റയിൽവെ ജീവനക്കാരനായ യുവാവിനെ ഭാര്യ കൊലപ്പെടുത്തി. ഉത്തർപ്രദേശിലെ ബിജ്നോറിലാണ് സംഭവം. നജിബാബാദ് പോലീസ് സ്റ്റേഷൻ പരിധിയിൽ താമസിക്കുന്ന ദീപക് കുമാറിനെയാണ് ഭാര്യ ശിവാനി കൊലപ്പെടുത്തിയത്. റെയിൽവെയിൽ ടെക്നീഷ്യനാണ് ദീപക് കുമാർ.
ഭർത്താവിന് ഹൃദയാഘാതം സംഭവിച്ചതായി ശിവാനി ഭർതൃവീട്ടുകാരോട് പറഞ്ഞതോടെയാണ് സംഭവം പുറംലോകം അറിയുന്നത്. യുവാവിന്റെ ബന്ധുക്കൾ മരണത്തിൽ സംശയം പ്രകടിപ്പിക്കുകയും പോസ്റ്റ്മോർട്ടം വേണമെന്ന നിലപാട് സ്വീകരിക്കുകയുമായിരുന്നു. പോസ്റ്റ്മോർട്ടത്തിൽ ദീപക് ശ്വാസംമുട്ടിയാണ് മരിച്ചതെന്ന് വ്യക്തമായി.
ഇതിന് പിന്നാലെയാണ് യുവാവിന്റെ ബന്ധുക്കൾ ശിവാനിക്കെതികെ പൊലീസിൽ പരാതി നൽകിയത്. തുടർന്ന് നടത്തിയ അന്വേഷണത്തിനൊടുവിൽ പൊലീസ് യുവതിയെ അറസ്റ്റ് ചെയ്യുകയായിരുന്നു. ഭർത്താവിന്റെ ജോലി ലഭിക്കാൻ വേണ്ടിയാണ് യുവതി കൃത്യം ചെയ്തത് എന്നാണ് പൊലീസ് വ്യക്തമാക്കുന്നത്.
