കാൻസസ്: അമേരിക്കയിലെ കാൻസാസിലുള്ള വിചിറ്റയിലെ മക്കോണൽ വ്യോമതാവളത്തിന് സമീപം കണ്ടെത്തിയ വിചിത്ര രൂപത്തിലുള്ള സൈനിക വിമാനം സമൂഹമാധ്യമങ്ങളിൽ ചർച്ചയാകുന്നു. കഴിഞ്ഞ ചൊവ്വാഴ്ച വ്യോമതാവളത്തിന് സമീപത്തുനിന്ന് ചിത്രീകരിച്ച വീഡിയോയിലാണ് വലിയ ചാരനിറത്തിലുള്ള, സ്റ്റെൽത്ത് ബോംബറുകളോട് സാമ്യമുള്ള വിമാനം ദൃശ്യമായത്.

വിമാനം യുഎസ് വ്യോമസേനയുടെ അത്യാധുനിക സ്റ്റെൽത്ത് ബോംബറായ ബി-21 റെയ്ഡർ ആയിരിക്കാമെന്നാണ് പ്രധാനമായും ഉയരുന്ന സംശയം. എന്നാൽ വിമാനം ഏതാണെന്ന കാര്യത്തിൽ യുഎസ് അധികൃതർ ഇതുവരെ ഔദ്യോഗിക സ്ഥിരീകരണം നൽകിയിട്ടില്ല.

പരീക്ഷണപ്പറക്കലിന്റെയോ പരിശീലനത്തിന്റെയോ ഭാഗമായി വിമാനം മക്കോണൽ വ്യോമതാവളത്തിന് സമീപം എത്തിയതാകാമെന്നാണ് വിലയിരുത്തൽ. വിമാനത്തിന്റെ ദൃശ്യങ്ങൾ പുറത്തുവന്നതോടെ സമൂഹമാധ്യമങ്ങളിലും പ്രതിരോധ മേഖലകളുമായി ബന്ധപ്പെട്ട ഫോറങ്ങളിലും വിവിധ അഭ്യൂഹങ്ങൾ പ്രചരിക്കുന്നുണ്ട്.

ബി-21 റെയ്ഡറിന് പുറമെ യുഎസ് സർക്കാർ ഔദ്യോഗികമായി സ്ഥിരീകരിച്ചിട്ടില്ലാത്ത ആർക്യു-170 സെന്റിനെൽ, ആർക്യു-180 തുടങ്ങിയ രഹസ്യ ഡ്രോണുകളിലൊന്നാകാമെന്നും ചിലർ അഭിപ്രായപ്പെടുന്നു. അതേസമയം, മക്കോണൽ വ്യോമതാവളത്തിൽ ഇന്ധനം നിറയ്ക്കാനെത്തിയ പഴയ തലമുറ സ്റ്റെൽത്ത് ബോംബറായ ബി-2 സ്പിരിറ്റ് ആകാനുള്ള സാധ്യതയും ചിലർ ചൂണ്ടിക്കാട്ടുന്നു.

എന്താണ് ബി-21 റെയ്ഡർ?

നോർത്രോപ്പ് ഗ്രുമ്മൻ വികസിപ്പിക്കുന്ന ദീർഘദൂര സ്റ്റെൽത്ത് ബോംബറാണ് ബി-21 റെയ്ഡർ. ആണവായുധങ്ങൾ വഹിക്കാനും ശേഷിയുള്ള ഈ വിമാനം അമേരിക്കയുടെ അടുത്ത തലമുറ ബോംബർ പദ്ധതിയിലെ പ്രധാന ഘടകമാണ്.

ഒരു ബി-21 റെയ്ഡറിന്റെ നിർമാണച്ചെലവ് ഏകദേശം 69.2 കോടി ഡോളർ വരുമെന്നാണ് കണക്കാക്കുന്നത്. ബി-2 സ്പിരിറ്റിന് ശേഷം അമേരിക്ക വികസിപ്പിക്കുന്ന ആദ്യത്തെ പുതിയ ദീർഘദൂര ബോംബർ കൂടിയാണിത്.

2022-ലാണ് ബി-21 റെയ്ഡർ ആദ്യമായി പൊതുജനങ്ങൾക്കു മുന്നിൽ അവതരിപ്പിച്ചത്. രണ്ടാം ലോകമഹായുദ്ധകാലത്ത് 1942-ൽ ജപ്പാനിൽ നടത്തിയ ആക്രമണത്തിലൂടെ ശ്രദ്ധ നേടിയ യുഎസ് സൈനിക സംഘമായ ‘ഡൂലിറ്റിൽ റെയ്ഡേഴ്സ്’ എന്ന പേരിൽനിന്നാണ് ബോംബറിന് റെയ്ഡർ എന്ന പേര് ലഭിച്ചത്.

ബി-21 റെയ്ഡറുകൾ അധികം വൈകാതെ യുഎസ് വ്യോമസേനയുടെ പ്രവർത്തന നിരയിലെത്തുമെന്നാണ് പ്രതീക്ഷ. കുറഞ്ഞത് 100 വിമാനങ്ങളെങ്കിലും സ്വന്തമാക്കുകയാണ് യുഎസ് വ്യോമസേനയുടെ ലക്ഷ്യം. എന്നാൽ വിചിറ്റയ്ക്ക് സമീപം കണ്ടെത്തിയ വിമാനം ബി-21 തന്നെയാണോ എന്ന കാര്യത്തിൽ ഔദ്യോഗിക സ്ഥിരീകരണം ലഭിച്ചിട്ടില്ല.