​ടെഹ്റാൻ/മസ്കറ്റ്:ന്യൂഡൽഹി: ഹോർമുസ് കടലിടുക്കിന് സമീപം യു.എസ് - ഇറാൻ സൈനിക ഏറ്റുമുട്ടൽ രൂക്ഷമാകുന്നു. അന്താരാഷ്ട്ര കപ്പൽ ചാനലിൽ നൂറു കണക്കിന് ഇന്ത്യൻ നാവികരുടെ ജീവൻ അപകടത്തിലാക്കിക്കൊണ്ടാണ് യു.എസ് സേനയുടെ നീക്കം. കഴിഞ്ഞ ബുധനാഴ്ച യു.എസ് നടത്തിയ മിസൈലാക്രമണത്തിൽ 'സെറ്റെബെല്ലോ' എണ്ണ ടാങ്കറിലെ മൂന്ന് ഇന്ത്യൻ നാവികർ കൊല്ലപ്പെട്ടതായി ഔദ്യോഗികമായി സ്ഥിരീകരിച്ചു. ഇതിന് പിന്നാലെ, ഇന്ത്യൻ ജീവനക്കാരുള്ള മറ്റൊരു ചരക്കുകപ്പലിന് നേരെ കൂടി യു.എസ് ഇന്നലെ ആക്രമണം നടത്തി.
​സംഭവത്തിൽ കടുത്ത അമർഷം രേഖപ്പെടുത്തിയ ഇന്ത്യ, ഡൽഹിയിലെ യു.എസ് എംബസി ഡെപ്യൂട്ടി ചീഫ് ഓഫ് മിഷൻ ജേസൺ മീക്സിനെ വിദേശകാര്യ മന്ത്രാലയത്തിൽ വിളിച്ചുവരുത്തി ശക്തമായ പ്രതിഷേധം അറിയിച്ചു.
​'എം.ടി ജൽവീറിന്' നേരെയും മിസൈലാക്രമണം
​20 ഇന്ത്യൻ ജീവനക്കാരുമായി ഒമാൻ ഉൾക്കടലിലൂടെ നീങ്ങുകയായിരുന്ന 'എം.ടി ജൽവീർ' എന്ന ബിറ്റുമിൻ ടാങ്കറിന് നേരെയാണ് യു.എസ് രണ്ട് മിസൈലുകൾ തൊടുത്തത്. ഗിനി ബിസൗ പതാക വഹിച്ച കപ്പലായിരുന്നു ഇത്. ആക്രമണത്തിൽ കപ്പലിന്റെ എൻജിൻ റൂമിന് തീപിടിച്ചെങ്കിലും ജീവനക്കാരെല്ലാം അത്ഭുതകരമായി രക്ഷപ്പെട്ടു. ഒമാൻ നാവികസേന ഇവരെ സുരക്ഷിതമായി ഷിനാസ് തുറമുഖത്ത് എത്തിച്ചിട്ടുണ്ട്. നാല് ദിവസത്തിനിടെ ഇന്ത്യൻ ജീവനക്കാരുൾപ്പെടുന്ന മൂന്നാമത്തെ കപ്പലിന് നേരെയാണ് യു.എസ് ആക്രമണം നടത്തുന്നത്. അവശ്യവസ്തുക്കളുമായി പോയ ഇറാനിയൻ ചരക്കുകപ്പലും യു.എസ് തകർത്തു. ഇതിലെ 5 ജീവനക്കാരെ മറ്റൊരു കപ്പൽ രക്ഷപ്പെടുത്തി.
​ഹോർമുസ് കടലിടുക്ക് ഇറാൻ പൂർണ്ണമായും അടച്ചു
​ആക്രമണങ്ങൾ കടുപ്പിച്ചതോടെ ഹോർമുസ് കടലിടുക്ക് പൂർണ്ണമായും അടച്ചതായി ഇറാൻ പ്രഖ്യാപിച്ചു. ഇനി ഈ പാതയിലൂടെ കടക്കാൻ ശ്രമിക്കുന്ന ഏത് കപ്പലുകളെയും തകർക്കുമെന്നാണ് ഇറാന്റെ മുന്നറിയിപ്പ്. മേഖലയിലൂടെ കടന്നുപോയ രണ്ട് വാണിജ്യക്കപ്പലുകൾക്ക് നേരെ കൂടി ആക്രമണമുണ്ടായതായി റിപ്പോർട്ടുകളുണ്ട്.
