ഹൈദരാബാദ്: ഭാരത് രാഷ്ട്ര സമിതി (ബി.ആർ.എസ്) നേതാവും മുൻ മന്ത്രിയുമായ കെ.ടി. രാമറാവു (കെ.ടി.ആർ) സ്വന്തം സഹോദരി കെ. കവിതയെ കുടുംബവീട്ടിൽനിന്ന് പുറത്താക്കിയെന്ന് തെലങ്കാന മുഖ്യമന്ത്രി എ. രേവന്ത് റെഡ്ഡി ആരോപിച്ചു. കുടുംബസ്വത്ത് പങ്കുവെക്കാൻ തയ്യാറാകാത്തതിനെ തുടർന്നാണ് സഹോദരിയോട് ഈ നിലപാട് സ്വീകരിച്ചതെന്നും അദ്ദേഹം കുറ്റപ്പെടുത്തി.
തന്റെ നിയമസഭാ മണ്ഡലമായ കൊടങ്കലിൽ വനിതാ സ്വയംസഹായ സംഘങ്ങളിലെ അംഗങ്ങളെ അഭിസംബോധന ചെയ്ത് സംസാരിക്കുകയായിരുന്നു മുഖ്യമന്ത്രി.
ഡൽഹി മദ്യനയക്കേസിൽ ജയിലിൽ കഴിയേണ്ടിവന്ന കവിത തിരിച്ചെത്തിയപ്പോൾ അവരെ ചേർത്തുപിടിച്ച് സംരക്ഷിക്കേണ്ടത് സഹോദരന്റെയും കുടുംബത്തിന്റെയും ഉത്തരവാദിത്വമായിരുന്നു. എന്നാൽ സ്വന്തം സഹോദരിയെപ്പോലും സംരക്ഷിക്കാൻ കഴിയാത്ത കെ.ടി.ആർ വനിതാക്ഷേമത്തെക്കുറിച്ച് സംസാരിക്കുന്നതിൽ എന്ത് അർഥമാണുള്ളതെന്ന് രേവന്ത് റെഡ്ഡി ചോദിച്ചു.
കുടുംബാംഗങ്ങൾക്ക് നല്ല ഉപദേശം നൽകാൻ കഴിയാത്ത കെ.ടി.ആറിന്റെ പിതാവും ബി.ആർ.എസ് അധ്യക്ഷനുമായ കെ. ചന്ദ്രശേഖർ റാവു (കെ.സി.ആർ) നാലുകോടി തെലങ്കാന ജനങ്ങൾക്ക് എന്ത് നന്മ ചെയ്യുമെന്നായിരുന്നു മുഖ്യമന്ത്രിയുടെ പരിഹാസം.
ഡൽഹി മദ്യനയക്കേസുമായി ബന്ധപ്പെട്ട് ജയിലിൽ കഴിഞ്ഞിരുന്ന കവിത പിന്നീട് ബി.ആർ.എസിൽനിന്ന് സസ്പെൻഡ് ചെയ്യപ്പെടുകയും സ്വന്തം രാഷ്ട്രീയ സംഘടനയായ തെലങ്കാന രക്ഷണ സേന രൂപീകരിക്കുകയും ചെയ്തിരുന്നു.
വനിതാ ശാക്തീകരണത്തിനും സാമ്പത്തിക സ്വയംപര്യാപ്തതയ്ക്കും തന്റെ സർക്കാർ വലിയ പ്രാധാന്യം നൽകുന്നുണ്ടെന്ന് രേവന്ത് റെഡ്ഡി പറഞ്ഞു. മുഖ്യമന്ത്രിയായി 2023 ഡിസംബറിൽ ചുമതലയേൽക്കുമ്പോൾ സംസ്ഥാനത്തെ വനിതാ സ്വയംസഹായ സംഘങ്ങളിൽ ഏകദേശം 60 ലക്ഷം അംഗങ്ങളായിരുന്നു ഉണ്ടായിരുന്നത്. ഇപ്പോഴത് 70 ലക്ഷമായി ഉയർന്നു. 2034-ഓടെ അംഗസംഖ്യ ഒരു കോടിയിലെത്തിക്കുകയാണ് ലക്ഷ്യം.
