​തിരുവനന്തപുരം: പണവും പരിഷ്കാരവും ആധുനിക സൗകര്യങ്ങളും തേടി മലയാളി യുവത്വം കൂട്ടത്തോടെ വിദേശത്തേക്ക് കുടിയേറുമ്പോൾ, കേരളം വയോധികരുടെ മാത്രം നാടായി മാറുന്നു. ഉറ്റവർ വിദേശങ്ങളിൽ സ്ഥിരതാമസമാക്കുന്നതോടെ നാട്ടിൻപുറങ്ങളിലെ പ്രൗഢമായ തറവാടുകൾ ആരുമില്ലാത്ത 'ഭാർഗവീനിലയങ്ങളായി' മാറുകയാണ്. മുതിർന്ന പൗരന്മാരുടെ സുരക്ഷയ്ക്കായി ഏർപ്പെടുത്തിയ സർക്കാർ സംവിധാനങ്ങൾ നോക്കുകുത്തിയാകുന്നതോടെ വാർദ്ധക്യകാലം വലിയൊരു ചോദ്യചിഹ്നമായി മാറുന്നു.

​കുമ്പനാട് ഒരു സൂചന മാത്രം

​ലോകത്ത് ഏറ്റവും കൂടുതൽ ജനസംഖ്യയുള്ള രാജ്യത്തെ 'പ്രേതനഗരം' (Ghost Town) എന്ന് ബി.ബി.സി വിശേഷിപ്പിച്ചത് പത്തനംതിട്ടയിലെ കുമ്പനാടിനെയാണ്. പതിനായിരത്തിലധികം വീടുകൾ അടഞ്ഞു കിടക്കുന്നു, സ്കൂളുകളിൽ കുട്ടികളില്ല, എല്ലായിടത്തും മുതിർന്ന പൗരന്മാർ മാത്രം. ഇത് ഒരു പ്രദേശത്തിന്റെ മാത്രം കഥയല്ല, കേരളത്തിലുടനീളം വ്യാപിച്ചുകൊണ്ടിരിക്കുന്ന പുതിയ പ്രവണതയുടെ ആഴമാണ് വ്യക്തമാക്കുന്നത്. ഏകദേശം 22 ലക്ഷം മലയാളികൾ ഇന്ന് പ്രവാസികളാണ്, ഇതിൽ 2.48 ലക്ഷത്തോളം പേർ വിദ്യാർത്ഥികളാണ്.

​ഏറ്റവും വലിയ 'ഐറണി'

​പുതിയ കാലത്തെ കുടിയേറ്റം പഴയ ഗൾഫ് പ്രവാസത്തിൽ നിന്നും തികച്ചും വ്യത്യസ്തമാണ്. മുമ്പ് കുടുംബം പോറ്റാൻ ഒരാൾ പോയിരുന്ന സ്ഥാനത്ത് ഇന്ന് കുടുംബസമേതമാണ് പലരും നാടുവിടുന്നത്. അവിടെ വിദേശ പൗരത്വം സ്വീകരിച്ച് അവർ ആ നാടിന്റെ ഭാഗമാകുന്നു. ഇതിനിടയിലെ ഏറ്റവും വലിയ വൈരുദ്ധ്യം  എന്തെന്നാൽ, വിദേശത്തെത്തുന്ന മലയാളികളിൽ ഭൂരിഭാഗവും അവിടെ ഉപജീവനത്തിനായി തിരഞ്ഞെടുക്കുന്നത് വൃദ്ധജന പരിപാലനമാണ് (Caregiving). സ്വന്തം നാട്ടിൽ മാതാപിതാക്കളെ തനിച്ചാക്കി മറുനാട്ടിലെ വയോധികരെ ശുശ്രൂഷിക്കേണ്ടി വരുന്ന സാഹചര്യം പ്രവാസത്തിന്റെ ക്രൂരമായ യാഥാർത്ഥ്യമാണ്.

​കടലാസിലൊതുങ്ങുന്ന നിയമസഹായം

​ഏകാന്തതയും അരക്ഷിതാവസ്ഥയുമാണ് ഒറ്റപ്പെട്ടു കഴിയുന്ന വയോധികർ നേരിടുന്ന പ്രധാന ഭീഷണി. ഇത് പരിഹരിക്കാൻ 2007-ൽ പാർലമെന്റ് പാസാക്കിയ നിയമപ്രകാരം ഓരോ പൊലീസ് സ്റ്റേഷനിലും 'ഓൾഡ് ഏജ് കമ്മിറ്റികൾ' രൂപീകരിക്കേണ്ടതുണ്ട്. എന്നാൽ ഇത്തരം സമിതികൾ പലയിടത്തും പേരിന് പോലും പ്രവർത്തിക്കുന്നില്ല. കുറ്റകൃത്യങ്ങൾ നടക്കുമ്പോൾ മാത്രം ഉണരുകയും പിന്നീട് നിശബ്ദമാവുകയും ചെയ്യുന്ന രീതിയാണ് അധികൃതരുടേത്.

​തദ്ദേശ സ്ഥാപനങ്ങളുടെ വീഴ്ച

​വയോജന ക്ഷേമത്തിനായി തനത് ഫണ്ടിന്റെ 5 ശതമാനം നീക്കിവയ്ക്കണമെന്നും ജാഗ്രതാ സമിതികൾ രൂപീകരിക്കണമെന്നും സർക്കാർ ഉത്തരവുണ്ടെങ്കിലും മിക്ക തദ്ദേശ സ്ഥാപനങ്ങളും ഇത് പാലിക്കുന്നില്ല. വയോജന ഫണ്ട് വകമാറ്റുന്നതായും പരാതികളുണ്ട്. പകൽവീടുകളും പാലിയേറ്റീവ് കെയറുകളും കാര്യക്ഷമമായാൽ മാത്രമേ വയോധികരുടെ ഒറ്റപ്പെടലിന് അല്പമെങ്കിലും ആശ്വാസം ലഭിക്കൂ.

​മാറുന്ന കേരളം

​കേരളത്തിന്റെ വേരുകൾ തേടി വല്ലപ്പോഴും അവധിക്കാലത്ത് എത്തുന്ന പുതിയ തലമുറയ്ക്ക് മാതൃഭാഷയും നാടും അന്യമായി മാറുന്നു. പ്രിയപ്പെട്ടവരുടെ വരവ് കാത്ത് ജനലഴികളിലൂടെ നോക്കിയിരിക്കുന്ന വയോധികർ കേരളത്തിന്റെ ഒരു വിങ്ങുന്ന കാഴ്ചയായി മാറുകയാണ്. വരാനിരിക്കുന്ന 'വയോജന സൗഹൃദ നയമെങ്കിലും' ഈ മുറിവുകൾക്ക് അല്പം മരുന്നാകുമെന്നാണ് പൊതുസമൂഹത്തിന്റെ പ്രതീക്ഷ.