ദോഹ:രാജ്യത്തുടനീളമുള്ള ഗതാഗത സേവനങ്ങൾ എളുപ്പത്തിലും വേഗത്തിലും ലഭ്യമാക്കുന്ന ‘ദർബ്’ (Darb) മൊബൈൽ ആപ്പ് കൂടുതൽ ആളുകൾ ഉപയോഗിക്കണമെന്ന് ഗതാഗത മന്ത്രാലയം തിങ്കളാഴ്ച വീണ്ടും ആഹ്വാനം ചെയ്തു.
എക്‌സ് (X) സോഷ്യൽ മീഡിയപ്ലാറ്റ്‌ഫോമിലൂടെയായിരുന്നു ആപ്പിന്റെ സവിശേഷതകൾ മന്ത്രാലയം പൊതുജനങ്ങളുമായി പങ്കുവെച്ചത്. ലഭ്യമായ സേവനങ്ങളെക്കുറിച്ചുള്ള ബോധവൽക്കരണം വർധിപ്പിക്കുക എന്ന ലക്ഷ്യത്തോടെയാണ് ഈ നീക്കം.കടൽ ഗതാഗതവും കര ഗതാഗതവും ഉൾപ്പെടെ വിവിധ മേഖലകളിലായി ഗതാഗത മന്ത്രാലയം നൽകുന്ന സേവനങ്ങളിലേക്ക് ‘ദർബ്’ ആപ്പ് വഴിയൊരുക്കുന്നു. മന്ത്രാലയത്തിന്റെ പുതിയ വാർത്തകൾ, അറിയിപ്പുകൾ, പരിപാടികൾ എന്നിവ പിന്തുടരാനും നയങ്ങൾ, ചട്ടങ്ങൾ, നടപ്പിലായിക്കൊണ്ടിരിക്കുന്ന പദ്ധതികൾ എന്നിവയെക്കുറിച്ചുള്ള വിവരങ്ങൾ അറിയാനും ഈ പ്ലാറ്റ്‌ഫോം ഉപയോക്താക്കളെ സഹായിക്കുന്നു.
നാഷണൽ ഓതന്റിക്കേഷൻ സിസ്റ്റം (NAS) അക്കൗണ്ട് ഉപയോഗിച്ച് സുരക്ഷിതമായി ലോഗിൻ ചെയ്യാനും, സേവനങ്ങൾ വിഭാഗങ്ങളായി തിരഞ്ഞെടുത്ത് അപേക്ഷകൾ ഓൺലൈനായി സമർപ്പിക്കാനും അവയുടെ പുരോഗതി നിരീക്ഷിക്കാനും ആപ്പിൽ സൗകര്യമുണ്ട്.
കടൽ ഗതാഗത ഉപയോക്താക്കൾക്കായി ചെറുകപ്പലുകളുമായി ബന്ധപ്പെട്ട രജിസ്ട്രേഷൻ, നിയന്ത്രണം എന്നിവ ഉൾപ്പെടെയുള്ള സേവനങ്ങളും, കര ഗതാഗത മേഖലയിലായി റോഡുകളും ഗതാഗത സംവിധാനങ്ങളും സംബന്ധിച്ച വിവിധ സേവനങ്ങളും ‘ദർബ്’ ആപ്പിലൂടെ ലഭ്യമാണെന്ന് മന്ത്രാലയം അറിയിച്ചു.
