തിരുവനന്തപുരം: വിഴിഞ്ഞം ഭൂഗർഭ റയിൽപാത യാഥാർത്ഥ്യമാകുന്നതോടെ ഇന്ത്യയുടെ റയിൽവെ ഭൂപടത്തിലും വിഴിഞ്ഞത്തിന് സുപ്രധാന സ്ഥാനം കൈവരും. രാജ്യത്തെ മൂന്നാമത്തെ വലിയ ഭൂഗർഭ റെയിൽവേ ലൈനാകും വിഴിഞ്ഞത്തേത്. ഉദംപൂർ-ശ്രീനഗർ-ബാരാമുള്ള റെയിൽ ലിങ്കിന്റെ ഭാഗമായ 12.75 കിലോമീറ്റർ തുരങ്കവും 11.2 കിലോമീറ്റർ നീളമുള്ള പിർ പഞ്ചൽ തുരങ്കവുമാകും വിഴിഞ്ഞം ഭൂഗർഭ റയിൽപാതയെക്കാൾ നിളമുള്ളവ. 10.76 കിലോമീറ്റർ നീളത്തിലാകും വിഴിഞ്ഞം ഭൂഗർഭ റയിൽ. റെയിൽവേ ലൈൻ ആരംഭ, അവസാന പോയിന്റുകൾ ഒഴികെ പൂർണ്ണമായും ഭൂമിക്കടിയിലൂടെയായിരിക്കും. അതായത്, 9.5 കിലോമീറ്റർ പൂർണമായും ഭൂമിക്കടിയിൽ തന്നെയായിരിക്കും.
ബാലരാമപുരം മുതൽ വിഴിഞ്ഞം തുറമുഖം വരെയുള്ള ഭൂഗർഭ റെയിൽവേ പാതയുടെ നിർമ്മാണം ഉടൻ ആരംഭിക്കുമെന്നാണ് റിപ്പോർട്ട്. കൊങ്കൺ കോർപ്പറേഷൻ തയ്യാറാക്കിയ പദ്ധതി രേഖ ബുധനാഴ്ച മന്ത്രിസഭ അംഗീകരിച്ചു. അദാനിയുമായുള്ള കരാർ പ്രകാരം, സംസ്ഥാന സർക്കാരാണ് ഭൂഗർഭ റെയിൽ നിർമ്മിക്കുക. കൊങ്കൺ റെയിൽ കോർപ്പറേഷനാണ് നിർമ്മാണ ചുമതല. 2028 ഡിസംബറിൽ ഇത് പൂർത്തിയാകുമെന്നാണ് റിപ്പോർട്ട്.
1482.92 കോടി രൂപയുടെ പദ്ധതിക്കാണ് സംസ്ഥാന സർക്കാർ ഭരണാനുമതി നല്‍കിയത്. 2028 ഡിസംബറിന് മുന്‍പ് റെയില്‍ പാത ഗതാഗതയോഗ്യമാക്കുകയാണ് ലക്ഷ്യം.
