ദോഹ:അഴിമതിക്കെതിരായ ഐക്യരാഷ്ട്ര സംഘടനയുടെ 11-ാമത് സമ്മേളനം ദോഹ പ്രഖ്യാപനം 2025 അംഗീകരിച്ച് സമാപിച്ചു. ഭാവിയിലെ അഖണ്ഡത ഉറപ്പാക്കാൻ സാങ്കേതികവിദ്യകളുടെ, പ്രത്യേകിച്ച് കൃത്രിമ ബുദ്ധിയുടെ (AI) ഉത്തരവാദിത്വപരമായ ഉപയോഗവും അന്താരാഷ്ട്ര സഹകരണവും അനിവാര്യമാണെന്ന് പ്രഖ്യാപനം വ്യക്തമാക്കി.
അഴിമതിയും രാജ്യാന്തര സാമ്പത്തിക കുറ്റകൃത്യങ്ങളും കൂടുതൽ സങ്കീർണ്ണമാകുന്ന സാഹചര്യത്തിൽ, നിയമപ്രവർത്തന ഏജൻസികൾ സാങ്കേതിക മുന്നേറ്റങ്ങൾ പ്രയോജനപ്പെടുത്തണമെന്ന് സമ്മേളനം ആഹ്വാനം ചെയ്തു. രാഷ്ട്രീയ പാർട്ടികളുടെയും തെരഞ്ഞെടുപ്പ് പ്രചാരണങ്ങളുടെയും ധനസഹായത്തിലെ സുതാര്യത, കുട്ടികളിലും യുവജനങ്ങളിലും അഴിമതിവിരുദ്ധ മൂല്യങ്ങൾ വിദ്യാഭ്യാസത്തിലൂടെ വളർത്തൽ തുടങ്ങിയവ ഉൾപ്പെടെ 11 പ്രമേയങ്ങൾ സമ്മേളനം അംഗീകരിച്ചു.
192 രാജ്യങ്ങളിൽ നിന്നായി 2,500-ലധികം പ്രതിനിധികൾ പങ്കെടുത്ത സമ്മേളനം, അഴിമതിവിരുദ്ധ ആഗോള സഹകരണത്തിൽ ഖത്തറിന്റെ പ്രാധാന്യം വീണ്ടും ഉറപ്പിച്ചു.
