ദോഹ:ഐക്യരാഷ്ട്രസഭയുടെ വ്യാപാര, വികസന സമിതി (UNCTAD) സംഘടിപ്പിക്കുന്ന ഒൻപതാമത് 'വേൾഡ് ഇൻവെസ്റ്റ്‌മെന്റ് ഫോറം' (WIF) 2026 ഒക്ടോബർ 25 മുതൽ 27 വരെ ദോഹയിൽ നടക്കും. ഖത്തർ സർക്കാരുമായി സഹകരിച്ച് സംഘടിപ്പിക്കുന്ന ഉച്ചകോടിയിൽ ആഗോള നിക്ഷേപം, സുസ്ഥിര വികസനം, ഭാവി സഹകരണങ്ങൾ എന്നിവ പ്രധാന ചർച്ചാ വിഷയങ്ങളാകും.
'ഭാവിയിൽ നിക്ഷേപിക്കുക' (Investing in the Future) എന്ന പ്രമേയത്തിലാണ് ഇത്തവണത്തെ ഉച്ചകോടി നടക്കുന്നത്. നിർമ്മിത ബുദ്ധി (AI), ഊർജ്ജ മേഖല, അടിസ്ഥാന സൗകര്യ വികസനം, ടൂറിസം, ബഹിരാകാശ സാമ്പത്തിക രംഗം (Space Economy) തുടങ്ങി നിരവധി മേഖലകളിലെ ആഗോള സാധ്യതകൾ സമ്മേളനത്തിൽ ചർച്ച ചെയ്യും.സപ്ലൈ ചെയിൻ സുരക്ഷ, സാമ്പത്തിക വീണ്ടെടുക്കൽ എന്നിവയ്ക്കായിരിക്കും ആദ്യദിനത്തിൽ മുൻഗണന നൽകുകയെന്ന് യുഎൻസിടിഎഡി (UNCTAD) ഡിവിഷൻ ഡയറക്ടർ നാൻ ലി കോളിൻസ് വാർത്താ സമ്മേളനത്തിൽ അറിയിച്ചു. രണ്ടാം ദിനത്തിൽ നിർമ്മിത ബുദ്ധിയും സാങ്കേതികവിദ്യയും ആഗോള വികസനത്തിൽ വരുത്തുന്ന മാറ്റങ്ങളെക്കുറിച്ച് അന്താരാഷ്ട്ര ടെലികമ്മ്യൂണിക്കേഷൻ യൂണിയനുമായി (ITU) ചേർന്ന് ചർച്ചകൾ സംഘടിപ്പിക്കും. ഖത്തർ മുൻകൈയെടുക്കുന്ന സാംസ്കാരിക മേഖലയിലെ നിക്ഷേപ സാധ്യതകളും ഇത്തവണത്തെ ഫോറത്തിന്റെ പ്രത്യേകതയാണ്.
അതോടൊപ്പം, ലോക നിക്ഷേപ റിപ്പോർട്ട് 2026-ന്റെ വിവരങ്ങളും പുറത്തുവിട്ടു. രണ്ടു വർഷത്തെ ഇടിവിന് ശേഷം 2025-ൽ ആഗോള വിദേശ നേരിട്ടുള്ള നിക്ഷേപം (FDI) 6 ശതമാനം വർധിച്ച് 1.6 ട്രില്യൺ ഡോളറിലെത്തിയതായി റിപ്പോർട്ട് വ്യക്തമാക്കുന്നു.
