വാഷിങ്ടൺ: ഇറാനെതിരായ അമേരിക്കൻ സൈനിക നടപടി പത്താം ദിവസവും തുടരുന്നു. ഹോർമുസ് കടലിടുക്കിലൂടെ സഞ്ചരിക്കുന്ന വാണിജ്യ കപ്പലുകൾക്ക് ഭീഷണിയാകുന്ന ഇറാന്റെ സൈനിക ശേഷി തകർക്കുക എന്ന ലക്ഷ്യത്തോടെയാണ് ആക്രമണങ്ങൾ ശക്തമാക്കിയിരിക്കുന്നതെന്ന് യുഎസ് സെൻട്രൽ കമാൻഡ് അറിയിച്ചു. ഇറാന്റെ സൈനിക കമാൻഡ് സെന്ററുകൾ, നാവിക സംവിധാനങ്ങൾ, മിസൈൽ-ഡ്രോൺ വിക്ഷേപണ കേന്ദ്രങ്ങൾ, വ്യോമ പ്രതിരോധ സംവിധാനങ്ങൾ എന്നിവയാണ് പ്രധാനമായും ലക്ഷ്യമിടുന്നത്.

അതേസമയം, കഴിഞ്ഞ രണ്ടാഴ്ചയ്ക്കിടെ ഇറാൻ നടത്തിയ ആക്രമണങ്ങളിൽ മൂന്ന് അമേരിക്കൻ സൈനികർ കൊല്ലപ്പെടുകയും നൂറിലേറെ പേർക്ക് പരിക്കേൽക്കുകയും ചെയ്തതായി പെന്റഗൺ വ്യക്തമാക്കി. ജൂലൈ 7 മുതൽ ഏകദേശം 100 സൈനികർക്ക് വിവിധ തരത്തിലുള്ള പരിക്കുകൾ സംഭവിച്ചെന്നും, ഇവരിൽ 96 ശതമാനവും ചികിത്സയ്ക്ക് ശേഷം വീണ്ടും ഡ്യൂട്ടിയിൽ പ്രവേശിച്ചതായും യുഎസ് മാധ്യമങ്ങൾ പെന്റഗൺ ഉദ്യോഗസ്ഥരെ ഉദ്ധരിച്ച് റിപ്പോർട്ട് ചെയ്തു.

ഹോർമുസ് കടലിടുക്കിലെ വാണിജ്യ കപ്പലുകളുടെ സുരക്ഷ ഉറപ്പാക്കുകയെന്ന ലക്ഷ്യത്തോടെയാണ് അമേരിക്ക ഒരാഴ്ചയായി രാത്രികാല വ്യോമാക്രമണങ്ങൾ തുടരുന്നത്. ഇതിനിടെ ജോർദാൻ, കുവൈത്ത്, ബഹ്റൈൻ എന്നിവിടങ്ങളിലെ യുഎസ് സൈനിക താവളങ്ങൾ കേന്ദ്രീകരിച്ച് ഇറാനും പ്രത്യാക്രമണം ശക്തമാക്കിയിരിക്കുകയാണ്.

ജോർദാനിലെ സൈനിക താവളത്തിന് നേരെയുണ്ടായ ആക്രമണമാണ് അമേരിക്കയ്ക്ക് ഏറ്റവും വലിയ തിരിച്ചടിയായത്. രണ്ട് അമേരിക്കൻ സൈനികർ കൊല്ലപ്പെട്ടതായും കാണാതായ മൂന്നാമത്തെ സൈനികനെ കണ്ടെത്താനുള്ള തെരച്ചിലിനിടെ തിരിച്ചറിയാൻ കഴിയാത്ത ശരീരാവശിഷ്ടങ്ങൾ ലഭിച്ചതായും യുഎസ് പ്രതിരോധ വകുപ്പ് അറിയിച്ചു.

ഇതിനുപുറമെ, ഇറാഖിലും ഒരു അമേരിക്കൻ സൈനികൻ കൊല്ലപ്പെട്ടു. ഇറാനിൽ നിന്നെത്തിയ ഡ്രോണിലെ സ്‌ഫോടക വസ്തു നിർവീര്യമാക്കുന്നതിനിടെയാണ് അപകടമുണ്ടായതെന്നാണ് അമേരിക്കയുടെ വിശദീകരണം.

യുഎസ്–ഇറാൻ സംഘർഷം ആരംഭിച്ചതിന് ശേഷം 500-ലധികം അമേരിക്കൻ സൈനികർക്ക് പരിക്കേറ്റതായും ഔദ്യോഗിക കണക്കുകൾ പ്രകാരം 17 സൈനികർ കൊല്ലപ്പെട്ടതായും റിപ്പോർട്ടുകളുണ്ട്. ജോർദാനിലെയും ഇറാഖിലെയും ആക്രമണങ്ങൾക്ക് ശക്തമായ തിരിച്ചടി നൽകുമെന്ന് യുഎസ് പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകിയിട്ടുണ്ട്.