​ബന്ദർ അബ്ബാസ്, മിനാബ്, ഖേഷം ദ്വീപ് തുടങ്ങി ഇറാന്റെ തെക്കൻ തീരത്തെ സൈനിക-ശുദ്ധീകരണ കേന്ദ്രങ്ങൾക്ക് നേരെ യു.എസ് ഇന്നലെ പുലർച്ചെ ശക്തമായ ആക്രമണം നടത്തിയിരുന്നു. ഇതിന് പകരമായി കുവൈറ്റ്, ബഹ്റൈൻ, ജോർദ്ദാൻ എന്നിവിടങ്ങളിലെ യു.എസ് സൈനിക താവളങ്ങൾ ഇറാനും ലക്ഷ്യമിട്ടു. ബഹ്റൈനിലെ മനാമയിലുള്ള യു.എസ് നാവിക ആസ്ഥാനത്തിന് തൊട്ടടുത്താണ് ഇറാന്റെ മിസൈലുകളിലൊന്ന് പതിച്ചത്.
​വഴിത്തിരിവായി സമാധാന ചർച്ചകൾ; ആക്രമണം റദ്ദാക്കി ട്രംപ്
​അതേസമയം, മേഖലയിലെ യുദ്ധം അവസാനിപ്പിക്കാനുള്ള സമാധാന ചർച്ചകളിൽ വലിയ വഴിത്തിരിവുണ്ടായതായി യു.എസ് പ്രസിഡന്റ് ഡൊണാൾഡ് ട്രംപ് അറിയിച്ചു. ഇന്ന് പുലർച്ചെ ഇറാനിൽ നടത്താനിരുന്ന നിർണായക സൈനിക ആക്രമണം ട്രംപ് റദ്ദാക്കിയിട്ടുണ്ട്. ഇറാന്റെ സാമ്പത്തിക നട്ടെല്ലായ ഖാർഗ് ദ്വീപ് പിടിച്ചെടുക്കുമെന്നും ഇറാന്റെ എണ്ണ ഉത്പാദനം പൂർണ്ണമായി നിയന്ത്രിക്കുമെന്നും യു.എസ് ഭീഷണി മുഴക്കിയതിന് പിന്നാലെയാണ് പെട്ടെന്നുള്ള ഈ നിലപാട് മാറ്റം.
​"അന്തിമ വ്യവസ്ഥകൾ എല്ലാ കക്ഷികളും അംഗീകരിച്ചിട്ടുണ്ട്. സമാധാന കരാർ ഒപ്പുവയ്ക്കുന്ന സമയവും സ്ഥലവും ഉടൻ തന്നെ പ്രഖ്യാപിക്കാൻ സാധിക്കും."
— ഡൊണാൾഡ് ട്രംപ്, യു.എസ് പ്രസിഡന്റ്
​യു.എസ് ആക്രമണം അടിയന്തരമായി നിറുത്തണം: ഇന്ത്യ
​ഹോർമുസ് കടലിടുക്കിലെ ആക്രമണങ്ങൾ യു.എസ് അടിയന്തരമായി നിറുത്തിവെക്കണമെന്ന് ഇന്ത്യ ആവശ്യപ്പെട്ടു. മൂന്ന് ഇന്ത്യൻ നാവികരുടെ മരണത്തിൽ കടുത്ത ആശങ്ക രേഖപ്പെടുത്തിയ വിദേശകാര്യ വക്താവ് രൺധീർ ജയ്സ്വാൾ, മേഖലയിലെ കപ്പലുകൾക്ക് നേരെയുള്ള ആക്രമണങ്ങൾ അംഗീകരിക്കാനാവില്ലെന്ന് വ്യക്തമാക്കി. കടലിലെ ഇന്ത്യൻ നാവികരുടെ സുരക്ഷയ്ക്കാണ് രാജ്യം ഏറ്റവും ഉയർന്ന പ്രാധാന്യം നൽകുന്നതെന്നും വിദേശകാര്യ മന്ത്രാലയം അറിയിച്ചു.