​തിരുവനന്തപുരം: ബോർഡ്, കോർപ്പറേഷൻ പുനഃസംഘടന വേഗത്തിലാക്കാൻ എല്ലാ ഘടകകക്ഷികളുടെയും പ്രതിനിധികളെ ഉൾപ്പെടുത്തി യു.ഡി.എഫ് സബ് കമ്മിറ്റി രൂപീകരിക്കാൻ സാദ്ധ്യത. ഈ മാസം 30 ന് ചേരുന്ന യു.ഡി.എഫ് യോഗം ഇക്കാര്യത്തിൽ തീരുമാനമെടുക്കും. ബോർഡുകൾ, കോർപ്പറേഷനുകൾ, പൊതുമേഖലാ സ്ഥാപനങ്ങൾ, സഹകരണ സ്ഥാപനങ്ങൾ എന്നിവ ഉൾപ്പെടുന്ന ഇരുന്നൂറോളം സ്ഥാപനങ്ങളിലാണ് പുനഃസംഘടന നടത്തേണ്ടത്.
​മുൻകാലങ്ങളിലെ രീതിയിൽ തന്നെ പങ്കുവയ്ക്കൽ നടക്കണമെന്നില്ലെന്ന് യു.ഡി.എഫ് കൺവീനർ അടൂർ പ്രകാശ് കഴിഞ്ഞദിവസം വ്യക്തമാക്കിയിരുന്നു. ഇതിനോടകം തന്നെ ചില ഘടകകക്ഷികൾ തങ്ങളുടെ ആവശ്യങ്ങൾ കൺവീനറെ അറിയിച്ചിട്ടുണ്ട്.
​പ്രധാന പദവികൾക്കായി വടംവലി
​ഭരണപരിഷ്കാര കമ്മിഷൻ: ഈ പദവിക്കായി മുസ്ലിം ലീഗും കേരള കോൺഗ്രസും രംഗത്തുണ്ട്. ലീഗ് ഡോ. എം.കെ. മുനീറിനായും കേരള കോൺഗ്രസ് പി.ജെ. ജോസഫിനായുമാണ് അവകാശവാദമുന്നയിക്കുന്നത്. ഇതിന് പകരമായി 'വയോജന കമ്മിഷൻ' എന്നൊരു നിർദ്ദേശവും ലീഗ് മുന്നോട്ടുവെച്ചിട്ടുണ്ട്.
​ഡൽഹി പ്രതിനിധി: സർക്കാരിന്റെ ഡൽഹിയിലെ പ്രത്യേക പ്രതിനിധി പദവിയിലാണ് ഫോർവേഡ് ബ്ളോക്കിന്റെ കണ്ണ്.
​നോർക്ക വൈസ് ചെയർമാൻ: മന്ത്രി പദവി ലഭിക്കാതെ പോയ മാണി സി. കാപ്പന് നോർക്ക വൈസ് ചെയർമാൻ പദവി നൽകണമെന്ന ആവശ്യവുമുണ്ട്.
​ഇതിനുപുറമെ, പി.എം ശ്രീ പദ്ധതി നടത്തിപ്പ്, മദ്യനയം തുടങ്ങിയ വിഷയങ്ങളും വരാനിരിക്കുന്ന യോഗത്തിൽ ചർച്ച ചെയ്യും.
​ഘടകകക്ഷികൾക്ക് അതൃപ്തി
സർക്കാരിന്റെ പല സുപ്രധാന തീരുമാനങ്ങളും യു.ഡി.എഫിൽ വേണ്ടത്ര ചർച്ച ചെയ്യുന്നില്ലെന്ന അതൃപ്തി ചില ഘടകകക്ഷികൾക്കുണ്ട് 'യു.ഡി.എഫിന് പകരമാവില്ല ക്യാബിനറ്റ്' എന്നതാണ് ഇവരുടെ നിലപാട്.
​അടുത്തിടെയാണ് ആസൂത്രണ ബോർഡ് പുനഃസംഘടിപ്പിച്ചത്. മുൻ കേന്ദ്ര ക്യാബിനറ്റ് സെക്രട്ടറി കെ.എം. ചന്ദ്രശേഖർ ഉപാദ്ധ്യക്ഷനായ ബോർഡിൽ മന്ത്രിമാരായ പി.കെ. കുഞ്ഞാലിക്കുട്ടി, സണ്ണി ജോസഫ്, മോൻസ് ജോസഫ്, ഷിബു ബേബി ജോൺ, സി.പി. ജോൺ എന്നിവരാണ് അംഗങ്ങൾ. മുന്നണി അധികാരത്തിലെത്തിയ ശേഷമുള്ള രണ്ടാമത്തെ യു.ഡി.എഫ് യോഗമാണ് ഈ മാസം 30-ന് നടക്കുന്നത്.