ദോഹ:മിലാഹ ഗ്രൂപ്പ് സംഘടിപ്പിച്ച വർക്ക്‌പ്ലേസ് വെൽബീയിംഗ് ഫോറത്തിൽ ഖത്തർ തൊഴിൽ മന്ത്രാലയം (MoL) പങ്കെടുത്തു. ‘Together Towards Balance’ എന്ന പ്രമേയത്തിൽ നടന്ന ഫോറത്തിൽ, തൊഴിൽ മന്ത്രാലയത്തെ പ്രതിനിധീകരിച്ച് ഒക്യൂപേഷണൽ സേഫ്റ്റി ആൻഡ് ഹെൽത്ത് വിഭാഗമാണ് പങ്കാളിയായത്.രാജ്യത്തെ എല്ലാ തൊഴിലാളികൾക്കും സുരക്ഷിതവും ആരോഗ്യകരവുമായ തൊഴിൽ പരിസ്ഥിതി ഉറപ്പാക്കുന്നതിനുള്ള ശ്രമങ്ങളുടെ ഭാഗമായാണ് മന്ത്രാലയത്തിന്റെ പങ്കാളിത്തം. ജോലിയിടങ്ങളിലെ ക്ഷേമം ഉൽപാദനക്ഷമത വർധിപ്പിക്കുന്നതിലും ജീവനക്കാരുടെ പങ്കാളിത്തം മെച്ചപ്പെടുത്തുന്നതിലും പ്രതിഭകളെ നിലനിർത്തുന്നതിലും ദീർഘകാല സംഘടനാ വിജയത്തെ പിന്തുണയ്ക്കുന്നതിലും നിർണായക പങ്ക് വഹിക്കുന്നുവെന്ന് ഫോറം ചൂണ്ടിക്കാട്ടി.സ്ഥാപനങ്ങളുടെ വിജയത്തിനും സുസ്ഥിരതയ്ക്കും ജോലിയിട ക്ഷേമം പ്രധാന ഘടകമാണെന്നും, ജീവനക്കാരുടെ മാനസിക–ശാരീരിക ആരോഗ്യം, പ്രവർത്തന നിലവാരം, സൃഷ്ടിപരമായ കഴിവ്, നവീകരണ ശേഷി എന്നിവയുമായി അതിന് നേരിട്ടുള്ള ബന്ധമുണ്ടെന്നും ഫോറത്തിൽ വിലയിരുത്തി. തൊഴിലും വ്യക്തിജീവിതവും തമ്മിലുള്ള സന്തുലിതാവസ്ഥയും നീതിയിലും സമത്വത്തിലുമൂലപ്പെട്ട പ്രചോദനമേകുന്ന ജോലിപരിസരവുമാണ് ജീവനക്കാരുടെ സംതൃപ്തിയെ രൂപപ്പെടുത്തുന്നതെന്നും അഭിപ്രായപ്പെട്ടു.ഫോറത്തിനിടെ തൊഴിൽ മന്ത്രാലയത്തിലും മിലാഹ ഗ്രൂപ്പിലുമുള്ള നിരവധി വിദഗ്ധർ ജോലിയിടങ്ങളിൽ ക്ഷേമം പ്രോത്സാഹിപ്പിക്കുന്നതും മാനസികാരോഗ്യം ശക്തിപ്പെടുത്തുന്നതും മാനവ സുസ്ഥിരത ഉറപ്പാക്കുന്നതുമായ വിഷയങ്ങൾ അവതരിപ്പിച്ചു. ജോലിയിട ക്ഷേമം ഒരു ആഡംബരമല്ല, മറിച്ച് ഉൽപാദനക്ഷമത വർധിപ്പിക്കുകയും ചെലവ് കുറയ്ക്കുകയും ഗുണമേന്മയുള്ള ജോലി സംസ്കാരം സൃഷ്ടിക്കുകയും ചെയ്യുന്ന ഒരു തന്ത്രപരമായ നിക്ഷേപമാണെന്ന് വക്താക്കൾ ഊന്നിപ്പറഞ്ഞു.
ശാരീരികവും മാനസികവുമായ ക്ഷേമം സംബന്ധിച്ച സാങ്കേതികവും പ്രായോഗികവുമായ അവതരണങ്ങളും ജോലിയിടങ്ങളിലെ മാനസികാരോഗ്യ പരിപാടികളുടെ സ്വാധീനം വിശദീകരിക്കുന്ന സെഷനുകളും ഫോറത്തിന്റെ ഭാഗമായി നടന്നു. ജീവനക്കാരുടെ പ്രകടനം മെച്ചപ്പെടുത്താനും സ്ഥാപനങ്ങളിലുടനീളം സുസ്ഥിര വളർച്ചയുടെ മൂല്യങ്ങൾ ശക്തിപ്പെടുത്താനും സഹായിക്കുന്ന ഒരു പ്രധാന നടപടിയായി ഈ ഫോറം മാറിയതായി സംഘാടകർ വ്യക്തമാക്കി.