കൊച്ചി:​സുപ്രീം കോടതിയുടെ പ്രത്യേക നിർദ്ദേശമുണ്ടായിട്ടും 'വിറ്റ്‌നസ് പ്രൊട്ടക്ഷൻ സ്കീം, 2018' (Witness Protection Scheme, 2018) കേരളത്തിൽ ഇതുവരെ പൂർണ്ണമായും നടപ്പിലാക്കാത്തതിൽ ശക്തമായ അതൃപ്തി രേഖപ്പെടുത്തി കേരള ഹൈക്കോടതി. സംസ്ഥാനത്ത് ഈ പദ്ധതി എത്രയും പെട്ടെന്ന് നടപ്പിലാക്കാൻ അടിയന്തര നടപടികൾ സ്വീകരിക്കണമെന്ന് ഹൈക്കോടതി സംസ്ഥാന സർക്കാരിന് കർശന നിർദ്ദേശം നൽകി.
​ചീഫ് ജസ്റ്റിസ് സൗമെൻ സെൻ, ജസ്റ്റിസ് ശ്യാം കുമാർ വി.എം. എന്നിവരടങ്ങിയ ഡിവിഷൻ ബെഞ്ചാണ് ഈ നിർണായക ഉത്തരവ് പുറപ്പെടുവിച്ചത്. സാക്ഷികൾക്ക് സുരക്ഷ ഉറപ്പാക്കുന്നത് നീതി നിർവ്വഹണവ്യവസ്ഥയുടെ സുഗമമായ നടത്തിപ്പിന് അത്യന്താപേക്ഷിതമാണെന്നും, സുപ്രീം കോടതിയുടെ വ്യക്തമായ ഉത്തരവുകൾ നിലനിൽക്കെ ഇതിലുണ്ടാകുന്ന കാലതാമസം ഗൗരവകരമാണെന്നും കോടതി നിരീക്ഷിച്ചു.
​സുപ്രീം കോടതി നിർദ്ദേശിച്ചിട്ടും വിറ്റ്‌നസ് പ്രൊട്ടക്ഷൻ സ്കീം നടപ്പിലാക്കാത്തതിനെതിരെ ചീഫ് ജസ്റ്റിസ് അടങ്ങിയ ഡിവിഷൻ ബെഞ്ചാണ് ശക്തമായ നിലപാട് എടുത്തത്.
 കേരളത്തിലുടനീളം പദ്ധതി എത്രയും വേഗം നടപ്പിലാക്കിക്കൊണ്ട് അടിയന്തരമായി റിപ്പോർട്ട് സമർപ്പിക്കാൻ സർക്കാരിനോട് ആവശ്യപ്പെട്ടിട്ടുണ്ട്.
​കുറ്റകൃത്യങ്ങളിൽ ഇരകൾക്കും സാക്ഷികൾക്കും കൃത്യമായ സംരക്ഷണം നൽകുക വഴി നീതിപൂർവ്വമായ വിചാരണ ഉറപ്പാക്കുകയാണ് ഈ പദ്ധതിയുടെ ലക്ഷ്യം.
​വർഷങ്ങളായിട്ടും പദ്ധതി വൈകുന്നത് ക്രിമിനൽ നീതിന്യായ വ്യവസ്ഥയെയും സാക്ഷികളുടെ സുരക്ഷയെയും പ്രതികൂലമായി ബാധിക്കുമെന്ന വിലയിരുത്തലിലാണ് ഹൈക്കോടതിയുടെ ഈ കടുത്ത നടപടി. സർക്കാരിന്റെ ഭാഗത്തുനിന്നും ഇതിന്മേൽ എന്ത് തുടർനടപടികൾ ഉണ്ടാകുമെന്നത് കാത്തിരുന്നു കാണേണ്ടതുണ്ട്.