ഇസ്‌ലാമാബാദ്: എട്ട് ആഴ്ച പിന്നിട്ട അമേരിക്ക-ഇറാൻ യുദ്ധത്തിന് അറുതി വരുത്താനുള്ള നയതന്ത്ര നീക്കങ്ങൾ പാകിസ്താനിൽ ഊർജ്ജിതമാകുന്നു. ബുധനാഴ്ച വൈകുന്നേരം യുഎസ് സമയം വെടിനിർത്തൽ കാലാവധി അവസാനിക്കാനിരിക്കെ, ഇറാനെ ചർച്ചാ മേശയിലേക്ക് എത്തിക്കാനുള്ള തീവ്രശ്രമത്തിലാണ് പാകിസ്താൻ.
​അമേരിക്കൻ വൈസ് പ്രസിഡന്റ് ജെ.ഡി വാൻസിന്റെ നേതൃത്വത്തിലുള്ള ഉന്നതതല സംഘം ബുധനാഴ്ച രാവിലെ ഇസ്‌ലാമാബാദിലെത്തും. പ്രസിഡന്റ് ട്രംപിന്റെ പ്രത്യേക പ്രതിനിധി സ്റ്റീവ് വിറ്റ്‌കോഫ്, ജാറെഡ് കുഷ്‌നർ എന്നിവരും സംഘത്തിലുണ്ടാകുമെന്ന് റിപ്പോർട്ടുകൾ സൂചിപ്പിക്കുന്നു.ചർച്ചകൾക്കുള്ള ഒരുക്കങ്ങൾ നടക്കുമ്പോഴും ഒമാൻ കടലിലും പസഫിക് മേഖലയിലും ഇറാനിയൻ കപ്പലുകൾ അമേരിക്കൻ സൈന്യം പിടിച്ചെടുത്തത് നയതന്ത്ര നീക്കങ്ങൾക്ക് തിരിച്ചടിയായിട്ടുണ്ട്. "ഭീഷണിയുടെ നിഴലിൽ ചർച്ചകൾക്കില്ല" എന്ന നിലപാടിലാണ് ഇറാൻ. ഹോർമുസ് കടലിടുക്കിലെ ഉപരോധം നീക്കാതെ വിട്ടുവീഴ്ചക്കില്ലെന്ന കർശന നിലപാട് ഇറാനിയൻ റെവല്യൂഷണറി ഗാർഡ് (IRGC) സ്വീകരിച്ചിട്ടുണ്ട്.
ഇറാൻ യുറേനിയം സമ്പുഷ്ടീകരണം പൂർണ്ണമായും നിർത്തണമെന്നതാണ് ട്രംപ് ഭരണകൂടത്തിന്റെ പ്രധാന ആവശ്യം. എന്നാൽ ഇതിന്മേൽ ഇരുരാജ്യങ്ങളും തമ്മിൽ ധാരണയിലെത്തിയിട്ടില്ല.
തങ്ങളുടെ എണ്ണക്കപ്പലുകൾ തടയുന്ന ഉപരോധം പിൻവലിക്കണമെന്ന് ഇറാൻ ആവശ്യപ്പെടുമ്പോൾ, ചർച്ചകളിൽ മേൽക്കൈ നേടാൻ ഈ ഉപരോധം തുടരാനാണ് അമേരിക്കയുടെ നീക്കം.
അമേരിക്കയുമായും ഇറാനുമായും ഒരേസമയം സൈനിക-സുരക്ഷാ ബന്ധങ്ങളുള്ള ഏക രാജ്യം എന്ന നിലയിൽ പാകിസ്താന്റെ മധ്യസ്ഥശ്രമങ്ങളെ ലോകം ഉറ്റുനോക്കുകയാണ്. ഇസ്‌ലാമാബാദിലെ സെറീന ഹോട്ടൽ ഉൾപ്പെടെയുള്ള മേഖലകളിൽ കനത്ത സുരക്ഷയാണ് ഏർപ്പെടുത്തിയിരിക്കുന്നത്.
​ചർച്ചകൾ പരാജയപ്പെട്ടാൽ യുദ്ധം കൂടുതൽ നാശങ്ങളിലേക്ക് വഴിമാറുമെന്ന ആശങ്ക ശക്തമാണ്. ബുധനാഴ്ച തുടങ്ങേണ്ട രണ്ടാം വട്ട ചർച്ചയിൽ ഇറാൻ പ്രതിനിധികൾ പങ്കെടുക്കുമോ എന്നതാണ് ഇപ്പോൾ ലോകം ഉറ്റുനോക്കുന്ന പ്രധാന ചോദ്യം.