​ദോഹ: 2026-ലെ ലോകാരോഗ്യ ദിനത്തോടനുബന്ധിച്ച്, രോഗീസൗഹൃദമായ ചികിത്സാ രീതികളിലും ഗവേഷണങ്ങളിലും തങ്ങൾ കൈവരിച്ച നേട്ടങ്ങളും വരാനിരിക്കുന്ന പുതിയ വിപുലീകരണ പദ്ധതികളും സിദ്ര മെഡിസിൻ പ്രഖ്യാപിച്ചു. "ആരോഗ്യത്തിനായി ഒന്നിക്കാം, ശാസ്ത്രത്തിനൊപ്പം നിൽക്കാം" എന്നതാണ് ഈ വർഷത്തെ ലോകാരോഗ്യ ദിന സന്ദേശം.
​ഈ വർഷം സിദ്ര മെഡിസിനെ സംബന്ധിച്ചിടത്തോളം നിർണ്ണായകമാണ്; ഔട്ട്‌പേഷ്യന്റ് സേവനങ്ങൾ ആരംഭിച്ച് പത്തു വർഷവും ഇൻപേഷ്യന്റ് സേവനങ്ങൾ ആരംഭിച്ച് എട്ടു വർഷവും ഈ സ്ഥാപനം പൂർത്തിയാക്കുന്നു.ഏതാനും മാസങ്ങൾക്കുള്ളിൽ
വീടുകളിലെത്തിയുള്ള പരിശോധന പദ്ധതി ആരംഭിക്കും. പ്രസവശേഷം അമ്മമാരുടെയും നവജാതശിശുക്കളുടെയും ആരോഗ്യ പരിശോധന, വാക്സിനേഷൻ, കുട്ടികളുടെ വളർച്ചാ നിരീക്ഷണം എന്നിവ ഇതിലൂടെ വീട്ടിൽ തന്നെ ലഭ്യമാകും.സിദ്ര മെഡിസിനിൽ പ്രസവം കഴിഞ്ഞ് വീട്ടിലെത്തുന്ന അമ്മമാർക്ക് 48 മണിക്കൂറിനുള്ളിൽ നഴ്സുമാരുടെ സേവനം ലഭ്യമാക്കും. മുലയൂട്ടൽ സഹായം, കുട്ടിയുടെ തൂക്കം പരിശോധിക്കൽ, തുന്നലുകൾ നീക്കം ചെയ്യൽ എന്നിവ ഇതിൽ ഉൾപ്പെടുന്നു. പിന്നീട് ഇത് മറ്റ് ആശുപത്രികളിൽ പ്രസവിക്കുന്നവർക്കും ലഭ്യമാക്കും.നവജാതശിശുക്കൾക്കായി പുതിയ ലെവൽ-1 തീവ്രപരിചരണ വിഭാഗം ആരംഭിച്ചു. മഞ്ഞപ്പിത്തം, അണുബാധ, അമിതമായ തൂക്കക്കുറവ് എന്നിവയുള്ള കുഞ്ഞുങ്ങൾക്ക് 24 മണിക്കൂറും ഇവിടെ വിദഗ്ധ ചികിത്സ ലഭിക്കും.രോഗികൾക്ക് അപ്പോയിന്റ്‌മെന്റുകൾ നിയന്ത്രിക്കാനും മെഡിക്കൽ റെക്കോർഡുകൾ പരിശോധിക്കാനും ഡോക്ടർമാരുമായി ബന്ധപ്പെടാനും സൗകര്യപ്രദമായ മൊബൈൽ ആപ്പ് സേവനവും മെച്ചപ്പെടുത്തി.
​ശാസ്‌ത്രീയമായ ഗവേഷണങ്ങളിലൂടെ ഓരോ രോഗിക്കും അനുയോജ്യമായ രീതിയിലുള്ള 'പ്രിസിഷൻ മെഡിസിൻ' (Precision Medicine) ലഭ്യമാക്കുന്നതിലൂടെ ഖത്തറിലെ ആരോഗ്യരംഗത്ത് വിപ്ലവകരമായ മാറ്റങ്ങൾ കൊണ്ടുവരാനാണ് സിദ്ര മെഡിസിൻ ലക്ഷ്യമിടുന്നതെന്ന് അധികൃതർ വ്യക്തമാക്കി