വാഷിങ്ടൺ: അമേരിക്കയും ഇറാനും തമ്മിലുള്ള വെടിനിർത്തൽ കരാർ നിലനിൽക്കുമ്പോഴും മേഖലയിലെ സംഘർഷം വീണ്ടും രൂക്ഷമാകുന്നു. കുവൈത്തിലും ബഹ്റൈനിലും ഉണ്ടായ ആക്രമണങ്ങളെത്തുടർന്ന് സഖ്യകക്ഷികൾക്കുണ്ടായ നാശനഷ്ടങ്ങൾ നികത്താൻ ഇറാന്റെ മരവിപ്പിച്ച ആസ്തികൾ ഉപയോഗിക്കുന്ന കാര്യം അമേരിക്ക പരിഗണിക്കുന്നതായി റിപ്പോർട്ടുകൾ സൂചിപ്പിക്കുന്നു.
റോയിട്ടേഴ്സ് പുറത്തുവിട്ട വിവരങ്ങൾ പ്രകാരം, ഗൾഫ് രാജ്യങ്ങളിലെ പുനർനിർമ്മാണ പ്രവർത്തനങ്ങൾക്കും നഷ്ടപരിഹാരത്തിനുമായി ഇറാന്റെ സാമ്പത്തിക ആസ്തികൾ വകമാറ്റാനുള്ള സാധ്യതയാണ് യുഎസ് പരിശോധിക്കുന്നത്. മരവിപ്പിച്ചിട്ടുള്ള ഫണ്ടുകൾ വിട്ടുനൽകണമെന്ന ടെഹ്റാന്റെ ആവശ്യം ശക്തമാകുന്നതിനിടെയാണ് ഈ നീക്കം.
ഇറാനുമായി ബന്ധപ്പെട്ട മുൻകാല ആക്രമണങ്ങളുടെയും നാശനഷ്ടങ്ങളുടെയും സാമ്പത്തിക ബാധ്യത വിലയിരുത്താൻ യുഎസ് ട്രഷറി വകുപ്പിന് നിർദേശം നൽകിയതായി റിപ്പോർട്ടിൽ പറയുന്നു. ഈ ചെലവുകൾ ഇറാന്റെ ആസ്തികളിൽ നിന്ന് ഈടാക്കാനാകുമോ എന്നതും പരിശോധിക്കുന്നുണ്ട്.
അതേസമയം, മേഖലയിൽ സൈനിക സംഘർഷം തുടരുകയാണ്. ശനിയാഴ്ച പുലർച്ചെ ഹോർമുസ് കടലിടുക്കിനോട് ചേർന്ന ഇറാനിയൻ തീരദേശ റഡാർ കേന്ദ്രങ്ങളും ഖെഷ്ം ദ്വീപിലെ ചില സൈനിക സംവിധാനങ്ങളും യുഎസ് സൈന്യം ലക്ഷ്യമിട്ടു. സമുദ്രഗതാഗതത്തിന് ഭീഷണിയായ ഡ്രോണുകളെ തകർത്തതിനു പിന്നാലെയായിരുന്നു ഈ ആക്രമണമെന്ന് യുഎസ് സെൻട്രൽ കമാൻഡ് വ്യക്തമാക്കി.
ഇതിന് മറുപടിയായി കുവൈത്തിലും ബഹ്റൈനിലുമുള്ള അമേരിക്കൻ സൈനിക താവളങ്ങൾക്ക് നേരെ ഇറാൻ മിസൈൽ ആക്രമണം നടത്തി. നിരവധി ബാലിസ്റ്റിക് മിസൈലുകൾ പ്രയോഗിച്ചെങ്കിലും ഭൂരിഭാഗവും തടഞ്ഞതായി യുഎസ് അറിയിച്ചു. കുവൈത്തിൽ ചില നാശനഷ്ടങ്ങൾ റിപ്പോർട്ട് ചെയ്തെങ്കിലും ആളപായമില്ലെന്ന് അധികൃതർ വ്യക്തമാക്കി. ബഹ്റൈനിൽ സുരക്ഷാ മുന്നറിയിപ്പുകൾ പുറപ്പെടുവിക്കുകയും ജനങ്ങളോട് സുരക്ഷിത കേന്ദ്രങ്ങളിലേക്ക് മാറാൻ നിർദേശിക്കുകയും ചെയ്തു.
വെടിനിർത്തൽ കരാർ നിലവിലുണ്ടെങ്കിലും ഇരുരാജ്യങ്ങളും തമ്മിലുള്ള ഏറ്റുമുട്ടലുകൾ തുടർന്നുകൊണ്ടിരിക്കുകയാണ്. ഇതോടെ പശ്ചിമേഷ്യയിൽ വലിയ തോതിലുള്ള സംഘർഷസാധ്യതയെക്കുറിച്ചുള്ള ആശങ്കകൾ വീണ്ടും ഉയർന്നിട്ടുണ്ട്.
ഇതിനിടെ നയതന്ത്രതലത്തിലുള്ള ഇടപെടലുകളും സജീവമാണ്. പാകിസ്താൻ ആഭ്യന്തരമന്ത്രി മൊഹ്സിൻ നഖ്വി ടെഹ്റാനിലെത്തി ഇറാൻ നേതൃത്വവുമായി കൂടിക്കാഴ്ച നടത്തി. ഇരു രാജ്യങ്ങൾക്കുമിടയിലെ സംഘർഷം കുറയ്ക്കാനും ചർച്ചകൾ മുന്നോട്ട് കൊണ്ടുപോകാനുമുള്ള സന്ദേശമാണ് അദ്ദേഹം കൈമാറിയതെന്ന് ഇറാനിയൻ മാധ്യമങ്ങൾ റിപ്പോർട്ട് ചെയ്യുന്നു.
