കൊച്ചി: കേരളത്തിലെ റോഡുകളുടെ ശോചനീയാവസ്ഥയിലും അശാസ്ത്രീയമായ നിർമ്മാണത്തിലും ഹൈക്കോടതിക്ക് കടുത്ത അതൃപ്തി. സംസ്ഥാനത്തെ മിക്ക റോഡുകളും കുഴികൾ നിറഞ്ഞ് അപകടക്കെണിയായി മാറിയിട്ടും ഉത്തരവാദിത്തപ്പെട്ട ഉദ്യോഗസ്ഥർ ശ്രദ്ധ പുലർത്താത്തതിൽ ജസ്റ്റിസ് ദേവൻ രാമചന്ദ്രൻ രൂക്ഷ വിമർശനമുയർത്തി. റോഡുകൾ നന്നാക്കാത്ത എഞ്ചിനിയർമാർ നേരിട്ട് ഹാജരായി വിശദീകരണം നൽകേണ്ടിവരുമെന്നും കോടതി മുന്നറിയിപ്പ് നൽകി. ജനങ്ങളുടെ ജീവന് വിലകൽപ്പിക്കാത്ത സമീപനത്തിനെതിരെ ഹൈക്കോടതി നടത്തിയ ശക്തമായ പരാമർശങ്ങൾ, പൊതുമരാമത്ത് വകുപ്പിന്റെ കെടുകാര്യസ്ഥതയുടെ നേർക്കാഴ്ചയാവുകയാണ്.
"എൻജിനിയർമാർക്ക് എന്തിനാണ് ശമ്പളം?"
തൃശൂരിൽ റോഡിലെ കുഴികൾ കാരണം രണ്ടുപേർക്ക് ജീവൻ നഷ്ടപ്പെട്ട സാഹചര്യത്തിലാണ് ഹൈക്കോടതിയുടെ ഈ രൂക്ഷവിമർശനം. "സംസ്ഥാനത്തെ മിക്ക റോഡുകളും കുഴികൾ നിറഞ്ഞ് അപകടാവസ്ഥയിലാണ്. ഇത് പരിശോധിച്ച് പരിഹാരമുണ്ടാക്കേണ്ട എൻജിനിയർമാരെ വഴിയിൽ കാണുന്നില്ല. എന്തിനാണ് ഇവർക്ക് ശമ്പളം കൊടുക്കുന്നത്?" എന്ന് കോടതി വാക്കാൽ ചോദിച്ചു. കുഴിയുണ്ടാകാനുള്ള സാധ്യത മുൻകൂട്ടി കാണുന്നതാണ് ഒരു എൻജിനിയറുടെ കഴിവെന്നും അല്ലാതെ കുഴി എങ്ങനെയെങ്കിലും മൂടുന്നതല്ലെന്നും ജസ്റ്റിസ് ദേവൻ രാമചന്ദ്രൻ ഓർമ്മിപ്പിച്ചു.
കണ്ണുതുറക്കാത്ത അധികൃതർ
"റോഡിൽ ഒഴുകുന്ന ചോരയും അനാഥരാകുന്ന കുടുംബങ്ങളുടെ കണ്ണീരുമാണ് കോടതിയെ സംസാരിപ്പിക്കുന്നത്. ഇവരുടെ വിഷമങ്ങളിൽ കണ്ണുതുറക്കാനും ഹൃദയത്തിൽ ഏറ്റുവാങ്ങാനും അധികൃതർക്ക് കഴിയാത്തതെന്ത്?" ഹൈക്കോടതിയുടെ ഈ ചോദ്യം പൊതുസമൂഹത്തിന്റെ ആശങ്കകൾക്ക് അടിവരയിടുന്നതായിരുന്നു. ഇരുചക്രവാഹന യാത്ര അതീവ അപകടാവസ്ഥയിലാണെന്നും കോടതി നിരീക്ഷിച്ചു. ഹെൽമെറ്റ് വെക്കണമെന്ന് നിയമം കൊണ്ടുവന്ന സർക്കാരിന്, റോഡിലെ കുഴികൾ ഉണ്ടാക്കുന്ന മരണങ്ങൾക്കും പരിക്കുകൾക്കും എന്ത് ഉത്തരമാണുള്ളതെന്നും കോടതി ചോദിച്ചു.
നടപടിയില്ലാത്ത മറുപടികൾ
തൃശൂരിലെ രണ്ടാമത്തെ അപകടം കുഴികാരണമല്ലെന്നും ഓവർടേക്കിംഗിനിടെ തെന്നിയതാണെന്നും സർക്കാർ വിശദീകരിച്ചെങ്കിലും, ആദ്യ സംഭവത്തിൽ പോലും തുടർനടപടി ഉണ്ടായില്ലെന്ന് കോടതി ചൂണ്ടിക്കാട്ടി. ഇത് സംബന്ധിച്ച് ചൊവ്വാഴ്ച വിശദീകരണം നൽകണമെന്നും കോടതി നിർദ്ദേശിച്ചു. റോഡുകൾ നന്നാക്കാൻ യാതൊരു നടപടിയുമില്ലെന്നും, മരണങ്ങൾ വർദ്ധിക്കാനാണോ അധികൃതർ കാത്തിരിക്കുന്നതെന്നും കോടതി ചോദ്യമുന്നയിച്ചു. റോഡുകളുടെ ശോചനീയാവസ്ഥ സംബന്ധിച്ച ഹർജികൾ ചൊവ്വാഴ്ച വീണ്ടും പരിഗണിക്കും.
