തിരുവനന്തപുരം: കേന്ദ്രം കേരളത്തെ അവഗണിക്കുന്നു എന്ന സംസ്ഥാന സർക്കാരിന്റെ ആരോപണങ്ങളെ കണക്കുകൾ നിരത്തി പ്രതിരോധിച്ച് ബി.ജെ.പി നേതാവ് രാജീവ് ചന്ദ്രശേഖർ. സി.പി.എം പിന്തുണയോടെ യു.പി.എ രാജ്യം ഭരിച്ചപ്പോൾ കേരളത്തിന് ലഭിച്ചത് വെറും 72,000 കോടി രൂപ മാത്രമായിരുന്നുവെന്നും, എന്നാൽ നരേന്ദ്ര മോദി സർക്കാർ പത്തു വർഷത്തിനിടെ 3.2 ലക്ഷം കോടി രൂപ നൽകിയെന്നും അദ്ദേഹം ചൂണ്ടിക്കാട്ടി. ചോദിക്കുമ്പോഴൊക്കെ പണം നൽകാൻ കേന്ദ്ര സർക്കാർ സഹകരണ ബാങ്കല്ലെന്നും അദ്ദേഹം പരിഹസിച്ചു. വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം. കേന്ദ്രപദ്ധതി വിഹിതവും വായ്പാനുമതിയും തടയുന്നു എന്നാരോപിച്ച് മുഖ്യമന്ത്രി നടത്തുന്ന സമരത്തിനെതിരെ ശക്തമായ ഭാഷയിലാണ് അദ്ദേഹം പ്രതികരിച്ചത്.

​കടക്കെണിയിൽ കേരളം: പ്രധാന ആരോപണങ്ങൾ

​സംസ്ഥാനത്തിന്റെ സാമ്പത്തിക നിലയെക്കുറിച്ച് അദ്ദേഹം പങ്കുവെച്ച പ്രധാന കണക്കുകൾ .
​കടബാധ്യത: 10 വർഷം മുമ്പ് 1.4 ലക്ഷം കോടിയായിരുന്ന സംസ്ഥാന കടം ഇപ്പോൾ 5 ലക്ഷം കോടി രൂപയായി വർദ്ധിച്ചു.
​റവന്യൂ ചെലവ്: സംസ്ഥാനത്തിന്റെ ആകെ ചെലവിൽ 92 ശതമാനവും വായ്പാ പലിശയ്ക്കും റവന്യൂ ചെലവുകൾക്കുമാണ് ഉപയോഗിക്കുന്നത്.
​വികസന മുരടിപ്പ്: വികസനത്തിനായുള്ള മൂലധനച്ചെലവ് വെറും 8 ശതമാനം മാത്രമായി ചുരുങ്ങി. കടമെടുത്ത് വികസനം നടത്തുമെന്ന് പറയുന്നത് വരുംതലമുറയെ കടക്കെണിയിലാക്കുമെന്ന് അദ്ദേഹം കുറ്റപ്പെടുത്തി.

​മുഖ്യമന്ത്രിയെ സംവാദത്തിന് വെല്ലുവിളിക്കുന്നു

​പണം കിട്ടാത്തതിന് സമരം ചെയ്യുകയല്ല, മറിച്ച് കൃത്യമായ കണക്കുകൾ നൽകി കാര്യക്ഷമമായി ഭരിക്കുകയാണ് വേണ്ടതെന്ന് രാജീവ് ചന്ദ്രശേഖർ പറഞ്ഞു. വസ്തുതകൾ ജനങ്ങളെ ബോധ്യപ്പെടുത്താൻ മുഖ്യമന്ത്രി പിണറായി വിജയനെ അദ്ദേഹം പരസ്യ സംവാദത്തിന് വെല്ലുവിളിച്ചു.
​"നുണകളുടെ കൊട്ടാരം ബി.ജെ.പി വസ്തുതകൾ കൊണ്ട് പൊളിക്കും. പത്ത് വർഷം കൊണ്ട് സംസ്ഥാനത്തെ നശിപ്പിക്കുകയാണ് സർക്കാർ ചെയ്തത്."

​രാജ്യത്തെ ഏറ്റവും ഉയർന്ന തൊഴിലില്ലായ്മ നിരക്കും (30%), ഉയർന്ന വിലക്കയറ്റവുമാണ് സംസ്ഥാന സർക്കാരിന്റെ നേട്ടമെന്ന് അദ്ദേഹം പരിഹസിച്ചു. 52 ലക്ഷം പേർക്ക് കുടിവെള്ളമില്ലെന്നും 5.5 ലക്ഷം പേർക്ക് വീടില്ലെന്നും അദ്ദേഹം കൂട്ടിച്ചേർത്തു. സ്വന്തം കഴിവുകേട് മറച്ചുവെക്കാനാണ് നുണകൾ പ്രചരിപ്പിക്കുന്നതെന്നും 2015-ൽ മുൻ മുഖ്യമന്ത്രി ഉമ്മൻചാണ്ടിയോട് പിണറായി വിജയൻ പറഞ്ഞ 'രാജിവെച്ചു പോകണം' എന്ന വാക്കുകൾ ഇപ്പോൾ അദ്ദേഹം തന്നെ പാലിക്കണമെന്നും രാജീവ് ചന്ദ്രശേഖർ പറഞ്ഞു.