കുംഭമേളയിലൂടെ വൈറലായ സോഷ്യൽ മീഡിയ താരവും നടിയുമായ പെൺകുട്ടിയുടെ വിവാഹവുമായി ബന്ധപ്പെട്ട് ഗുരുതരമായ നിയമലംഘനം പുറത്തുവന്നു. വിവാഹസമയത്ത് പെൺകുട്ടിക്ക് പ്രായപൂർത്തിയായിരുന്നില്ലെന്നതാണ് ഇപ്പോൾ സ്ഥിരീകരിച്ചിരിക്കുന്നത്. നാഷണൽ കമ്മിഷൻ ഫോർ ഷെഡ്യൂൾഡ് ട്രൈബ്‌സ് (NCST) കേരളത്തിലും മധ്യപ്രദേശിലും നടത്തിയ അന്വേഷണത്തിലാണ് ഈ നിർണായക കണ്ടെത്തൽ. ഇതിന്റെ അടിസ്ഥാനത്തിൽ, പെൺകുട്ടിയുടെ ഭർത്താവ് ഫർമാൻ ഖാനെതിരെ മധ്യപ്രദേശിലെ ഖാർഗോൺ ജില്ലയിലെ മഹേശ്വർ പൊലീസ് സ്റ്റേഷനിൽ പോക്സോ നിയമപ്രകാരം കേസ് രജിസ്റ്റർ ചെയ്തതായി ദേശീയ മാധ്യമങ്ങൾ റിപ്പോർട്ട് ചെയ്യുന്നു. വിവാഹം കേരളത്തിൽവെച്ചാണ് നടന്നത്.

മന്ത്രി വി. ശിവൻകുട്ടി ഉൾപ്പെടെ നിരവധി പ്രമുഖരുടെ സാന്നിധ്യത്തിലായിരുന്നു ഫർമാൻ ഖാൻ പെൺകുട്ടിയെ വിവാഹം കഴിച്ചത്. എന്നാൽ വിവാഹവുമായി ബന്ധപ്പെട്ട് പ്രായത്തെക്കുറിച്ചുള്ള സംശയങ്ങൾ ഉയർന്നതോടെയാണ് അന്വേഷണം ആരംഭിച്ചത്. എൻസിഎസ്ടി ചെയർമാൻ അന്തർ സിങ് ആര്യയുടെ നേതൃത്വത്തിൽ നടത്തിയ അന്വേഷണത്തിൽ പെൺകുട്ടി പാർദി ഗോത്രവിഭാഗത്തിൽപ്പെട്ടയാളാണെന്നും, വിവാഹസമയത്ത് അവൾ പ്രായപൂർത്തിയായിരുന്നില്ലെന്നും വ്യക്തമായി. ആശുപത്രി രേഖകൾ പ്രകാരം 2009 ഡിസംബർ 30നാണ് ജനനം. അതിനാൽ 2026 മാർച്ച് 11ന് നടന്ന വിവാഹസമയത്ത് പ്രായം 16ൽ താഴെയായിരുന്നു.

അന്വേഷണത്തിൽ മറ്റൊരു ഗുരുതരമായ കണ്ടെത്തലും പുറത്തുവന്നു — വ്യാജ ജനന സർട്ടിഫിക്കറ്റ് ഉപയോഗിച്ച് പെൺകുട്ടിയെ പ്രായപൂർത്തിയായതായി കാണിച്ചാണ് വിവാഹം നടത്തിയത്. ഈ വ്യാജ രേഖകൾ റദ്ദാക്കാൻ ബന്ധപ്പെട്ട അധികാരികൾ നിർദേശം നൽകിയിട്ടുണ്ട്.

കേരളത്തിലെ ഒരു ഗ്രാമപഞ്ചായത്ത് ഓഫീസിൽ ഈ വ്യാജ രേഖകളുടെ അടിസ്ഥാനത്തിലാണ് വിവാഹം രജിസ്റ്റർ ചെയ്തതെന്നും കണ്ടെത്തി. വിവാഹം നടന്ന ക്ഷേത്രത്തിലെ അധികൃതർ ദമ്പതികൾ നൽകിയ ആധാർ വിവരങ്ങൾ മാത്രമാണ് പരിശോധിച്ചതെന്നും റിപ്പോർട്ടുകളിൽ പറയുന്നു.

അതിനിടെ, പെൺകുട്ടിയുടെ ഗോത്ര പശ്ചാത്തലമടക്കം കണക്കിലെടുത്ത് പോക്സോ നിയമം, ഭാരതീയ ന്യായ സംഹിത, പട്ടികജാതി/പട്ടികവർഗ്ഗ (അതിക്രമങ്ങൾ തടയൽ) നിയമം എന്നിവ പ്രകാരമുള്ള വിവിധ വകുപ്പുകൾ പോലീസ് ഫർമാൻ ഖാനെതിരെ ചുമത്തിയിട്ടുണ്ട്. ചില സംഘടനകളുടെയും വ്യക്തികളുടെയും പങ്കാളിത്തം സംബന്ധിച്ച ആരോപണങ്ങളോടെ ഈ കേസ് രാഷ്ട്രീയ ശ്രദ്ധയും നേടുന്നുണ്ട്. നാഷണൽ കമ്മിഷൻ ഫോർ ഷെഡ്യൂൾഡ് ട്രൈബ്‌സ് കേരളത്തിന്റെയും മധ്യപ്രദേശിന്റെയും പോലീസ് മേധാവിമാർക്ക് സമൻസ് അയച്ചിട്ടുണ്ട്. ഏപ്രിൽ 22-ന് ഡൽഹിയിൽ കമ്മീഷന് മുന്നിൽ ഹാജരാകാനാണ് അവരോട് നിർദേശിച്ചിട്ടുള്ളത്. ഓരോ മൂന്നു ദിവസത്തിലും വിശദമായ പുരോഗതി റിപ്പോർട്ടുകൾ സമർപ്പിക്കാനും കേസിൽ കർശന നിരീക്ഷണം ഉറപ്പാക്കാനും കമ്മീഷൻ ആവശ്യപ്പെട്ടിട്ടുണ്ട്. സംഭവം വലിയ വിവാദമായതോടെ കൂടുതൽ നിയമനടപടികൾ ഉണ്ടാകാനിടയുണ്ടെന്നാണ് സൂചന.