വാട്സാപ്പ് ബിസിനസ് പ്ലാറ്റ്ഫോമിലെ സന്ദേശ നിരക്കുകളിൽ മാറ്റം വരുത്തി മെറ്റ. ഇതുവരെ സൗജന്യമായി അയയ്ക്കാൻ കഴിഞ്ഞിരുന്ന ചില യൂട്ടിലിറ്റി സന്ദേശങ്ങൾക്കും ഇനി മുതൽ സ്ഥാപനങ്ങൾ പണം നൽകേണ്ടിവരും. ഒക്ടോബർ ഒന്ന് മുതലാണ് പുതിയ നിരക്ക് പ്രാബല്യത്തിൽ വരുന്നത്.

നിലവിലെ സംവിധാനത്തിൽ ഉപഭോക്താവിൽനിന്ന് സന്ദേശം ലഭിച്ചാൽ 24 മണിക്കൂറിനുള്ളിൽ ബിസിനസ് സ്ഥാപനങ്ങൾക്ക് സൗജന്യമായി മറുപടി നൽകാൻ സാധിച്ചിരുന്നു. ഉത്പന്നങ്ങളെക്കുറിച്ചുള്ള സംശയങ്ങൾക്ക് മറുപടി നൽകുന്നതിനൊപ്പം ഓർഡർ സ്ഥിരീകരണം, ഡെലിവറി അപ്‌ഡേറ്റ് തുടങ്ങിയ സന്ദേശങ്ങളും ഇതിൽ ഉൾപ്പെട്ടിരുന്നു.

എന്നാൽ ഒക്ടോബർ ഒന്ന് മുതൽ 24 മണിക്കൂറിനുള്ളിൽ അയയ്ക്കുന്ന ഓർഡർ അപ്‌ഡേറ്റുകൾ ഉൾപ്പെടെയുള്ള യൂട്ടിലിറ്റി സന്ദേശങ്ങൾക്ക് മെറ്റ നിരക്ക് ഈടാക്കും. ജിഎസ്ടി ഉൾപ്പെടെ ഓരോ സന്ദേശത്തിനും ഏകദേശം 0.136 രൂപയാണ് ഈടാക്കുക. ജിഎസ്ടി ഒഴിവാക്കിയാൽ നിരക്ക് 0.115 രൂപയായിരിക്കും.

അതേസമയം, ഉപഭോക്താക്കളുടെ നേരിട്ടുള്ള ചോദ്യങ്ങൾക്കുള്ള സർവീസ് മറുപടികൾക്ക് ഇളവ് തുടരും. ഓരോ ബിസിനസ് ഫോൺ നമ്പറിനും പ്രതിമാസം ആദ്യത്തെ 1,000 സർവീസ് സന്ദേശങ്ങൾ സൗജന്യമായിരിക്കും. 1,000 സന്ദേശങ്ങൾക്ക് ശേഷമുള്ള മറുപടികൾക്കാണ് നിരക്ക് ബാധകമാകുക.

ഉദാഹരണത്തിന്, ഒരു സ്ഥാപനം ഒരു മാസത്തിൽ 1,500 സർവീസ് മറുപടികൾ അയച്ചാൽ ആദ്യത്തെ 1,000 എണ്ണം സൗജന്യമായിരിക്കും. ബാക്കിയുള്ള 500 സന്ദേശങ്ങൾക്ക് നിശ്ചിത നിരക്ക് നൽകണം.

24 മണിക്കൂർ സമയപരിധി കഴിഞ്ഞ് അയയ്ക്കുന്ന യൂട്ടിലിറ്റി സന്ദേശങ്ങൾക്ക് നിലവിൽ തന്നെ ഫീസ് ഈടാക്കുന്നുണ്ട്. അതിനാൽ ഈ സംവിധാനത്തിൽ ഒക്ടോബർ ഒന്നുമുതൽ പ്രത്യേക മാറ്റമുണ്ടാകില്ല.

അതേസമയം, ഫേസ്ബുക്ക് പേജുകളിലെ ക്ലിക്ക്-ടു-വാട്സാപ്പ് പരസ്യങ്ങൾ, കോൾ-ടു-ആക്ഷൻ ബട്ടണുകൾ തുടങ്ങിയവ വഴി ഉപഭോക്താക്കളെ വാട്സാപ്പിലേക്ക് എത്തിക്കുന്ന സാഹചര്യത്തിൽ നിലവിലുള്ള 72 മണിക്കൂർ സൗജന്യ കാലയളവ് തുടരും. ഈ സമയപരിധിക്കുള്ളിൽ ബിസിനസ് സ്ഥാപനങ്ങൾക്ക് ഉപഭോക്താക്കൾക്ക് ഫീസ് നൽകാതെ സന്ദേശങ്ങൾ അയയ്ക്കാനാകും.

സാധാരണ വാട്സാപ്പ് ഉപയോക്താക്കളെ ബാധിക്കില്ല

മെറ്റയുടെ പുതിയ നിരക്ക് മാറ്റം സാധാരണ വാട്സാപ്പ് ഉപയോക്താക്കൾക്ക് ബാധകമല്ല. വാട്സാപ്പ് ബിസിനസ് ആപ്പ് ഉപയോഗിക്കുന്ന ചെറുകിട സ്ഥാപനങ്ങളെയും വ്യക്തിഗത ഉപയോക്താക്കളെയും നേരിട്ട് ബാധിക്കുന്ന മാറ്റമല്ല ഇത്. വാട്സാപ്പ് ബിസിനസ് പ്ലാറ്റ്ഫോം വഴി ഉപഭോക്താക്കളുമായി വലിയ തോതിൽ ആശയവിനിമയം നടത്തുന്ന വാണിജ്യ സ്ഥാപനങ്ങൾക്കാണ് പുതിയ നിരക്കുകൾ ബാധകമാകുന്നത്.

ഉപഭോക്താക്കൾക്ക് ബിസിനസ് സ്ഥാപനങ്ങളിലേക്ക് സന്ദേശം അയയ്ക്കുന്നതിനോ അവരിൽനിന്ന് മറുപടി, ഓർഡർ വിവരങ്ങൾ, ഡെലിവറി അപ്‌ഡേറ്റുകൾ തുടങ്ങിയവ സ്വീകരിക്കുന്നതിനോ പുതിയതായി പണം നൽകേണ്ടതില്ല.