
കായംകുളം: ഹോം നഴ്സിങ് സ്ഥാപനത്തിന്റെ മറവിൽ നിരവധി പേരിൽനിന്ന് പണം തട്ടിയെന്ന പരാതിയിൽ യുവതി അറസ്റ്റിൽ. കീരിക്കാട് തെക്ക് ആലുംമൂട്ടിൽ പുതുവൽ വീട്ടിൽ അമൃത (22)യെയാണ് കായംകുളം പൊലീസ് പിടികൂടിയത്. ലൈസൻസില്ലാതെ പ്രവർത്തിച്ചിരുന്ന 'കൃഷ്ണ ഹോം നഴ്സിങ്' എന്ന സ്ഥാപനത്തിന്റെ പേരിലായിരുന്നു തട്ടിപ്പ്.
ഹോം നഴ്സായി ജോലി നൽകാമെന്നും പ്രതിമാസം 15,000 മുതൽ 30,000 രൂപ വരെ ശമ്പളം ലഭിക്കുമെന്നും വാഗ്ദാനം ചെയ്താണ് യുവതി സ്ത്രീകളെ വിവിധ വീടുകളിൽ ജോലിക്കായി നിയോഗിച്ചിരുന്നത്. ഇവരുടെ ശമ്പളത്തുക വീട്ടുകാരിൽനിന്ന് കൈപ്പറ്റിയ ശേഷം ജോലി ചെയ്തവർക്ക് പണം നൽകാതെ വഞ്ചിക്കുകയായിരുന്നു രീതി.
ഇത്തരത്തിൽ നിരവധി പേർക്ക് പണം നഷ്ടമായെന്ന പരാതികൾ ഉയർന്നതോടെയാണ് പൊലീസ് അന്വേഷണം ആരംഭിച്ചത്. തുടർന്ന് കായംകുളം എസ്ഐ സജിത് മോന്റെ നേതൃത്വത്തിലുള്ള സംഘം അമൃതയെ അറസ്റ്റ് ചെയ്യുകയായിരുന്നു.
കോടതിയിൽ ഹാജരാക്കിയ പ്രതിയെ ജുഡീഷ്യൽ കസ്റ്റഡിയിൽ റിമാൻഡ് ചെയ്തു.










