കാസർകോട്: അബൂബക്കർ സിദ്ദീഖ് കൊലപാതകക്കേസിലെ പ്രതി അഹമ്മദ് റയീസിനൊപ്പം യുഡിഎഫ് നേതാക്കൾ നിൽക്കുന്ന ചിത്രങ്ങൾ പുറത്ത്. ഗൾഫിൽ നടന്ന ജ്വല്ലറി ഉദ്ഘാടന ചടങ്ങിനിടെയാണ് നേതാക്കൾക്കൊപ്പം കേസിലെ പ്രതിയും ചിത്രങ്ങളിൽ പ്രത്യക്ഷപ്പെട്ടത്. സന്ദീപ് വാര്യർ എംഎൽഎ, എ.കെ.എം. അഷ്റഫ് എംഎൽഎ, എൻ.എ. നെല്ലിക്കുന്ന് എന്നിവർക്കൊപ്പമുള്ള ചിത്രങ്ങളാണ് പുറത്തുവന്നത്.
കുമ്പള മുഗു സ്വദേശിയായ അബൂബക്കർ സിദ്ദീഖിനെ തട്ടിക്കൊണ്ടുപോയി ക്രൂരമായി കൊലപ്പെടുത്തിയ കേസിലെ പ്രതിയാണ് അഹമ്മദ് റയീസ്. ഇയാൾക്കൊപ്പമുള്ള യുഡിഎഫ് നേതാക്കളുടെ ചിത്രങ്ങൾ പുറത്തുവന്നതോടെ സംഭവം രാഷ്ട്രീയ ചർച്ചകൾക്കും വഴിവെച്ചിട്ടുണ്ട്.
അതേസമയം, ചിത്രത്തിലുള്ള വ്യക്തിയെ അറിയില്ലെന്നാണ് സന്ദീപ് വാര്യരുടെ വിശദീകരണം. കെഎംസിസിയുടെ പരിപാടിയിൽ പങ്കെടുക്കാനാണ് താൻ വിദേശത്തേക്ക് പോയതെന്ന് അദ്ദേഹം പറഞ്ഞു. പരിപാടി പൂർത്തിയായശേഷം മഞ്ചേശ്വരം എംഎൽഎയാണ് ജ്വല്ലറി ഉദ്ഘാടന ചടങ്ങിലേക്ക് കൊണ്ടുപോയത്. അവിടെ നിരവധി പേർ ഫോട്ടോ എടുത്തിരുന്നു. അക്കൂട്ടത്തിൽ ഒരാളായിരിക്കാം ചിത്രത്തിലുള്ളത്. അഹമ്മദ് റയീസിനെ തനിക്ക് പരിചയമില്ലെന്നും സന്ദീപ് വാര്യർ വ്യക്തമാക്കി.
