വാഷിംഗ്ടൺ/ടെഹ്‌റാൻ: ഇറാനിലെ ഭരണകൂടത്തെ അട്ടിമറിക്കാൻ അമേരിക്കയും ഇസ്രായേലും ശ്രമിച്ചാൽ ഇസ്രായേലിന്റെ ആണവ കേന്ദ്രമായ ഡിമോണ തകർക്കുമെന്ന് ഇറാന്റെ മുന്നറിയിപ്പ്. ഇസ്രായേലും അമേരിക്കയും സംയുക്തമായി നടത്തുന്ന അതിശക്തമായ വ്യോമാക്രമണം അഞ്ചാം ദിവസത്തിലേക്ക് കടന്ന സാഹചര്യത്തിലാണ് ഇറാന്റെ ഔദ്യോഗിക വാർത്താ ഏജൻസിയായ ISNA സൈനിക ഉദ്യോഗസ്ഥരെ ഉദ്ധരിച്ച് ഈ വിവരം പുറത്തുവിട്ടത്.
ഇറാന്റെ പക്കൽ ആണവായുധങ്ങൾ ഇല്ലെന്ന് ഉറപ്പാക്കാനും ദീർഘദൂര ബാലിസ്റ്റിക് മിസൈൽ പദ്ധതികൾ തകർക്കാനുമാണ് 'ഓപ്പറേഷൻ എപ്പിക് ഫ്യൂറി' (Operation Epic Fury) എന്ന് പേരിട്ടിരിക്കുന്ന ഈ സൈനിക നീക്കമെന്ന് അമേരിക്ക വ്യക്തമാക്കി. ഇതിന് മറുപടിയായാണ് ഇസ്രായേലിലെ ഏറ്റവും സുരക്ഷിതമായ ആണവ ഗവേഷണ കേന്ദ്രമായ ഡിമോണയ്ക്ക് നേരെ ആക്രമണം നടത്തുമെന്ന് ഇറാൻ ഭീഷണി മുഴക്കിയിരിക്കുന്നത്.ലോകത്തെ 20 ശതമാനം എണ്ണ വിതരണവും നിയന്ത്രിക്കുന്ന ഹോർമുസ് കടലിടുക്കിന്റെ നിയന്ത്രണം ഏറ്റെടുക്കാൻ അമേരിക്കൻ സൈന്യം നീക്കം തുടങ്ങി. ഇന്ധന വിതരണം തടയാനുള്ള ഇറാന്റെ ശ്രമങ്ങളെ പരാജയപ്പെടുത്തുമെന്ന് വൈറ്റ് ഹൗസ് വക്താവ് കരോലിൻ ലീവിറ്റ് അറിയിച്ചു.കഴിഞ്ഞ രണ്ട് ദിവസത്തിനുള്ളിൽ 20-ലധികം ഇറാനിയൻ കപ്പലുകൾ അമേരിക്ക തകർത്തു. ഇറാനിയൻ മിസൈൽ ആക്രമണങ്ങളിൽ ഇസ്രായേലിൽ ഇതുവരെ 10 ലേറെ പേർ കൊല്ലപ്പെട്ടു.അടുത്ത ഏതാനും മണിക്കൂറുകൾക്കുള്ളിൽ ഇറാന്റെ ആകാശപരിധിയിൽ പൂർണ്ണ ആധിപത്യം നേടുമെന്ന് യുഎസ് പ്രതിരോധ സെക്രട്ടറി പീറ്റ് ഹെഗ്‌സെത്ത് പ്രഖ്യാപിച്ചു.ഇറാനിൽ ജനകീയ പ്രക്ഷോഭമുണ്ടാക്കി ഭരണകൂടത്തെ പുറത്താക്കാൻ ഇസ്രായേൽ ആഹ്വാനം നൽകിയിട്ടുണ്ട്. കൊല്ലപ്പെട്ട പരമോന്നത നേതാവ് ഖമേനിയുടെ മകൻ മോജ്തബ ഖമേനി അധികാരം ഏറ്റെടുത്തേക്കുമെന്ന റിപ്പോർട്ടുകൾ അമേരിക്കൻ രഹസ്യാന്വേഷണ ഏജൻസികൾ നിരീക്ഷിച്ചു വരികയാണ്. നിലവിൽ കരസേനയെ ഇറാനിലേക്ക് അയക്കാൻ പദ്ധതിയൊന്നുമില്ലെന്ന് അമേരിക്ക വ്യക്തമാക്കിയെങ്കിലും, യുദ്ധത്തിന് ശേഷമുള്ള ഇറാന്റെ കാര്യത്തിൽ പ്രസിഡന്റ് ഡൊണാൾഡ് ട്രംപ് ചർച്ചകൾ തുടങ്ങിക്കഴിഞ്ഞു.
​സംഘർഷം കടുക്കുമ്പോഴും ഇറാന്റെ ആണവ കേന്ദ്രങ്ങളിൽ റേഡിയേഷൻ ചോർച്ചാ ഭീഷണിയില്ലെന്ന് അന്താരാഷ്ട്ര ആണവോർജ്ജ ഏജൻസി (IAEA) അറിയിച്ചു. പശ്ചിമേഷ്യയെയാകെ വലിയൊരു പ്രതിസന്ധിയിലേക്ക് തള്ളിവിടുന്നതാണ് നിലവിലെ സാഹചര്യങ്ങൾ.