽപന്നങ്ങളുടെ ഉപയോഗം പൂർണ്ണമായും നിയന്ത്രിക്കുന്നതിനായി പൊതുജനാരോഗ്യ മന്ത്രാലയം, ഹമദ് മെഡിക്കൽ കോർപ്പറേഷൻ (HMC), പ്രൈമറി ഹെൽത്ത് കെയർ കോർപ്പറേഷൻ (PHCC) എന്നിവ സംയുക്തമായി വിപുലമായ പദ്ധതികളാണ് നടപ്പിലാക്കുന്നത്.പുകവലി ഉപേക്ഷിക്കാൻ ആഗ്രഹിക്കുന്നവർക്കായി രാജ്യത്തുടനീളം വിപുലമായ ചികിത്സാ സൗകര്യങ്ങളാണ് ഒരുക്കിയിട്ടുള്ളത്.
WHO (ലോകാരോഗ്യ സംഘടന) അംഗീകാരമുള്ള ഈ കേന്ദ്രത്തിൽ മരുന്നുകളും കൗൺസിലിംഗും ഉൾപ്പെടെയുള്ള അത്യാധുനിക ചികിത്സകൾ ലഭ്യമാണ്. പരമ്പരാഗത സിഗരറ്റുകൾക്ക് പുറമെ ഇ-സിഗരറ്റുകൾ, വേപ്പിംഗ്, ഹീറ്റഡ് ടൊബാക്കോ, നികോട്ടിൻ പൗച്ചുകൾ, ശീഷ (ഹൂക്ക) എന്നിവയും കടുത്ത ആരോഗ്യപ്രശ്നങ്ങൾക്ക് കാരണമാകുമെന്ന് കേന്ദ്രം മുന്നറിയിപ്പ് നൽകുന്നു.
രാജ്യത്തെ 15 ഹെൽത്ത് സെന്ററുകളിലായി നിലവിൽ 18 സ്മോക്കിംഗ് സെസേഷൻ ക്ലിനിക്കുകൾ പ്രവർത്തിക്കുന്നുണ്ട്. ഈ ക്ലിനിക്കുകളെ ആശ്രയിക്കുന്നവരിൽ 63.5 ശതമാനം പേരും വിജയകരമായി പുകവലി ഉപേക്ഷിച്ചതായാണ് കണക്കുകൾ വ്യക്തമാക്കുന്നത്. ചികിത്സ തേടിയവരിൽ പകുതിയിലധികം പേരും തുടർച്ചയായി ആറുമാസമെങ്കിലും പുകയിലയിൽ നിന്ന് പൂർണ്ണമായി വിട്ടുനിന്നതായും റിപ്പോർട്ടുകൾ വ്യക്തമാക്കുന്നു.
​കേവലം മരുന്നുകൾ കൊണ്ട് മാത്രമല്ല, പെരുമാറ്റരീതികളിൽ മാറ്റം വരുത്തിയും മാനസിക പിന്തുണ ഉറപ്പാക്കിയും മാത്രമേ പുകയില ആസക്തിയിൽ നിന്ന് പൂർണ്ണമായി മുക്തി നേടാനാകൂവെന്ന് ആരോഗ്യരംഗത്തെ വിദഗ്ദ്ധർ ഓർമ്മിപ്പിക്കുന്നു.