കേരളത്തിന്റെ സ്വപ്ന പദ്ധതിയായ വിഴിഞ്ഞം തുറമുഖം പ്രധാനമന്ത്രി നരേന്ദ്രമോദി രാജ്യത്തിന് സമർപ്പിച്ചു. വിഴിഞ്ഞം തുറമുഖത്തിൽ സംഘടിപ്പിച്ച പ്രൗഢ​ഗംഭീരമായ ചടങ്ങിലാണ് മോദി വിഴിഞ്ഞം അന്താരാഷ്ട്ര തുറമുഖത്തിന്റെ മമ്മീഷനിങ് നിർവ​​ഹിച്ചത്. വിഴിഞ്ഞത്ത് വലിയ കപ്പലുകൾ അടുക്കുമെന്ന് ചൂണ്ടിക്കാട്ടിയ പ്രധാനമന്ത്രി, ചരക്ക് നീക്കത്തിനായി രാജ്യത്തിന് പുറത്തേക്ക് ഒഴുകിയിരുന്ന പണം ഇനി ലാഭിക്കാൻ കഴിയുമെന്നും വ്യക്തമാക്കി.

ഇതുവരെ 75 ശതമാനത്തിൽ അധികം ട്രാൻഷിപ്പ്‌മെന്റ് രാജ്യത്തിന് പുറത്തുള്ള തുറമുഖങ്ങളിലാണ് നടന്നിരുന്നത്. ഇത് വലിയ നഷ്ടമുണ്ടാക്കി.ഇനി ഇതിന് മാറ്റം വരും. പുറത്തേക്ക് ഒഴുകിയിരുന്ന പണം കേരളത്തിനും രാജ്യത്തിനും ജനങ്ങൾക്കും സാമ്പത്തിക സുസ്ഥിരത കെട്ടിപ്പടുക്കുന്നതിന് സഹായകമാകും – പ്രധാനമന്ത്രി പറഞ്ഞു. 

വിഴിഞ്ഞം പോർട്ട്  നിർമാണം വേഗം പൂർത്തിയാക്കിയ അദാനിയേയും പ്രധാനമന്ത്രി പ്രശംസിച്ചു. ഗുജറാത്തിൽ 30 കൊല്ലമായി അദാനി പോർട്ട് പ്രവർത്തിക്കുന്നുണ്ടെന്നും എന്നാൽ വലിയ പോർട്ട് നിർമിച്ചത് കേരളത്തിലാണെന്നും മോ​ദി ചൂണ്ടിക്കാട്ടി. അതിൽ ഗുജറാത്ത് ജനതയുടെ പരാതി അദാനി കേൾക്കേണ്ടി വരുമെന്നും അദ്ദേഹം കൂട്ടിച്ചേർത്തു. 

മുഖ്യമന്ത്രി പിണറായി വിജയന്റെയും ഗൗതം അദാനിയുടെയും ജനപ്രനിധികളുടെയും സാന്നിധ്യത്തിലായിരുന്നു കമ്മിഷനിങ്. പോർട്ട് ഓപ്പറേഷൻ സെന്റർ നടന്നു കണ്ട ശേഷം 11 മണിയോടെ മോദി ഉദ്ഘാടന വേദിയിൽ എത്തി. പഹൽഗാം ഭീകരാക്രമണത്തിൽ കൊല്ലപ്പെട്ടവർക്ക് ആദരാഞ്ജലി അർപ്പിച്ചാണ് മുഖ്യമന്ത്രി പിണറായി വിജയൻ പ്രസംഗം ആരംഭിച്ചത്. നാടിന്റെ ഒരുമയും ജനങ്ങളുടെ ഐക്യവുമാണ് ഇത്തരം പദ്ധതികൾ നടപ്പാക്കാൻ കരുത്താകുന്നതെന്നു മുഖ്യമന്ത്രി പറഞ്ഞു. മൂന്നാം മിലെനിയത്തിലേക്കുള്ള രാജ്യത്തിന്റെ മഹാകവാടം തുറക്കലാണ് വിഴിഞ്ഞം കമ്മിഷനങ്ങിലൂടെ നടക്കുന്നതെന്നും അദ്ദേഹം പറഞ്ഞു.