പശ്ചിമേഷ്യയിൽ അമേരിക്ക വൻതോതിൽ സൈനിക സാന്നിധ്യം വർധിപ്പിക്കുകയാണെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. ഇറാന്റെ ആണവപദ്ധതിയും ബാലിസ്റ്റിക് മിസൈൽ ശേഖരവും സംബന്ധിച്ചൊരു കരാറിൽ എത്തുന്നത് അമേരിക്കൻ പ്രസിഡന്റ് ഡൊണാൾഡ് ട്രംപ് അന്ത്യശാസനം നൽകിയതിന് പിന്നാലെയാണ് അമേരിക്ക പശ്ചിമേഷ്യയിൽ വീണ്ടും സൈനിക സാന്നിധ്യം വർധിപ്പിക്കുന്നത്. 

ലോകത്തിലെ ഏറ്റവും വലിയ വിമാനവാഹിനിക്കപ്പലായ യുഎസ്എസ് ജെറാൾഡ് ആർ ഫോർഡ് അറേബ്യൻ കടലിൽ ഇതിനകം വിന്യസിച്ചിരിക്കുന്ന എബ്രഹാം ലിങ്കൺ കേരിയർ സ്ട്രൈക്ക് ഗ്രൂപ്പിൽ ചേരാനൊരുങ്ങുന്നതായി റിപ്പോർട്ടുകളുണ്ട്. ഇതിന് പുറമേ, E-3 സെൻട്രി എയർബോൺ വാർണിംഗ് ആൻഡ് കൺട്രോൾ സിസ്റ്റം പോലുള്ള നിർണായക വ്യോമനിരീക്ഷണ സംവിധാനങ്ങളും മേഖലയിൽ എത്തിച്ചിട്ടുണ്ട്.

 തങ്ങൾ “പിരിമുറുക്കമോ യുദ്ധമോ തേടുന്നില്ല, യുദ്ധം ആരംഭിക്കുകയുമില്ല” എന്ന് ഐക്യരാഷ്ട്രസഭയുടെ സുരക്ഷാ കൗൺസിലിലേക്ക് അയച്ച കത്തിൽ ഇറാൻ വ്യക്തമാക്കിയിട്ടുണ്ട്. അതേസമയം, യുഎസിന്റെ ഏതൊരു ആക്രമണത്തിനും “നിശ്ചിതവും അനുപാതികവുമായ” മറുപടി നൽകുമെന്നും ഇറാൻ മുന്നറിയിപ്പ് നൽകി. “അപ്രതീക്ഷിതവും നിയന്ത്രണാതീതവുമായ പ്രത്യാഘാതങ്ങൾക്ക് യുഎസ് പൂർണ്ണ ഉത്തരവാദിത്വം വഹിക്കേണ്ടിവരും,” കത്തിൽ പറയുന്നു.

മധ്യപൂർവദേശത്തെ ഈ പുതിയ യുഎസ് സൈനിക വിന്യാസം ഡീ​ഗോ ​ഗാർഷ്യ എന്ന ബ്രിട്ടീഷ്-അമേരിക്കൻ സംയുക്ത സൈനിക താവളത്തിന്റെ ഉപയോഗം സംബന്ധിച്ച് യുണൈറ്റഡ് കിംഗ്ഡവുമായുള്ള തർക്കത്തിനും വഴിവെച്ചിട്ടുണ്ട്.

യുഎസ് വിന്യസിച്ച വ്യോമശക്തി എന്തൊക്കെയാണ്?

ഓപ്പൺ-സോഴ്‌സ് ഇന്റലിജൻസ് വിശകലനങ്ങളും സൈനിക വിമാനങ്ങളുടെ ഫ്ലൈറ്റ്-ട്രാക്കിംഗ് ഡാറ്റയും പ്രകാരം, കഴിഞ്ഞ കുറച്ച് ദിവസങ്ങൾക്കുള്ളിൽ യുഎസ് 120-ലധികം വിമാനങ്ങൾ മേഖലയിൽ വിന്യസിച്ചിട്ടുണ്ട്. 2003-ലെ ഇറാഖ് യുദ്ധത്തിന് ശേഷമുള്ള പശ്ചിമേഷ്യയിലെ ഏറ്റവും വലിയ യുഎസ് വ്യോമശക്തി വർധനവാണിത്.

