കൊച്ചി: അനധികൃത പണപ്പിരിവും സാമ്പത്തിക ക്രമക്കേടുകളും സംബന്ധിച്ച പരാതിയിൽ ജിഎസ്ടി ജോയിന്റ് കമ്മീഷണർക്കെതിരെ വിജിലൻസിന്റെ മിന്നൽ പരിശോധന. കൊച്ചി തേവരയിലെ ജിഎസ്ടി ജോയിന്റ് കമ്മീഷണർ ഓഫീസിലും ഉദ്യോഗസ്ഥ പ്രജനി രാജന്റെ പച്ചാളം ഇരട്ടക്കുളങ്ങരയിലെ രണ്ട് വീടുകളിലുമാണ് വിജിലൻസ് സംഘം ഒരേസമയം പരിശോധന നടത്തിയത്.

പരിശോധനയിൽ കണക്കിൽപ്പെടാത്ത 14 ലക്ഷം രൂപയും 788 യുഎസ് ഡോളറും കണ്ടെത്തി. പിടിച്ചെടുത്ത യുഎസ് ഡോളറിന് ഏകദേശം 75,000 രൂപയുടെ മൂല്യമുണ്ടെന്ന് വിജിലൻസ് അറിയിച്ചു.

ശനിയാഴ്ച രാവിലെ 7.45ഓടെയാണ് പരിശോധന ആരംഭിച്ചത്. ഏകദേശം 13 മണിക്കൂറിന് ശേഷം രാത്രി ഒൻപത് മണിയോടെയാണ് റെയ്ഡ് പൂർത്തിയായത്. വിജിലൻസ് സ്പെഷ്യൽ സെൽ എസ്പി എം.ജെ. സോജൻ, ഡിവൈഎസ്പി എ.എൽ. യേശുദാസ് എന്നിവരുടെ നേതൃത്വത്തിലുള്ള സംഘമാണ് പരിശോധന നടത്തിയത്.

ജോയിന്റ് കമ്മീഷണർക്കെതിരെ നേരത്തെ തന്നെ നിരവധി പരാതികൾ വിജിലൻസിന് ലഭിച്ചിരുന്നതായാണ് വിവരം. ഇതിന്റെ അടിസ്ഥാനത്തിൽ അന്വേഷണം നടത്തിയ സംഘം മൂവാറ്റുപുഴ വിജിലൻസ് കോടതിയിൽനിന്ന് വാറന്റ് നേടിയ ശേഷമാണ് പരിശോധന നടത്തിയത്.

കൊച്ചി നഗരത്തിലെ ചില ബാർ ഹോട്ടലുകളുമായി ബന്ധപ്പെട്ട ജിഎസ്ടി ഇടപാടുകളിൽ ഗുരുതരമായ ക്രമക്കേടുകൾ നടക്കുന്നതായും വിജിലൻസിന് വിവരങ്ങൾ ലഭിച്ചിരുന്നു. ഇതുമായി ബന്ധപ്പെട്ട് ഉദ്യോഗസ്ഥ വിജിലൻസിന്റെ നിരീക്ഷണത്തിലായിരുന്നുവെന്നാണ് സൂചന.

2014 മുതൽ 2024 വരെയുള്ള കാലയളവിൽ ഏകദേശം രണ്ടേമുക്കാൽ കോടി രൂപയുടെ അനധികൃത സ്വത്ത് സമ്പാദിച്ചതായി വിജിലൻസിന്റെ പ്രാഥമിക പരിശോധനയിൽ കണ്ടെത്തിയിരുന്നു. ഈ വിവരങ്ങളുടെ അടിസ്ഥാനത്തിലാണ് വിശദമായ പരിശോധനയ്ക്കായി കോടതിയിൽനിന്ന് വാറന്റ് നേടിയതെന്നും വിജിലൻസ് വ്യക്തമാക്കി.

അതിനിടെ, ജിഎസ്ടി വകുപ്പിൽ വരാനിരിക്കുന്ന സ്ഥലംമാറ്റത്തിൽ എറണാകുളത്ത് തന്നെ തുടരാനുള്ള ശ്രമങ്ങൾ ഉദ്യോഗസ്ഥ നടത്തിയിരുന്നതായും സഹപ്രവർത്തകർ പറഞ്ഞു. ജിഎസ്ടി ഓഫീസിലെ ഇടതുപക്ഷ സംഘടനാ പ്രവർത്തനങ്ങളുമായി ബന്ധപ്പെട്ട് സജീവമായിരുന്ന ഉദ്യോഗസ്ഥയാണെന്നും ജീവനക്കാർ ചൂണ്ടിക്കാട്ടി.

സമീപകാലത്ത് ജിഎസ്ടി ഉദ്യോഗസ്ഥരുടെ ഓഫീസുകളിലും വീടുകളിലും നടന്ന ശ്രദ്ധേയമായ വിജിലൻസ് പരിശോധനകളിലൊന്നാണ് ഇത്. പിടിച്ചെടുത്ത പണത്തിന്റെയും വിദേശനാണ്യത്തിന്റെയും ഉറവിടം ഉൾപ്പെടെ ഉദ്യോഗസ്ഥയുടെ സാമ്പത്തിക ഇടപാടുകൾ സംബന്ധിച്ച് വരും ദിവസങ്ങളിൽ കൂടുതൽ വിശദമായ അന്വേഷണം നടത്താനാണ് വിജിലൻസിന്റെ നീക്കം.