വിഴിഞ്ഞം തുറമുഖത്തിന്റെ ഫുൾ ക്രെഡിറ്റ് സിപിഎമ്മിനും ഇടത് സർക്കാരുകൾക്കും നൽകി സിപിഎം മുഖപത്രത്തിന്റെ എഡിറ്റോറിയൽ.  ഇ കെ നായനാർ സർക്കാരിന്റെ കാലത്താണ് വിഴിഞ്ഞം പദ്ധതിയുടെ തുടക്കമെന്നാണ് ദേശാഭിമാനിയുടെ മുഖപത്രത്തിൽ പറയുന്നത്. യുഡിഎഫ് സർക്കാർ കരാർ ഒപ്പിട്ടെന്ന് ലേഖനം സമ്മതിക്കുന്നുണ്ടെങ്കിലും അത് സിപിഎമ്മിന്റെ നിരന്തര സമരത്തിന്റെ ഫലമെന്നാണ് ​​ദേശാഭിമാനി പറയുന്നത്. വിഴിഞ്ഞം പദ്ധതി യാഥാർത്ഥ്യമാകാൻ കാരണം മുൻ മുഖ്യമന്ത്രി ഉമ്മൻ ചാണ്ടിയാണെന്നും തുറമുഖത്തിന് ഉമ്മൻചാണ്ടിയുടെ പേരിടണമെന്നുമുള്ള കോൺ​ഗ്രസ് നേതാക്കളുടെ അവകാശവാദങ്ങൾക്കിടെയാണ് ദേശാഭിമാനി തുറമുഖം സാധ്യമായത് സിപിഎം ഉള്ളതിനാലാണെന്ന് സമർത്ഥിക്കുന്നത്. 

വിഴിഞ്ഞം തുറമുഖ സാധ്യതകൾ പഠിക്കാൻ സമിതിയെ നിയോഗിച്ചത് 1996-ലെ എൽഡിഎഫ് സർക്കാരാണെന്ന് എഡിറ്റോറിയലിൽ ചൂണ്ടിക്കാട്ടുന്നു. വിഴിഞ്ഞം പദ്ധതി സാധ്യമായത് സിപിഎം നിരന്തരം സമരം ചെയ്തതിന്റെ ഫലമായാണെന്നും ദേശാഭിമാനി എഡിറ്റോറിയലിൽ പറയുന്നു. ഉമ്മൻചാണ്ടി മുഖ്യമന്ത്രിയായപ്പോൾ പദ്ധതിക്കായി ഒന്നുംതന്നെ ചെയ്തില്ലെന്നും ദേശാഭിമാനി ലേഖനത്തിൽ കുറ്റപ്പെടുത്തുന്നു. 

തുറമുഖ സാധ്യതകൾ പഠിക്കാൻ 1996-ൽ എൽഡിഎഫ് സർക്കാർ സമിതിയെ നിയോഗിച്ചു. 2001-ലെ ആന്റണി സർക്കാർ നടപടിക്രമങ്ങൾ പൂർത്തിയാക്കാതെയാണ് ടെൻഡർ വിളിച്ചത്. ഇതോടെ കേന്ദ്രം സുരക്ഷാ അനുമതി നിഷേധിച്ചു. 2006-ൽ വിഎസ് അച്യുതാനന്ദൻ സർക്കാർ അനുമതി തേടിയപ്പോഴും സർക്കാർ അത് നൽകാൻ തയ്യാറായില്ല. ഉമ്മൻചാണ്ടി മുഖ്യമന്ത്രിയായപ്പോൾ പദ്ധതിക്കായി ഒന്നുംതന്നെ ചെയ്തില്ല. പിന്നീട് സിപിഐഎം നിരന്തരം സമരം ചെയ്തതിന്റെ ഫലമായാണ് യുഡിഎഫ് സർക്കാർ കരാർ ഒപ്പിട്ടത് എന്നാണ് ദേശാഭിമാനിയുടെ എഡിറ്റോറിയലിൽ പറയുന്നത്.