ന്യൂഡൽഹി: ഇന്ത്യയിലെ നിരവധി വാട്സാപ്പ് ഉപയോക്താക്കൾ അപ്രതീക്ഷിത സാങ്കേതിക പ്രതിസന്ധി നേരിടുന്നതായി റിപ്പോർട്ട്. യാതൊരു മുന്നറിയിപ്പുമില്ലാതെ അക്കൗണ്ടുകൾ ബ്ലോക്ക് ചെയ്യപ്പെട്ടെന്നാണ് വിവിധ ഭാഗങ്ങളിൽ നിന്ന് ഉയരുന്ന പരാതി. ടെക് കമ്മ്യൂണിറ്റികളിലും സമൂഹമാധ്യമ പ്ലാറ്റ്ഫോമുകളിലും നിരവധി പേർ തങ്ങളുടെ അനുഭവങ്ങൾ പങ്കുവെച്ചിട്ടുണ്ട്.
ബ്ലോക്ക് ചെയ്യപ്പെട്ട അക്കൗണ്ടുകളിലേക്ക് ലോഗിൻ ചെയ്യാൻ ശ്രമിക്കുമ്പോൾ "നിങ്ങളുടെ അക്കൗണ്ട് 24 മണിക്കൂറത്തേക്ക് മരവിപ്പിച്ചിരിക്കുന്നു" എന്ന സന്ദേശമാണ് ലഭിക്കുന്നത്. എന്നാൽ നടപടി സ്വീകരിച്ചതിന്റെ വ്യക്തമായ കാരണം സന്ദേശത്തിൽ വ്യക്തമാക്കുന്നില്ല. ജോലി, ബിസിനസ്, വ്യക്തിഗത ആശയവിനിമയം എന്നിവയ്ക്കായി വാട്സാപ്പിനെ ആശ്രയിക്കുന്നവരാണ് ഇതുമൂലം കൂടുതൽ ബുദ്ധിമുട്ട് നേരിടുന്നത്.
സംഭവം വ്യാപകമായി ചർച്ചയായതോടെ വാട്സാപ്പ് അധികൃതർ പ്രതികരണവുമായി രംഗത്തെത്തി. സുരക്ഷാ സംവിധാനങ്ങളുടെ പ്രവർത്തനത്തിനിടെ ചില അക്കൗണ്ടുകൾ തെറ്റായി സംശയാസ്പദമായി തിരിച്ചറിഞ്ഞിരിക്കാമെന്നാണ് പ്രാഥമിക വിലയിരുത്തൽ. ഓട്ടോമേറ്റഡ് സുരക്ഷാ പരിശോധനകളിൽ ഇത്തരം പിഴവുകൾ അപൂർവമായി സംഭവിക്കാമെന്നും കമ്പനി അറിയിച്ചു.
സമൂഹമാധ്യമങ്ങളിലൂടെ പരാതി നൽകിയതിന് പിന്നാലെ ചില ഉപയോക്താക്കളുടെ അക്കൗണ്ടുകൾ വീണ്ടും സജീവമായതായി റിപ്പോർട്ടുകളുണ്ട്. തെറ്റായി ബ്ലോക്ക് ചെയ്യപ്പെട്ട അക്കൗണ്ടുകൾ തിരിച്ചുനൽകുന്നതിനുള്ള നടപടികൾ വാട്സാപ്പ് പുരോഗമിപ്പിക്കുകയാണെന്നും സൂചനയുണ്ട്.
