ദോഹ: ഖത്തറിലെ ട്രാവൽ, എയർ ഫ്രൈറ്റ് ഓഫീസുകളിൽ സിവിൽ ഏവിയേഷൻ ജനറൽ അതോറിറ്റി നടത്തിയ മിന്നൽ പരിശോധനയെത്തുടർന്ന് നിരവധി സ്ഥാപനങ്ങൾക്കെതിരെ കർശന നടപടി. അംഗീകൃത നിയമങ്ങൾ പാലിക്കാത്തതിനെത്തുടർന്ന് ചില ഓഫീസുകൾ അടച്ചുപൂട്ടുകയും അവയുടെ ലൈസൻസുകൾ റദ്ദാക്കി ഔദ്യോഗിക റെക്കോർഡുകളിൽ നിന്ന് നീക്കം ചെയ്യുകയും ചെയ്തു.
അതോറിറ്റിക്ക് കീഴിലുള്ള എയർ ട്രാൻസ്‌പോർട്ട് ഡിപ്പാർട്ട്‌മെന്റാണ് പരിശോധനകൾക്ക് നേതൃത്വം നൽകിയത്. ട്രാവൽ ഏജൻസികൾ നിലവിലുള്ള നിയന്ത്രണങ്ങൾ പാലിക്കുന്നുണ്ടോ എന്നും സുതാര്യമായ രീതിയിലാണോ പ്രവർത്തനം എന്നും ഉറപ്പുവരുത്തുകയായിരുന്നു പരിശോധനയുടെ ലക്ഷ്യം.പരിശോധനയിൽ പല സ്ഥാപനങ്ങളും നിശ്ചിത മാനദണ്ഡങ്ങൾ ലംഘിച്ചതായി കണ്ടെത്തി. നിയമലംഘനത്തിന്റെ ഗൗരവം അനുസരിച്ച് പിഴ ചുമത്തുകയോ, പ്രവർത്തനം നിർത്തിവെക്കാൻ ആവശ്യപ്പെടുകയോ ചെയ്തിട്ടുണ്ട്.നിയമങ്ങൾ പൂർണ്ണമായും അവഗണിച്ച ഓഫീസുകളെയാണ് അടച്ചുപൂട്ടിയത്. ഉപഭോക്താക്കളുടെ അവകാശങ്ങൾ സംരക്ഷിക്കുന്നതിനും വ്യോമഗതാഗത മേഖലയുടെ കാര്യക്ഷമത വർദ്ധിപ്പിക്കുന്നതിനുമാണ് ഈ നടപടിയെന്ന് അതോറിറ്റി വ്യക്തമാക്കി.
വരും ദിവസങ്ങളിലും രാജ്യത്തുടനീളം ഇത്തരത്തിലുള്ള പരിശോധനകൾ തുടരുമെന്ന് അധികൃതർ അറിയിച്ചു. മുൻകൂട്ടി അറിയിക്കാതെയുള്ള സന്ദർശനങ്ങളിലൂടെ സേവനങ്ങളുടെ ഗുണനിലവാരം ഉറപ്പാക്കും.
നിയമങ്ങൾ കർശനമായി പാലിക്കണമെന്നും വീഴ്ചകൾ വരുത്തിയിട്ടുള്ള സ്ഥാപനങ്ങൾ ഉടനടി തിരുത്തലുകൾ വരുത്തണമെന്നും സിവിൽ ഏവിയേഷൻ അതോറിറ്റി മുന്നറിയിപ്പ് നൽകി. വ്യോമഗതാഗത മേഖലയിൽ ഉപഭോക്താക്കളുടെ വിശ്വാസം നിലനിർത്താൻ ക്രമീകൃതമായ പ്രവർത്തന അന്തരീക്ഷം അനിവാര്യമാണെന്നും അധികൃതർ കൂട്ടിച്ചേർത്തു.
