തിരുവനന്തപുരം: തിരുവിതാംകൂർ ദേവസ്വം ബോർഡിന്റെ ദൈനംദിന ഭരണകാര്യങ്ങളിലും നയപരമായ തീരുമാനങ്ങളിലും ബോർഡ് പ്രസിഡന്റിന്റെ അധികാരം ഉറപ്പിക്കുന്ന നിർണ്ണായക ഉത്തരവിറങ്ങി. ഇനിമുതൽ ബോർഡ് യോഗത്തിൽ പരിഗണിക്കേണ്ടുന്ന ഓരോ അജണ്ടയും, ഫയലുകളും, വിഷയങ്ങളും ബോർഡ് പ്രസിഡന്റിന്റെ മുൻകൂർ അനുമതി വാങ്ങിയ ശേഷം മാത്രമേ വയ്ക്കാൻ സാധിക്കൂ എന്ന് ഉത്തരവിൽ വ്യക്തമാക്കുന്നു.
ബോർഡ് പ്രസിഡന്റാണ് ഇത് സംബന്ധിച്ച ഉത്തരവിറക്കിയത്. ഭരണപരമായ കാര്യങ്ങളിൽ കൂടുതൽ വ്യക്തതയും സുതാര്യതയും കൊണ്ടുവരുന്നതിനും, തീരുമാനങ്ങൾ ഏകീകൃത സ്വഭാവത്തോടെ മുന്നോട്ട് പോകുന്നതിനും വേണ്ടിയാണ് ഈ മാറ്റമെന്നാണ് വിലയിരുത്തൽ. പ്രസിഡന്റിന്റെ മുൻകൂർ അനുമതിയില്ലാതെ അജണ്ടകളോ ഫയലുകളോ ബോർഡ് യോഗത്തിൽ ചർച്ചയ്‌ക്കെടുക്കില്ല.
ദേവസ്വം ബോർഡിന്റെ നടപടിക്രമങ്ങളിൽ സുപ്രധാനമായ ഈ മാറ്റം, ഇനിമുതൽ ബോർഡ് യോഗങ്ങളിൽ അജണ്ടകൾ അവതരിപ്പിക്കുന്ന രീതിയെയും, തീരുമാനങ്ങൾ എടുക്കുന്ന പ്രക്രിയയെയും സ്വാധീനിക്കും.