E-3 സെൻട്രി AWACS വിമാനങ്ങൾ, F-35 സ്റ്റെൽത്ത് സ്‌ട്രൈക്ക് ഫൈറ്ററുകൾ, F-22 എയർ സൂപീരിയോറിറ്റി ജെറ്റുകൾ, F-15, F-16 എന്നിവ ഉൾപ്പെടുന്ന വിന്യാസമാണ് റിപ്പോർട്ടുകളിലുള്ളത്. യുഎസിലും യൂറോപ്പിലുമുള്ള വിവിധ താവളങ്ങളിൽ നിന്ന് പുറപ്പെട്ട ഈ വിമാനങ്ങൾക്ക് ചരക്ക് വിമാനങ്ങളും ആകാശ ഇന്ധനവിതരണ ടാങ്കറുകളും പിന്തുണ നൽകുന്നതായി ഡാറ്റ കാണിക്കുന്നു. ഇത് പതിവ് റൊട്ടേഷനുകളല്ല, ദീർഘകാല ഓപ്പറേഷണൽ പദ്ധതികളാണെന്ന സൂചനയാണിത്.

ജൂൺ 2025-ൽ ഇറാനും ഇസ്രയേലും തമ്മിലുണ്ടായ 12 ദിവസത്തെ സംഘർഷത്തിനിടെ ഇറാനിയൻ ആണവകേന്ദ്രങ്ങളെ ലക്ഷ്യമാക്കി നടത്തിയ യുഎസ് ആക്രമണങ്ങളിൽ B-2 സ്റ്റെൽത്ത് ബോംബറുകൾക്ക് F-22, F-35 വിമാനങ്ങൾ സുരക്ഷ നൽകിയിരുന്നു.  ഇതിനുമുമ്പ്, എയർഫോഴ്‌സിന്റെ F-15E സ്‌ട്രൈക്ക് ഈഗിൾസ് മേഖലയിൽ എത്തിയിരുന്നു. “ഇത് യുദ്ധസജ്ജത വർധിപ്പിക്കുകയും പ്രാദേശിക സുരക്ഷയും സ്ഥിരതയും പ്രോത്സാഹിപ്പിക്കുകയും ചെയ്യുന്നു,” എന്ന് യുഎസ് സെൻട്രൽ കമാൻഡ് അറിയിച്ചു.

ഡീഗോ ഗാർഷ്യയും യുകെയുടെ പങ്കും

ഇന്ത്യൻ മഹാസമുദ്രത്തിലെ ചാഗോസ് ദ്വീപസമൂഹത്തിലുള്ള ഡീ​ഗോ ​ഗാർഷ്യ ദീർഘദൂര യുഎസ് സ്ട്രാറ്റജിക് ബോംബറുകൾ—B-2 ഉൾപ്പെടെ—വിന്യസിക്കാൻ ശേഷിയുള്ളതാണ്. ചരിത്രപരമായി, മേഖലയിൽ യുഎസ് നടത്തിയ വലിയ വ്യോമാക്രമണങ്ങളുടെ തുടക്കകേന്ദ്രമായിരുന്നു ഈ താവളം.എന്നാൽ, ബ്രിട്ടീഷ് പരമാധികാരത്തിലുള്ള ഈ താവളം വാഷിങ്ടണിന് വാടകയ്ക്ക് നൽകിയിരിക്കുന്നതിനാൽ, ആക്രമണ ഓപ്പറേഷനുകൾക്കായി ലണ്ടന്റെ അനുമതി ആവശ്യമാണ്.  ഇറാനെതിരായ ആക്രമണങ്ങൾക്ക് ഡിഗോ ഗാർഷ്യയെ ഉപയോഗിക്കാൻ യുഎസിന് അനുവാദമില്ലെന്ന് ബ്രിട്ടീഷ് പ്രധാനമന്ത്രി ട്രംപിനെ അറിയിച്ചിട്ടുണ്ട്. ഇത് അന്താരാഷ്ട്ര നിയമലംഘനമാകുമെന്ന നിലപാടിലാണ് ലണ്ടൻ.