മലപ്പുറം: മുസ്ലീം ലീഗിനെതിരെ വീണ്ടും ഗുരുതര ആരോപണങ്ങളുമായി എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ. മലപ്പുറം, വയനാട്, കാസർകോട് ജില്ലകളിൽ എസ്എൻഡിപിക്ക് വിദ്യാഭ്യാസ സ്ഥാപനങ്ങൾ ഇല്ലെന്ന പരാമർശം സംബന്ധിച്ച് വിശദീകരിക്കവെയാണ് ലീഗിനെതിരെ രൂക്ഷവിമർശനം ഉയർത്തിയത്. മറ്റൊരു മാറാട് കലാപമാണ് ലീഗ് ലക്ഷ്യമിടുന്നത് എന്നായിരുന്നു വെള്ളാപ്പള്ളിയുടെ പരാമർശം.
മലപ്പുറം ജില്ലയിൽ എസ്എൻഡിപിക്ക് ഒരു അൺഎയ്ഡഡ് കോളേജ് മാത്രമാണുള്ളതെന്നും അതേസമയം മുസ്‌ലിം ലീഗിന് 48 എയ്ഡഡ് കോളേജുകൾ പ്രവർത്തിക്കുന്നുണ്ടെന്നും വെള്ളാപ്പള്ളി പറഞ്ഞു. വിദ്യാഭ്യാസ സ്ഥാപനങ്ങളുടെ കാര്യത്തിൽ ലീഗ് അധികാരത്തിലിരുന്ന കാലത്ത് സാമൂഹിക നീതി ഉറപ്പാക്കിയിട്ടുണ്ടോയെന്ന് ആത്മപരിശോധന നടത്താൻ തയ്യാറാണോയെന്നും അദ്ദേഹം ചോദിച്ചു.
മുസ്‌ലിം സമുദായത്തിനുള്ളിൽ ഈഴവ സമൂഹത്തിനെതിരായ വിദ്വേഷം വളർത്തുന്ന തരത്തിൽ മതവൈര്യം പ്രചരിപ്പിക്കുകയാണ് ലീഗിന്റെ സമീപനമെന്നും ഇതുവഴി മതസൗഹാർദം തകർക്കാനും സംഘർഷങ്ങൾ സൃഷ്ടിക്കാനുമാണ് ശ്രമമെന്നും വെള്ളാപ്പള്ളി ആരോപിച്ചു. അടുത്ത ഭരണകാലം ലഭിച്ചാൽ വീണ്ടും വർഗീയ കലാപങ്ങൾ സൃഷ്ടിക്കാനുള്ള ദുഷ്ടലക്ഷ്യമാണ് ലീഗിനുള്ളതെന്നും അദ്ദേഹം ആരോപിച്ചു.
