ദോഹ/ന്യൂയോർക്ക്: പശ്ചിമേഷ്യയിലെ സംഘർഷങ്ങൾ പരിഹരിക്കുന്നതിനായി അമേരിക്കയും ഇറാനും തമ്മിൽ ഗൗരവകരമായ ചർച്ചകൾ പുനരാരംഭിക്കണമെന്ന് ഐക്യരാഷ്ട്രസഭാ സെക്രട്ടറി ജനറൽ അന്റോണിയോ ഗുട്ടെറസ്. ഇരുരാജ്യങ്ങളും തമ്മിലുള്ള വെടിനിർത്തൽ കരാർ പാലിക്കണമെന്നും ആവശ്യമെങ്കിൽ അത് നീട്ടണമെന്നും അദ്ദേഹം ആവശ്യപ്പെട്ടു. ന്യൂയോർക്കിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം.
നിലവിലെ പ്രതിസന്ധികൾക്ക് സൈനികമായ ഒരു പരിഹാരമില്ലെന്ന് ഗുട്ടെറസ് ഓർമ്മിപ്പിച്ചു. ഹോർമുസ് കടലിടുക്ക് ഉൾപ്പെടെയുള്ള മേഖലകളിൽ അന്താരാഷ്ട്ര സമുദ്ര നിയമങ്ങളും യാത്രാസ്വാതന്ത്ര്യവും എല്ലാ കക്ഷികളും ബഹുമാനിക്കണം. സമാധാന കരാറുകൾ നിലനിൽക്കാൻ നിരന്തരമായ ഇടപെടലുകളും രാഷ്ട്രീയ ഇച്ഛാശക്തിയും ആവശ്യമാണെന്നും അദ്ദേഹം കൂട്ടിച്ചേർത്തു.
"ഇപ്പോൾ വേണ്ടത് സംയമനവും ഉത്തരവാദിത്തവുമാണ്. നയതന്ത്രത്തിന്റെ സമയമാണിത്, സംഘർഷം വർദ്ധിപ്പിക്കേണ്ടതല്ല. അന്താരാഷ്ട്ര നിയമങ്ങളോടുള്ള നമ്മുടെ പ്രതിബദ്ധത പുതുക്കേണ്ട സന്ദർഭമാണിത്," ഗുട്ടെറസ് പറഞ്ഞു.
ലോകത്തിന്റെ പല ഭാഗങ്ങളിലും, പ്രത്യേകിച്ച് പശ്ചിമേഷ്യയിൽ അന്താരാഷ്ട്ര നിയമങ്ങൾ നഗ്നമായി ലംഘിക്കപ്പെടുകയാണ്. നിയമം ലംഘിക്കപ്പെടുമ്പോൾ പലരും കണ്ണടയ്ക്കുകയാണെന്നും അദ്ദേഹം വിമർശിച്ചു. അന്താരാഷ്ട്ര നിയമങ്ങളുടെ ലംഘനം അരാജകത്വത്തിലേക്കും ദുരിതത്തിലേക്കും നാശത്തിലേക്കും നയിക്കുമെന്നും അദ്ദേഹം മുന്നറിയിപ്പ് നൽകി. അന്താരാഷ്ട്ര നിയമങ്ങളിൽ നിന്ന് പിന്തിരിയേണ്ട സമയമല്ല ഇതെന്നും മറിച്ച് അത് കൂടുതൽ ശക്തമായി മുറുകെ പിടിക്കേണ്ട സമയമാണെന്നും അദ്ദേഹം ഓർമ്മിപ്പിച്ചു.
