ആലപ്പുഴയിൽ നടന്ന പരിപാടിയിൽ എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ മുസ്ലീം ലീഗിനെയും പ്രതിപക്ഷ നേതാവ് വി.ഡി. സതീശനെയുംതിരെ ശക്തമായ വിമർശനം ഉന്നയിച്ചു. എസ്എൻഡിപിയെയും എൻഎസ്എസിനെയും തമ്മിൽ അകറ്റിയത് മുസ്ലീം ലീഗ് നേതൃത്വമാണെന്ന് ആരോപിച്ച വെള്ളാപ്പള്ളി, താൻ മുസ്ലീം വിരോധിയല്ലെന്നും ലീഗിന്റെ വർഗീയ നിലപാടുകളെയാണ് എതിർക്കുന്നതെന്നും വ്യക്തമാക്കി.
ഇന്നത്തെ രാഷ്ട്രീയ സാഹചര്യത്തിൽ ഐക്യം അനിവാര്യമാണെന്ന് പറഞ്ഞ വെള്ളാപ്പള്ളി, നായാടി മുതൽ നമ്പൂതിരി വരെയുള്ള കൂട്ടായ്മ കാലഘട്ടത്തിന്റെ ആവശ്യകതയാണെന്നും പറഞ്ഞു. ഹിന്ദു സമൂഹം ഭിന്നിച്ചുനിൽക്കുന്നത് കാലത്തിനൊത്തതല്ലെന്നും അദ്ദേഹം കൂട്ടിച്ചേർത്തു.
പ്രതിപക്ഷ നേതാവ് വി.ഡി. സതീശനെതിരെ വ്യക്തിപരമായ വിമർശനങ്ങളും വെള്ളാപ്പള്ളി ഉന്നയിച്ചു. “ഇന്നലെ പൂത്ത തകരയാണ് സതീശൻ” എന്ന പരാമർശത്തിലൂടെ സതീശന്റെ രാഷ്ട്രീയ പരിചയവും നിലപാടുകളും അദ്ദേഹം ചോദ്യം ചെയ്തു. സതീശൻ ഈഴവ സമൂഹത്തിനെതിരെ സ്ഥിരമായി സംസാരിക്കുന്നുവെന്നും വെള്ളാപ്പള്ളി ആരോപിച്ചു.
യുഡിഎഫ് ഭരണകാലത്ത് എസ്എൻഡിപിക്ക് അവഗണന മാത്രമാണ് നേരിട്ടതെന്നും വെള്ളാപ്പള്ളി പറഞ്ഞു. മലപ്പുറത്ത് നടത്തിയ പ്രസംഗം വളച്ചൊടിച്ചാണ് തന്നെ വർഗീയവാദിയായി ചിത്രീകരിച്ചതെന്നും അദ്ദേഹം ആരോപിച്ചു. മുസ്ലീം സമുദായത്തോട് തനിക്ക് വൈരാഗ്യമില്ലെന്നും, സഹോദരതുല്യമായ സ്‌നേഹമാണ് അവരോട് ഉള്ളതെന്നും വ്യക്തമാക്കി. എന്നാൽ മുസ്ലീം ലീഗിന്റെ വർഗീയ രാഷ്ട്രീയത്തോടാണ് എതിർപ്പെന്നും വെള്ളാപ്പള്ളി പറഞ്ഞു.
എൽഡിഎഫ് അധികാരത്തിലെത്തിയ ശേഷം സംസ്ഥാനത്ത് മാറാട് പോലുള്ള കലാപങ്ങൾ ഉണ്ടായിട്ടില്ലെന്നും അദ്ദേഹം ചൂണ്ടിക്കാട്ടി. സതീശനെ പരസ്യമായി വിമർശിച്ച കാന്തപുരത്തിന്റെ നിലപാട് ഓർമിപ്പിച്ച വെള്ളാപ്പള്ളി, കോൺഗ്രസിൽ എ.കെ. ആന്റണി, രമേശ് ചെന്നിത്തല, കെ.സി. വേണുഗോപാൽ തുടങ്ങിയ മുതിർന്ന നേതാക്കൾ ഉള്ളപ്പോൾ താൻ വർഗീയവാദിയാണെന്ന് അവർ പറഞ്ഞാൽ മാത്രമേ അംഗീകരിക്കുകയുള്ളുവെന്നും പറഞ്ഞു.
സ്വന്തം കുടുംബത്തിന്റെ സാമൂഹിക–സാമ്പത്തിക പശ്ചാത്തലവും വെള്ളാപ്പള്ളി പരാമർശിച്ചു. സതീശൻ രാഷ്ട്രീയത്തിലേക്ക് കടക്കുന്നതിന് മുൻപ് അദ്ദേഹത്തിന് എന്ത് ആസ്തിയുണ്ടായിരുന്നുവെന്ന് ചോദിച്ച വെള്ളാപ്പള്ളി, എസ്എൻഡിപിയെ പിളർത്താൻ ശ്രമിച്ചവർ എല്ലാം പരാജയപ്പെട്ടതായും പറഞ്ഞു.
എൻഎസ്എസും എസ്എൻഡിപിയും ഒന്നിച്ചുനിൽക്കുന്നത് സമൂഹം സ്വാഗതം ചെയ്യുന്ന സാഹചര്യമാണെന്നും, അത്തരം ഐക്യം അനിവാര്യമാണെന്നും വെള്ളാപ്പള്ളി ആവർത്തിച്ചു. യഥാർഥ വർഗീയ ശക്തികളെ ഒപ്പം നിർത്തിയിട്ട് എസ്എൻഡിപിയെ വർഗീയവാദികളായി ചിത്രീകരിക്കുകയാണ് നടക്കുന്നതെന്നും അദ്ദേഹം ആരോപിച്ചു.
യുഡിഎഫിനോട് ശത്രുതയില്ലെന്നും, കോൺഗ്രസിന് കേരളത്തിൽ പ്രസക്തി കുറഞ്ഞതിന്റെ ഉത്തരവാദിത്തം തനിക്കല്ലെന്നും വെള്ളാപ്പള്ളി പറഞ്ഞു. മുസ്ലീം ലീഗിന്റെ നിർദേശങ്ങൾക്കനുസരിച്ച് പ്രവർത്തിക്കുന്ന നിലയിലേക്കാണ് കോൺഗ്രസ് എത്തിപ്പെട്ടിരിക്കുന്നതെന്നും അദ്ദേഹം വിമർശിച്ചു.
