തിരുവനന്തപുരം: ശബരിമലയിലെ സ്വർണ്ണപ്പാളികൾ കടത്തിയ സംഭവത്തിൽ അന്താരാഷ്ട്ര ബന്ധങ്ങൾ പുറത്തുവരുന്ന സാഹചര്യത്തിൽ അന്വേഷണം സിബിഐ ഏറ്റെടുക്കുന്നു. എൻഫോഴ്സ്‌മെന്റ് ഡയറക്ടറേറ്റിന് പിന്നാലെ സിബിഐയും എത്തുന്നതോടെ കേസിൽ നിർണ്ണായക വഴിത്തിരിവാകും. ബിജെപി സംസ്ഥാന അദ്ധ്യക്ഷൻ രാജീവ് ചന്ദ്രശേഖർ നൽകിയ ഹർജിയിൽ ഹൈക്കോടതി ദേവസ്വം ബെഞ്ച് സിബിഐയുടെ നിലപാട് തേടി. അടുത്ത സിറ്റിങ്ങിൽ സിബിഐ സന്നദ്ധത അറിയിക്കുന്നതോടെ അന്വേഷണം ഔദ്യോഗികമായി കൈമാറും.

​വിദേശബന്ധം:

 സിബിഐയുടെ ഇടപെടൽ അനിവാര്യം
​ഏകദേശം 500 കോടി രൂപയുടെ തട്ടിപ്പ് നടന്നതായാണ് ആരോപണം. മോഷ്ടിച്ച സ്വർണ്ണപ്പാളികൾ കടൽമാർഗം ദുബായിലെത്തിച്ചെന്നും അവിടെനിന്ന് ഒരു അറബ് സുൽത്താന്റെ ശേഖരത്തിലേക്ക് മാറിയെന്നും പ്രത്യേക അന്വേഷണ സംഘത്തിന് (എസ്.ഐ.ടി) മൊഴി ലഭിച്ചിട്ടുണ്ട്. ഇത്തരത്തിൽ വിദേശ രാജ്യങ്ങളിലേക്ക് നീളുന്ന അന്വേഷണത്തിന് ഇന്റർപോളിന്റെ സഹായം തേടാൻ സിബിഐക്ക് മാത്രമേ സാധിക്കൂ. എംബസികളിലെ ഐ.പി.എസ് ഉദ്യോഗസ്ഥരുടെ സഹായത്തോടെ ഗൂഢാലോചനയുടെ ചുരുളഴിക്കാനാണ് നീക്കം.
​എസ്.ഐ.ടിക്ക് കോടതിയുടെ കടുത്ത വിമർശനം
​നിലവിലെ അന്വേഷണ സംഘം പ്രതികളെ സംരക്ഷിക്കുന്ന നിലപാടാണ് സ്വീകരിക്കുന്നതെന്ന് ഹൈക്കോടതി രൂക്ഷമായി വിമർശിച്ചിരുന്നു. ബോർഡ് മുൻ അംഗങ്ങളിലേക്ക് അന്വേഷണം നീളാത്തതും പ്രതികളെ പിടികൂടുന്നതിൽ കാണിക്കുന്ന വിവേചനവും അന്വേഷണത്തിന്റെ വിശ്വാസ്യതയെ ബാധിച്ചതായി കോടതി നിരീക്ഷിച്ചു. ഇതിനു പിന്നാലെയാണ് സ്വർണം ഉരുക്കിയ ചെന്നൈ സ്മാർട്ട്ക്രിയേഷൻസ് സി.ഇ.ഒ പങ്കജ് ഭണ്ഡാരിയെയും സ്വർണം വാങ്ങിയ ബെല്ലാരിയിലെ ജൂവലറി ഉടമയെയും അറസ്റ്റ് ചെയ്തത്.
​വി.എസ്.എസ്.സി പരിശോധന നിർണ്ണായകം
​ശ്രീകോവിലിലെ യഥാർത്ഥ സ്വർണ്ണപ്പാളികൾ മാറ്റി പകരം ചെമ്പിൽ സ്വർണ്ണം പൂശിയ വ്യാജൻ സ്ഥാപിച്ചോ എന്ന കാര്യത്തിൽ കോടതിക്ക് സംശയമുണ്ട്. നിലവിലുള്ള പാളികളുടെ പഴക്കം കണ്ടെത്താനായി വി.എസ്.എസ്.സിയുടെ ലാബിൽ നടത്തുന്ന പരിശോധനാ ഫലം പുറത്തുവരുന്നതോടെ തട്ടിപ്പിന്റെ വ്യാപ്തി വ്യക്തമാകും.
​സിബിഐ അന്വേഷണം ആരംഭിക്കുന്നതോടെ കേരളത്തിലെ പ്രമുഖ രാഷ്ട്രീയ നേതാക്കളും ഉന്നത ഉദ്യോഗസ്ഥരും ഉൾപ്പെട്ട കള്ളപ്പണ ഇടപാടുകൾ പുറത്തുവരുമെന്നാണ് സൂചന. വിഗ്രഹങ്ങൾക്കും ദൈവീക ചിഹ്നങ്ങൾക്കും വിദേശത്തുള്ള ഉയർന്ന വില  മുതലെടുത്ത് നടന്ന ഈ വൻകൊള്ളയിൽ വരുംദിവസങ്ങളിൽ കൂടുതൽ അറസ്റ്റുകൾ ഉണ്ടായേക്കും.