പുകവലി ശ്വാസകോശത്തെയും ഹൃദയത്തെയും മാത്രമല്ല, പ്രത്യുൽപാദന ആരോഗ്യത്തെയും ഗുരുതരമായി ബാധിക്കുന്നതായി പഠനങ്ങൾ. സ്ത്രീകളിലും പുരുഷന്മാരിലും വന്ധ്യതാ സാധ്യത വർധിപ്പിക്കുന്നതിൽ പുകവലിക്ക് വലിയ പങ്കുണ്ടെന്നാണ് ലോകാരോഗ്യ സംഘടന ചൂണ്ടിക്കാട്ടുന്നത്. കുട്ടികളുണ്ടാകാൻ ആഗ്രഹിക്കുന്ന ദമ്പതികൾ പുകവലി പൂർണമായി ഒഴിവാക്കണമെന്നാണ് ആരോഗ്യ വിദഗ്ധരുടെ നിർദേശം.
പുകവലി സ്ത്രീകളുടെയും പുരുഷന്മാരുടെയും പ്രത്യുൽപാദന ശേഷിയെ പ്രതികൂലമായി ബാധിക്കാം. 2000 മുതൽ 2026 വരെ നടന്ന പഠനങ്ങളുടെ അടിസ്ഥാനത്തിൽ, പുകവലിക്കുന്ന സ്ത്രീകളിൽ പുകവലിക്കാത്തവരെ അപേക്ഷിച്ച് വന്ധ്യതയ്ക്കുള്ള സാധ്യത 40 ശതമാനം കൂടുതലാണെന്നാണ് റിപ്പോർട്ടുകൾ സൂചിപ്പിക്കുന്നത്. പുകവലി ഉപേക്ഷിച്ചവരിൽ, ഇപ്പോഴും പുകവലി തുടരുന്നവരെ അപേക്ഷിച്ച് ഈ സാധ്യത 25 ശതമാനം വരെ കുറയുന്നതായും പഠനങ്ങൾ വ്യക്തമാക്കുന്നു.
പുകയിലയിൽ അടങ്ങിയിരിക്കുന്ന നിരവധി ഹാനികരമായ രാസവസ്തുക്കൾ സ്ത്രീകളിലെ അണ്ഡത്തിന്റെ ഗുണനിലവാരത്തെയും പുരുഷന്മാരിലെ ബീജത്തിന്റെ ആരോഗ്യത്തെയും ബാധിക്കാം. ഹോർമോൺ പ്രവർത്തനങ്ങളിലുണ്ടാകുന്ന മാറ്റങ്ങളും ഇതിന്റെ ഭാഗമായി സംഭവിക്കാം.
പുരുഷന്മാരെ സംബന്ധിച്ചും ആശങ്കപ്പെടുത്തുന്ന കണ്ടെത്തലുകളാണ് പഠനങ്ങളിൽനിന്ന് പുറത്തുവരുന്നത്. 60,000-ത്തിലധികം പുരുഷന്മാരെ ഉൾപ്പെടുത്തി നടത്തിയ 44 പഠനങ്ങളുടെ അവലോകനത്തിൽ, പുകവലി ബീജത്തിന്റെ അളവ് കുറയുന്നതിനും ബീജത്തിന്റെ ചലനശേഷിയിലും രൂപത്തിലും മാറ്റങ്ങൾ ഉണ്ടാകുന്നതിനും കാരണമാകുന്നതായി കണ്ടെത്തിയിട്ടുണ്ട്. ഉദ്ധാരണക്കുറവ്, സ്ഖലനവുമായി ബന്ധപ്പെട്ട പ്രശ്നങ്ങൾ എന്നിവയ്ക്കും പുകവലി കാരണമാകാമെന്ന് പഠനങ്ങൾ ചൂണ്ടിക്കാട്ടുന്നു.
പുകവലി സ്വാഭാവിക ഗർഭധാരണത്തിനുള്ള സാധ്യതയെയും ബാധിക്കാം. പുകവലിക്കുന്ന ദമ്പതികൾക്ക് സ്വാഭാവികമായി ഗർഭധാരണം നടക്കാനുള്ള സാധ്യത കുറയുന്നതിനൊപ്പം, ഐവിഎഫ് പോലുള്ള സഹായപ്രജനന ചികിത്സകളുടെ ഫലപ്രാപ്തിയിലും പുകവലി പ്രതികൂല സ്വാധീനം ചെലുത്തുന്നതായി ഗവേഷണങ്ങൾ വ്യക്തമാക്കുന്നു.
സ്വയം പുകവലിക്കുന്നവരിൽ മാത്രമല്ല, മറ്റുള്ളവരുടെ പുക ശ്വസിക്കുന്നവരിലും സമാനമായ ആശങ്കകളുണ്ട്. പാസീവ് സ്മോക്കിങ്ങും പ്രത്യുൽപാദന ആരോഗ്യത്തെ ബാധിക്കുകയും ഗർഭധാരണ സാധ്യത കുറയ്ക്കുകയും ചെയ്യാമെന്നാണ് ലോകാരോഗ്യ സംഘടനയുടെ മുന്നറിയിപ്പ്.
ഗർഭകാലത്തെ പുകവലിയും പ്രത്യേകിച്ച് അപകടകരമാണ്. ഗർഭിണിയായ സ്ത്രീ പുകവലിക്കുന്നത് കുറഞ്ഞ ജനനഭാരമുള്ള കുഞ്ഞ്, മാസം തികയാതെയുള്ള പ്രസവം, കുഞ്ഞിന് ശ്വാസകോശ സംബന്ധമായ പ്രശ്നങ്ങൾ എന്നിവയ്ക്കുള്ള സാധ്യത വർധിപ്പിക്കാം.
ലോകത്ത് ഏകദേശം ആറുപേരിൽ ഒരാൾക്ക് ജീവിതത്തിലെ ഏതെങ്കിലും ഘട്ടത്തിൽ വന്ധ്യത അനുഭവപ്പെടുന്നുണ്ടെന്നാണ് കണക്കുകൾ. ഇതിനിടെയാണ് പുകവലി ഒഴിവാക്കുന്നതിന്റെ പ്രാധാന്യം ആരോഗ്യ വിദഗ്ധർ വീണ്ടും ചൂണ്ടിക്കാട്ടുന്നത്. കുട്ടികളുണ്ടാകാൻ ആഗ്രഹിക്കുന്ന ദമ്പതികൾ പുകവലി പൂർണമായി ഉപേക്ഷിക്കുന്നത് പ്രത്യുൽപാദന ആരോഗ്യം മെച്ചപ്പെടുത്തുന്നതിനുള്ള പ്രധാന നടപടികളിലൊന്നായേക്കാം.
ഇ-സിഗരറ്റുകളുടെ പ്രത്യുൽപാദന ആരോഗ്യത്തെ ബാധിക്കുന്നതിനെക്കുറിച്ച് കൂടുതൽ പഠനങ്ങൾ ആവശ്യമായിരിക്കുമ്പോഴും, പരമ്പരാഗത സിഗരറ്റ് ഉപയോഗവും പ്രത്യുൽപാദന ശേഷിയിലെ പ്രതികൂല മാറ്റങ്ങളും തമ്മിൽ ശക്തമായ ബന്ധമുണ്ടെന്നാണ് നിലവിലെ തെളിവുകൾ സൂചിപ്പിക്കുന്നത്.
