ഇന്ന് വിനായക ചതുർത്ഥി. ഗണപതിയുടെ ജന്മദിനമായി വിശ്വാസികൾ ആചരിക്കുന്ന വിനായക ചതുർത്ഥിക്ക് ഭക്തിപൂർവമായ ചടങ്ങുകളാണ് രാജ്യത്തിന്റെ വിവിധ ഭാഗങ്ങളിൽ നടക്കുന്നത്. ചിങ്ങമാസത്തിലെ കറുത്തവാവ് കഴിഞ്ഞെത്തുന്ന വെളുത്തപക്ഷ ചതുർത്ഥി ദിവസമാണ് വിനായക ചതുർത്ഥി അഥവാ ഗണേശ ചതുർത്ഥിയായി ആചരിക്കുന്നത്.
വിഘ്നങ്ങൾ നീക്കി പുതിയ തുടക്കങ്ങൾക്ക് അനുഗ്രഹം നൽകുന്ന ദേവനായാണ് ഗണപതിയെ വിശ്വാസികൾ കാണുന്നത്. അതുകൊണ്ടുതന്നെ വീടുകളിലും ക്ഷേത്രങ്ങളിലും ഈ ദിവസം പ്രത്യേക പൂജകളും വഴിപാടുകളും നടത്തുന്നു. ഗണപതിയുടെ അനുഗ്രഹത്തോടെ പുതിയ സംരംഭങ്ങൾക്കും ജീവിതത്തിലെ പുതിയ അധ്യായങ്ങൾക്കും വിജയമുണ്ടാകുമെന്നാണ് വിശ്വാസം.
കേരളത്തിലും വിനായക ചതുർത്ഥിക്ക് പ്രത്യേക പ്രാധാന്യമുണ്ട്. തിരുവനന്തപുരം പഴവങ്ങാടി ഗണപതി ക്ഷേത്രം, കൊട്ടാരക്കര ഗണപതി ക്ഷേത്രം, മള്ളിയൂർ ഗണപതി ക്ഷേത്രം, എറണാകുളം ഇടപ്പള്ളി ഗണപതി ക്ഷേത്രം തുടങ്ങിയ പ്രമുഖ ക്ഷേത്രങ്ങളിൽ ദിനാചരണങ്ങൾ ഭക്തിനിർഭരമായി നടക്കാറുണ്ട്.
ഗണപതിയുടെ ജനനത്തിന് പിന്നിലെ ഐതിഹ്യം
വിനായക ചതുർത്ഥിയുമായി ബന്ധപ്പെട്ട പ്രധാന വിശ്വാസങ്ങളിലൊന്നാണ് ഗണപതിയുടെ ജനനകഥ. ഒരിക്കൽ പാർവതീദേവി കുളിക്കാൻ പോകുന്നതിനിടെ തന്റെ ശരീരത്തിൽനിന്നുള്ള ചന്ദനപ്പൊടി ഉപയോഗിച്ച് ഒരു ബാലനെ സൃഷ്ടിച്ചെന്നാണ് ഐതിഹ്യം. തന്റെ കാവൽക്കാരനായി നിയോഗിച്ച ബാലനോട് ആരെയും അകത്തേക്ക് കടത്തിവിടരുതെന്നും ദേവി നിർദേശിച്ചു.
ഇതിനിടെ അവിടെയെത്തിയ പരമശിവൻ അകത്തേക്ക് പ്രവേശിക്കാൻ ശ്രമിച്ചു. എന്നാൽ പാർവതിയുടെ നിർദേശം അനുസരിച്ച ബാലൻ ശിവനെ തടഞ്ഞു. ഇതോടെ പ്രകോപിതനായ ശിവൻ ത്രിശൂലം ഉപയോഗിച്ച് ബാലന്റെ ശിരഃഛേദം ചെയ്തു.
സംഭവമറിഞ്ഞ പാർവതീദേവി ദുഃഖിതയായി. ബാലനെ പുനർജീവിപ്പിക്കണമെന്ന് അവർ ശിവനോട് ആവശ്യപ്പെട്ടു. പാർവതിയുടെ ദുഃഖം കണ്ട ശിവൻ തന്റെ ഭൃത്യന്മാരോട് വടക്കോട്ട് തലവെച്ച് കിടക്കുന്ന ആദ്യ ജീവിയുടെ തല കൊണ്ടുവരാൻ ആവശ്യപ്പെട്ടു.
അവർ കണ്ടെത്തിയത് ഒരു ആനയെയായിരുന്നു. ആനയുടെ തല കൊണ്ടുവന്ന് ബാലന്റെ ശരീരത്തിൽ സ്ഥാപിച്ചതോടെ ശിവൻ അവനെ പുനർജീവിപ്പിച്ചു. തുടർന്ന് ഗണപതി എന്ന പേര് നൽകി, വിഘ്നനിവാരകനായി വാഴ്ത്തുകയും എല്ലാ ശുഭകാര്യങ്ങൾക്കും ആരാധനയിൽ ആദ്യം സ്ഥാനം നൽകുകയും ചെയ്തു എന്നാണ് ഐതിഹ്യം.
ഗണപതിയുടെ ഈ പുനർജന്മത്തെ അനുസ്മരിക്കുന്ന ദിനമായാണ് വിനായക ചതുർത്ഥി ആചരിക്കുന്നത്. ഗണപതിയോടുള്ള ഭക്തിയും സമർപ്പണവും പ്രകടിപ്പിക്കാനും വിഘ്നങ്ങൾ അകറ്റി ജീവിതത്തിൽ ഐശ്വര്യവും വിജയവും നേടാനുമുള്ള ദിനമായും വിശ്വാസികൾ ഈ ആഘോഷത്തെ കാണുന്നു.
