​ദോഹ: രാജ്യത്തെ ഭക്ഷ്യസുരക്ഷാ സംവിധാനങ്ങൾ കൂടുതൽ സുതാര്യവും ശക്തവുമാക്കുന്ന 'വാതിഖ്' (Wathiq) ഇലക്ട്രോണിക് സംവിധാനം സമാനതകളില്ലാത്ത നേട്ടങ്ങൾ കൈവരിക്കുന്നു. ഖത്തർ പൊതുജനാരോഗ്യ മന്ത്രാലയം പുറത്തുവിട്ട ഏറ്റവും പുതിയ കണക്കുകൾ പ്രകാരം, 13,35,680 ഭക്ഷ്യ ഉൽപ്പന്നങ്ങളാണ് ഇതുവരെ ഈ പോർട്ടലിൽ രജിസ്റ്റർ ചെയ്തിരിക്കുന്നത്.
അന്താരാഷ്ട്ര മാനദണ്ഡങ്ങൾ (ISO 17020) പാലിച്ചുകൊണ്ട് പ്രവർത്തിക്കുന്ന ഒരു സംയോജിത ഡിജിറ്റൽ പ്ലാറ്റ്‌ഫോമാണ് 'വാതിഖ്'. ഇറക്കുമതി ചെയ്യുന്ന ഭക്ഷണസാധനങ്ങൾ, പ്രാദേശിക വിപണിയിലെ ഉൽപ്പന്നങ്ങൾ, ലാബ് പരിശോധനകൾ എന്നിവയെല്ലാം ഒരൊറ്റ ശൃംഖലയിൽ ബന്ധിപ്പിച്ചിരിക്കുന്നു. കസ്റ്റംസ് ക്ലിയറൻസ് പ്ലാറ്റ്‌ഫോമായ 'അൽ-നദീബുമായി' ഇതിനെ നേരിട്ട് ബന്ധിപ്പിച്ചിട്ടുള്ളതിനാൽ അതിർത്തികളിൽ ഭക്ഷ്യ പരിശോധനയും ക്ലിയറൻസും അതിവേഗം പൂർത്തിയാക്കാൻ സാധിക്കുന്നു.
 ഡിജിറ്റൽ യുഗത്തിനനുസരിച്ചുള്ള ഈ മാറ്റം ഖത്തറിലെ ഭക്ഷ്യ വിപണിയെ കൂടുതൽ സുരക്ഷിതമാക്കുന്നു.
16,790 സ്ഥാപനങ്ങൾ സിസ്റ്റത്തിൽ രജിസ്റ്റർ ചെയ്തപ്പോൾ 13,255 എണ്ണത്തിന് അംഗീകാരം നൽകിക്കഴിഞ്ഞു.രജിസ്റ്റർ ചെയ്ത 13 ലക്ഷം ഉൽപ്പന്നങ്ങളിൽ 1,79,482 എണ്ണം കർശനമായ പരിശോധനകൾക്ക് ശേഷം അംഗീകരിക്കപ്പെട്ടു.5,50,596 ഇറക്കുമതി ഷിപ്പ്‌മെന്റുകളും 4,164 കയറ്റുമതി ഷിപ്പ്‌മെന്റുകളും വാതിഖ് വഴി നിരീക്ഷിക്കപ്പെടുന്നു.
ഏതാണ്ട് 7.4 ലക്ഷത്തിലധികം സർട്ടിഫിക്കറ്റുകൾ സിസ്റ്റം വഴി വിതരണം ചെയ്തു.
ഭക്ഷ്യ ഉൽപ്പന്നങ്ങളുടെ ഗുണനിലവാരം ഉറപ്പാക്കുന്നതിനൊപ്പം പരിശോധനാനടപടികൾ വേഗത്തിലാക്കാനും ഇത് സഹായിക്കുന്നു. ലബോറട്ടറി പരിശോധനാ ഫലങ്ങൾ വൈകാതെ ലഭ്യമാകുന്നതോടെ വിപണിയിലെ അപകടസാധ്യതകൾ കുറയുന്നു. ഒരു ഉൽപ്പന്നം ഉത്പാദിപ്പിക്കുന്നത് മുതൽ ഉപഭോക്താവിൽ എത്തുന്നത് വരെയുള്ള ഓരോ ഘട്ടവും ഇതിലൂടെ ട്രാക്ക് ചെയ്യാൻ സാധിക്കും.
​ഭക്ഷ്യ സ്ഥാപനങ്ങൾക്ക് അവരുടെ വിവരങ്ങൾ ഓൺലൈനായി രജിസ്റ്റർ ചെയ്യാനും പുതിയ ഉൽപ്പന്നങ്ങൾക്കായി അപേക്ഷിക്കാനുമുള്ള സൗകര്യം ഇതിലൂടെ ലഭ്യമാണ്. ഖത്തറിലെ ജനങ്ങൾക്ക് ഉയർന്ന നിലവാരമുള്ളതും സുരക്ഷിതവുമായ ഭക്ഷണം ഉറപ്പാക്കുന്നതിൽ 'വാതിഖ്' ഇന്ന് അവിഭാജ്യ ഘടകമായി മാറിയിരിക്കുന്നു.