സർക്കാർ സ്കൂളുകളിലെ വിദ്യാർഥികൾക്കുള്ള യൂണിഫോം തുന്നുന്നതിനുള്ള ചുമതല സ്വയംസഹായ സംഘങ്ങളെ ഏൽപ്പിച്ചിട്ടുണ്ട്. ഇതിലൂടെ പ്രതിവർഷം 150 മുതൽ 200 കോടി രൂപവരെ മൂല്യമുള്ള തൊഴിൽ അവസരങ്ങൾ വനിതകൾക്ക് ലഭിക്കുന്നുണ്ട്.
പെട്രോൾ പമ്പുകൾ, സൗരോർജ പദ്ധതികൾ തുടങ്ങിയ സംരംഭങ്ങളിലും വനിതാ സ്വയംസഹായ സംഘങ്ങളെ പങ്കാളികളാക്കിയിട്ടുണ്ട്.
സംസ്ഥാനത്ത് പുതുതായി 4.5 ലക്ഷം സാമൂഹിക സുരക്ഷാ പെൻഷനുകൾ അനുവദിച്ചതായും ഇതിൽ 3.5 ലക്ഷം അവിവാഹിതരായ സ്ത്രീകൾക്കും വിധവകൾക്കുമാണെന്നും മുഖ്യമന്ത്രി വ്യക്തമാക്കി. നെയ്ത്തുകാർക്കും കള്ളുചെത്തു തൊഴിലാളികൾക്കും പുതിയ പെൻഷനുകൾ അനുവദിച്ചിട്ടുണ്ട്.
കഴിഞ്ഞ 34 മാസത്തിനിടെ വനിതാ സ്വയംസഹായ സംഘങ്ങൾക്ക് ബാങ്കുകളുമായി ബന്ധിപ്പിച്ച് 79,000 കോടി രൂപയുടെ വായ്പകൾ ലഭ്യമാക്കാൻ സർക്കാരിന് കഴിഞ്ഞതായും അദ്ദേഹം അവകാശപ്പെട്ടു.
മുൻ പ്രധാനമന്ത്രി ഇന്ദിരാഗാന്ധിയുടെ ജന്മദിനമായ നവംബർ 19-ന് വനിതകൾക്ക് സൗജന്യ ഇന്ദിരമ്മ സാരികൾ വിതരണം ചെയ്യുന്ന രണ്ടാംഘട്ട പദ്ധതിക്ക് തുടക്കം കുറിക്കുമെന്നും രേവന്ത് റെഡ്ഡി അറിയിച്ചു.
വനിതകളോടുള്ള ആദരവിന്റെയും സഹോദരസ്നേഹത്തിന്റെയും പ്രതീകമായാണ് ഈ സമ്മാനവിതരണമെന്ന് അദ്ദേഹം പറഞ്ഞു.
തന്റെ രാഷ്ട്രീയജീവിതത്തിൽ ജില്ലാ പഞ്ചായത്ത് അംഗം, എം.എൽ.സി, എം.എൽ.എ, എം.പി എന്നീ നിലകളിൽ പ്രവർത്തിച്ച ശേഷമാണ് മുഖ്യമന്ത്രി പദത്തിലെത്തിയതെന്നും ഇനി ജീവിതത്തിലെ പ്രധാന ലക്ഷ്യം തെലങ്കാനയിലെ ഒരു കോടി വനിതകളെ സാമ്പത്തികമായി കോടീശ്വരികളാക്കുകയാണെന്നും രേവന്ത് റെഡ്ഡി കൂട്ടിച്ചേർത്തു.

Photo Courtesy - Google