ദോഹ/വാഷിംഗ്ടൺ: ദീർഘനാളത്തെ പ്രതിസന്ധികൾക്കൊടുവിൽ അമേരിക്കയും ഇറാനും തമ്മിൽ 60 ദിവസത്തെ താൽക്കാലിക ധാരണാപത്രത്തിന് (Memorandum of Understanding) രൂപം നൽകിയതായി പ്രമുഖ അന്താരാഷ്ട്ര വാർത്താ വെബ്‌സൈറ്റായ 'ആക്സിയോസ്' (Axios) വെളിപ്പെടുത്തി. മേഖലയിലെ വെടിനിർത്തൽ നീട്ടുന്നതിനും, ഇരുരാജ്യങ്ങളും തമ്മിലുള്ള ആണവ പദ്ധതിയുമായി ബന്ധപ്പെട്ട ചർച്ചകൾ പുനരാരംഭിക്കുന്നതിനുമാണ് താൽക്കാലിക ധാരണയായിരിക്കുന്നത്.അമേരിക്കൻ-ഇറാനിയൻ ചർച്ചകളിൽ പങ്കെടുത്ത നയതന്ത്ര പ്രതിനിധികൾ കരാറിന്റെ നിബന്ധനകളിൽ അന്തിമ ധാരണയിലെത്തിയിട്ടുണ്ട്. കഴിഞ്ഞ ചൊവ്വാഴ്ചയോടെ തന്നെ കരാറിന്റെ ഭൂരിഭാഗം നിബന്ധനകളിലും ഇരുപക്ഷവും സമ്മതം മൂതിയിരുന്നു. എന്നാൽ, കരാർ ഔദ്യോഗികമായി നടപ്പിലാക്കുന്നതിന് ഇരുരാജ്യങ്ങളിലെയും ഉന്നത നേതൃത്വത്തിന്റെ അന്തിമ അംഗീകാരം ആവശ്യമാണെന്ന് റിപ്പോർട്ടുകൾ വ്യക്തമാക്കുന്നു.
അമേരിക്കൻ പ്രസിഡന്റ് ഡൊണാൾഡ് ട്രംപിന്റെ അന്തിമ അനുമതിക്കായി കാത്തിരിക്കുകയാണ് നിലവിൽ ഈ കരാർ. ഇറാനുമായുള്ള ഈ താൽക്കാലിക ധാരണയെക്കുറിച്ച് ആലോചിക്കാൻ തനിക്ക് ഏതാനും ദിവസത്തെ സമയം വേണമെന്ന് പ്രസിഡന്റ് ട്രംപ് മധ്യസ്ഥരെ അറിയിച്ചതായി അൽ ജസീറ നെറ്റിനെ ഉദ്ധരിച്ച് വാർത്താ ഏജൻസികൾ റിപ്പോർട്ട് ചെയ്തു. വരും ദിവസങ്ങളിൽ ട്രംപ് അനുകൂല നിലപാട് സ്വീകരിച്ചാൽ പശ്ചിമേഷ്യൻ രാഷ്ട്രീയത്തിൽ വലിയൊരു നയതന്ത്ര വഴിത്തിരിവിനാകും ഇത് സാക്ഷ്യം വഹിക്കുക.
