ദോഹ: ഖത്തറിൽ റെസിഡൻസ് പെർമിറ്റ് (ഐഡി) റദ്ദാക്കുന്നവർക്ക് രാജ്യം വിടുന്നതിനായി അനുവദിച്ചിരുന്ന സമയപരിധി രണ്ടാഴ്ചയായി കുറച്ചതായി ആഭ്യന്തര മന്ത്രാലയം (MoI) അറിയിച്ചു. മുൻപ് ഇതിനായി 30 ദിവസത്തെ സമയം അനുവദിച്ചിരുന്നുവെങ്കിൽ നിലവിൽ ഇത് 14 ദിവസമാണെന്ന് എയർപോർട്ട് പാസ്‌പോർട്ട് ഡിപ്പാർട്ട്‌മെന്റിലെ ക്യാപ്റ്റൻ അലി അഹമ്മദ് അലി അൽ കുവാരി വ്യക്തമാക്കി. ഈ പരിധി കഴിഞ്ഞും രാജ്യത്ത് തുടരുന്നവരിൽ നിന്നും പ്രതിദിനം 10 റിയാൽ വീതം പിഴ ഈടാക്കും.
ആഭ്യന്തര മന്ത്രാലയത്തിന്റെ പബ്ലിക് റിലേഷൻസ് ഡിപ്പാർട്ട്‌മെന്റ് സംഘടിപ്പിച്ച 'സുരക്ഷിത യാത്ര' (Safe Travels) എന്ന വെബിനാറിലാണ് പ്രവാസികൾക്കും സന്ദർശകർക്കുമായി അധികൃതർ സുപ്രധാന നിർദ്ദേശങ്ങൾ പങ്കുവെച്ചത്.രാജ്യത്ത് സന്ദർശക വിസയിൽ (Visit Visa) എത്തുന്നവർ തങ്ങളുടെ പാസ്‌പോർട്ടിൽ പതിച്ചിട്ടുള്ള സ്റ്റിക്കറിലെ തീയതിയും അനുവദനീയമായ ദിവസങ്ങളും കൃത്യമായി പരിശോധിക്കണമെന്ന് മന്ത്രാലയം ഓർമ്മിപ്പിച്ചു. വിസാ കാലാവധി കഴിഞ്ഞും രാജ്യത്ത് തുടരുന്നവർക്ക് (Overstay) പ്രതിദിനം 200 റിയാൽ വീതം കനത്ത പിഴ ചുമത്തും. പലരും വിസാ കാലാവധി കൃത്യമായി ശ്രദ്ധിക്കാത്തതിനാലാണ് ഇത്തരം വലിയ പിഴകളിലേക്ക് എത്തുന്നതെന്നും അധികൃതർ ചൂണ്ടിക്കാട്ടി.
