​തിരുവനന്തപുരം: യു.ഡി.എഫ് കൺവീനർ സ്ഥാനത്തുനിന്ന് തന്നെയും പുകച്ചുചാടിക്കാൻ ബോധപൂർവ്വമായ നീക്കങ്ങൾ നടക്കുന്നുണ്ടെന്ന ഗുരുതര ആരോപണവുമായി അടൂർ പ്രകാശ് എം.പി. സ്വകാര്യ ചാനലിന് നൽകിയ അഭിമുഖത്തിലാണ് അദ്ദേഹം നിലപാട് വ്യക്തമാക്കിയത്. കെ. സുധാകരന് കെ.പി.സി.സി അധ്യക്ഷ പദവിയിൽ നേരിടേണ്ടി വന്നതുപോലെയുള്ള ഒറ്റപ്പെടുത്തലുകളും ഗ്രൂപ്പ് കളികളും തനിക്കെതിരെയും അരങ്ങേറുന്നുണ്ടെന്ന് അദ്ദേഹം സംശയം പ്രകടിപ്പിച്ചു.
​തന്റെ രാഷ്ട്രീയ നിലപാടുകളിൽ ഉറച്ചുനിൽക്കുന്നതാകയാൽ, ഇത്തരം നീക്കങ്ങൾക്ക് മുന്നിൽ കാഴ്ചക്കാരനായി നോക്കിനിൽക്കാൻ ഉദ്ദേശിക്കുന്നില്ലെന്ന് അദ്ദേഹം മുന്നറിയിപ്പ് നൽകി. തനിക്കെതിരെ സമൂഹമാധ്യമങ്ങൾ വഴി ചില കേന്ദ്രങ്ങൾ ബോധപൂർവ്വം അപവാദ പ്രചാരണങ്ങളും വ്യാജ വാർത്തകളും അഴിച്ചുവിടുന്നുണ്ടെന്നും അടൂർ പ്രകാശ് തുറന്നടിച്ചു. കെ. സുധാകരനെതിരെ പാർട്ടിക്കുള്ളിൽ പ്രവർത്തിച്ച അതേ ശക്തികൾ തന്നെയും ലക്ഷ്യമിടുന്നുണ്ട്. ഒറ്റപ്പെടുത്താനുള്ള ഇത്തരം നീക്കങ്ങൾ തിരിച്ചറിയുന്നുണ്ട്.
​നിശബ്ദനായിരിക്കില്ല: തന്റെ നിലപാടുകളിൽ ഉറച്ചുനിൽക്കും. എതിർനീക്കങ്ങൾ കണ്ട് വെറുതെ കാഴ്ചക്കാരനായി നോക്കിനിൽക്കാൻ ഒരുക്കമല്ല.
​സോഷ്യൽ മീഡിയയിൽ തന്നെ വ്യക്തിപരമായി തകർക്കാൻ ചിലർ ബോധപൂർവ്വം സോഷ്യൽ മീഡിയ വഴി വ്യാജ പ്രചാരണങ്ങൾ നടത്തുന്നു.
​ സംസ്ഥാന ഘടകത്തിലെ ചില നീക്കങ്ങൾക്കിടയിലും എ.ഐ.സി.സി നേതൃത്വത്തിൽ പൂർണ്ണ വിശ്വാസമുണ്ട്. ഹൈക്കമാൻഡിന്റെ നിർദ്ദേശപ്രകാരം മാത്രമായിരിക്കും തന്റെ മുന്നോട്ടുള്ള പ്രവർത്തനം.
​യു.ഡി.എഫിലെ ആഭ്യന്തര വിഷയങ്ങളും കൺവീനർ പദവിയെച്ചൊല്ലിയുള്ള തർക്കങ്ങളും പരസ്യമായ ചർച്ചയാകുന്ന ഈ സാഹചര്യത്തിൽ, അടൂർ പ്രകാശിന്റെ ഈ വെളിപ്പെടുത്തലുകൾ കോൺഗ്രസിനുള്ളിൽ പുതിയ രാഷ്ട്രീയ ചർച്ചകൾക്ക് തിരികൊളുത്തിയിരിക്കുകയാണ്.