തിരുവനന്തപുരം: പതിമൂന്ന് വർഷമായി ശമ്പളവും കുടിശ്ശികയും ലഭിക്കാതെ ദുരിതത്തിലായിരുന്ന ഒരു അധ്യാപികയ്ക്ക് ഒടുവിൽ നീതി ലഭിച്ചു. എന്നാൽ ഇതിനായി സ്വന്തം ഭർത്താവിന്റെ ജീവൻ ഹോമിക്കേണ്ടി വന്നു. ശമ്പളം കിട്ടാത്തതിനെ തുടർന്ന് ഭർത്താവ് ആത്മഹത്യ ചെയ്ത ശേഷമാണ് വിദ്യാഭ്യാസ മന്ത്രി നേരിട്ട് വിഷയത്തിൽ ഇടപെട്ട് ഏകദേശം ഒരു കോടി രൂപയോളം വരുന്ന ശമ്പളക്കുടിശ്ശിക ലഭ്യമാക്കിയത്. സംഭവത്തിൽ വീഴ്ച വരുത്തിയ ഉദ്യോഗസ്ഥരെ സസ്പെൻഡ് ചെയ്യുകയും ചെയ്തു.
സർക്കാർ ഉദ്യോഗസ്ഥരുടെ അലംഭാവം കാരണം സാധാരണക്കാരുടെ ജീവിതം വഴിമുട്ടുന്ന സംഭവങ്ങൾ കേരളത്തിൽ തുടർക്കഥയാവുകയാണ്. 'ഓരോ ഫയലും ഓരോ ജീവിതമാണ്' എന്ന് സർക്കാർ അധികാരത്തിൽ വന്നപ്പോൾ പറഞ്ഞിരുന്നുവെങ്കിലും ഫയലുകൾ തീർപ്പാക്കാൻ ജീവനുകൾ ബലിയർപ്പിക്കേണ്ടി വരുന്ന ദുരവസ്ഥയാണ് ഇപ്പോഴുമുള്ളത്. കാസർകോട് ജില്ലയിൽ ഇതേ കാരണത്താൽ നേരത്തെ ഒരു അധ്യാപിക ആത്മഹത്യ ചെയ്തിരുന്നു. എന്നിട്ടും ഉദ്യോഗസ്ഥർക്ക് കുലുക്കമില്ല.
വീഴ്ച വരുത്തുന്ന ഉദ്യോഗസ്ഥർക്ക് ശിക്ഷ വേണ്ടേ?
അധ്യാപകരുടെ നിയമനത്തിന് കോഴ ആവശ്യപ്പെട്ട് ഫയലുകൾ മനഃപൂർവം താമസിപ്പിക്കുന്ന ഉദ്യോഗസ്ഥരുടെ നിലപാട് ഗുരുതരമായ പ്രശ്നമാണ്. രാഷ്ട്രീയ ഭേദമന്യേ ഭരണാധികാരികളും ഉദ്യോഗസ്ഥരും ഇതിന് കൂട്ടുനിൽക്കുന്നു എന്നാണ് ആക്ഷേപം. കൈക്കൂലിയോ മറ്റു പാരിതോഷികങ്ങളോ ലഭിക്കാത്തതിനാലാണ് പലപ്പോഴും ഫയലുകൾ വൈകിപ്പിക്കുന്നത്. പണം ലഭിക്കാതെ വിഷമിക്കുന്ന ഭിന്നശേഷി അധ്യാപകരുൾപ്പെടെയുള്ളവരുടെ ദുരിതം ഇതിന് ഉദാഹരണമാണ്. ഉദ്യോഗസ്ഥരുടെ ഈ കെടുകാര്യസ്ഥത കാരണം ജീവിതം തകരുന്നവർക്ക് നീതി ലഭ്യമാക്കാൻ ശക്തമായ നിയമനടപടികൾ ആവശ്യമാണെന്ന് ചൂണ്ടിക്കാണിക്കപ്പെടുന്നുഇങ്ങനെയുള്ള ഉദ്യോഗസ്ഥർക്കെതിരെ നരഹത്യക്ക് കേസെടുക്കുകയും ശമ്പള കുടിശ്ശികയ്ക്കുള്ള പലിശ അവരുടെ ശമ്പളത്തിൽ നിന്ന് ഈടാക്കി ഇരകൾക്ക് നൽകുകയും വേണം എന്നും അഭിപ്രായമുയരുന്നു.
എയ്ഡഡ് നിയമനങ്ങളിലെ ക്രമക്കേടുകൾ തുടരുന്നു
കേരളത്തിലെ രാഷ്ട്രീയ പ്രസ്ഥാനങ്ങൾ എയ്ഡഡ് വിദ്യാഭ്യാസ മേഖലയിലെ നിയമനങ്ങൾ പി.എസ്.സി വഴി നടത്താൻ തയ്യാറാവാത്തതിന് കാരണം ഈ മേഖലയിൽ നടക്കുന്ന ക്രമക്കേടുകളാണ്. നിയമനങ്ങൾ വഴി ലക്ഷക്കണക്കിന് രൂപ വരുമാനം ലഭിക്കുന്നതുകൊണ്ട് രാഷ്ട്രീയ പ്രസ്ഥാനങ്ങൾക്കും സർവീസ് സംഘടനകൾക്കും ഈ സംവിധാനം ഒരു കറവപ്പശുവാണ്. ഓരോ തസ്തികയും പാർട്ടിക്ക് വീതം വെക്കുന്നതും നിയമന അംഗീകാരങ്ങൾ വൈകിപ്പിക്കുന്നതും ഉദ്യോഗസ്ഥർക്കും രാഷ്ട്രീയക്കാർക്കും ഒരുപോലെ ലാഭകരമാണ്. വിദ്യാഭ്യാസ മേഖലയിലെ ഈ അഴിമതി അവസാനിപ്പിച്ച് സാമൂഹിക നീതി ഉറപ്പാക്കാൻ സർക്കാർ അടിയന്തരമായി ഇടപെടേണ്ടത് അത്യാവശ്യമാണ്.
ഒരു ജീവിതം നഷ്ടപ്പെട്ടപ്പോൾ മാത്രമാണ് ഈ വിഷയത്തിൽ സർക്കാർ ഇടപെട്ടത്. ഇനിയും ഇതുപോലൊരു സംഭവം ഉണ്ടാകാതിരിക്കാൻ ശക്തമായ നടപടികൾ സ്വീകരിക്കുമോ അതോ മറ്റൊരു ദുരന്തം ഉണ്ടാകാൻ കാത്തിരിക്കുകയാണോ സർക്കാർ?
