ദോഹ: ഖത്തറിലെ വിവിധ മേഖലകളെ ലക്ഷ്യമിട്ട് തൊടുത്തുവിട്ട രണ്ട് ബാലസ്റ്റിക് മിസൈലുകൾ ഖത്തർ സായുധ സേന വിജയകരമായി തടയുകയും തകർക്കുകയും ചെയ്തു. രാജ്യത്തിന്റെ പ്രതിരോധ സംവിധാനങ്ങളുടെ ഉയർന്ന സജ്ജീകരണവും നിരന്തരമായ ജാഗ്രതയും വിവിധ സുരക്ഷാ ഏജൻസികളുടെ ഏകോപനവുമാണ് ആക്രമണം പരാജയപ്പെടുത്താൻ സഹായിച്ചതെന്ന് പ്രതിരോധ മന്ത്രാലയം (Ministry of Defense) അറിയിച്ചു.
മിസൈലുകൾ കണ്ടെത്തിയ ഉടൻ തന്നെ മുൻകൂട്ടി നിശ്ചയിച്ചിട്ടുള്ള പ്രവർത്തന പദ്ധതികൾ പ്രകാരം നടപടി സ്വീകരിക്കുകയായിരുന്നു. ഖത്തറിന്റെ അതിർത്തിക്കുള്ളിൽ എത്തുന്നതിന് മുമ്പ് തന്നെ മിസൈലുകൾ ആകാശത്തുവെച്ച് നശിപ്പിച്ചു.രാജ്യത്തിന്റെ പരമാധികാരവും പ്രാദേശിക അഖണ്ഡതയും സംരക്ഷിക്കാനും ഏത് തരത്തിലുള്ള ബാഹ്യ ഭീഷണികളെയും നേരിടാനും ഖത്തർ സായുധ സേനയ്ക്ക് പൂർണ്ണമായ ശേഷിയുണ്ടെന്ന് മന്ത്രാലയം പ്രസ്താവനയിൽ വ്യക്തമാക്കി. സുരക്ഷാ വെല്ലുവിളികൾക്കെതിരെ ശക്തമായി തിരിച്ചടിക്കാനുള്ള സജ്ജീകരണങ്ങൾ സേനയ്ക്കുണ്ടെന്നും മന്ത്രാലയം ഉറപ്പുനൽകി.
സിവിലിയൻമാരും സന്ദർശകരും പരിഭ്രാന്തരാകേണ്ടതില്ലെന്നും ആത്മവിശ്വാസത്തോടെയിരിക്കണമെന്നും അധികൃതർ അറിയിച്ചു. സുരക്ഷാ ഏജൻസികൾ നൽകുന്ന നിർദ്ദേശങ്ങൾ കൃത്യമായി പാലിക്കണം. സാമൂഹിക മാധ്യമങ്ങളിലൂടെയോ മറ്റോ അഭ്യൂഹങ്ങൾ പ്രചരിപ്പിക്കരുത്. ഔദ്യോഗിക സ്രോതസ്സുകളിൽ നിന്നുള്ള വിവരങ്ങൾ മാത്രം വിശ്വസിക്കണമെന്നും മന്ത്രാലയം അഭ്യർത്ഥിച്ചു.
