കൊല്ലം: കുണ്ടറയിൽ മധ്യവയസ്കനെ കഴുത്ത് മുറുക്കി കൊലപ്പെടുത്തിയ കേസിൽ ഭാര്യ അറസ്റ്റിൽ. വെള്ളിമൺ സ്വദേശി രാജു (56) കൊല്ലപ്പെട്ട സംഭവത്തിലാണ് ഭാര്യ ലേഖ മേരിയെ കുണ്ടറ പൊലീസ് അറസ്റ്റ് ചെയ്തത്. സ്വത്ത് തർക്കമാണ് കൊലപാതകത്തിന് പിന്നിലെന്നാണ് പൊലീസ് പറയുന്നത്.
വെള്ളിയാഴ്ച പുലർച്ചെ രാജു വീട്ടിൽ കുഴഞ്ഞുവീണതാണെന്ന് നാട്ടുകാരെ ധരിപ്പിക്കാനാണ് ലേഖ മേരി ശ്രമിച്ചത്. തുടർന്ന് നാട്ടുകാരുടെ സഹായത്തോടെ രാജുവിനെ ആശുപത്രിയിലെത്തിച്ചെങ്കിലും മരണം സംഭവിച്ചിരുന്നു.
എന്നാൽ പോസ്റ്റ്‌മോർട്ടം പരിശോധനയിലാണ് രാജുവിന്റെ മരണം കഴുത്ത് മുറുകിയതിനെ തുടർന്നാണെന്ന് വ്യക്തമായത്. ഇതോടെ പൊലീസ് നടത്തിയ അന്വേഷണത്തിൽ ഭാര്യയെ കസ്റ്റഡിയിലെടുത്ത് വിശദമായി ചോദ്യം ചെയ്തു.
മണിക്കൂറുകൾ നീണ്ട ചോദ്യം ചെയ്യലിനൊടുവിൽ രാജുവിനെ ബെൽറ്റ് ഉപയോഗിച്ച് കഴുത്ത് മുറുക്കി കൊലപ്പെടുത്തിയതായി ലേഖ മേരി സമ്മതിച്ചതായി പൊലീസ് അറിയിച്ചു. സ്വത്ത് സംബന്ധിച്ച തർക്കമാണ് കൊലപാതകത്തിലേക്ക് നയിച്ചതെന്നും പൊലീസ് വ്യക്തമാക്കി.
സംഭവത്തിൽ അറസ്റ്റ് രേഖപ്പെടുത്തിയ കുണ്ടറ പൊലീസ് കേസിൽ കൂടുതൽ അന്വേഷണം തുടരുകയാണ്.
