തിരുവനന്തപുരം: സംസ്ഥാനത്ത് അസിസ്റ്റന്റ് പബ്ലിക് പ്രോസിക്യൂട്ടർമാരുടെ വിപുലമായ സ്ഥലംമാറ്റവും പുതിയ നിയമനവും നടത്തി ആഭ്യന്തര വകുപ്പ് ഉത്തരവ് പുറപ്പെടുവിച്ചു. ഭരണസൗകര്യം കണക്കിലെടുത്ത് ഉടൻ പ്രാബല്യത്തിൽ വരുന്ന രീതിയിലാണ് ഉത്തരവ് തയ്യാറാക്കിയിരിക്കുന്നത്. 2026 ജൂൺ 18-ന് ഹോം വകുപ്പ് പുറത്തിറക്കിയ G.O.(Rt) No.2075/2026/ആഭ്യന്തര ഉത്തരവ് പ്രകാരം ആകെ 19 അസിസ്റ്റന്റ് പബ്ലിക് പ്രോസിക്യൂട്ടർമാർക്കാണ് വിവിധ കോടതികളിലേക്കായി മാറ്റം നൽകിയിരിക്കുന്നത്.
​തിരുവനന്തപുരം, കൊല്ലം, ആലപ്പുഴ, ഇടുക്കി, തൃശൂർ, മലപ്പുറം, കോഴിക്കോട്, വയനാട്, കണ്ണൂർ തുടങ്ങിയ ജില്ലകളിലെ കോടതികളിലേക്കാണ് പ്രധാനമായും നിയമനങ്ങൾ നടന്നിട്ടുള്ളത്. ഗവർണറുടെ ഉത്തരവുപ്രകാരം ആഭ്യന്തര  വകുപ്പ് ജോയിന്റ് സെക്രട്ടറി സജിത് കെ.ഐ. ആണ് ഈ ഉത്തരവ് പുറപ്പെടുവിച്ചത്.
​പ്രധാന സ്ഥലംമാറ്റങ്ങൾ താഴെ പറയുന്നവയാണ്:
​കരോലിൻ ജോയ് ഫ്ലെച്ചർ: തലശ്ശേരി അഡീഷണൽ ചീഫ് ജുഡീഷ്യൽ മജിസ്‌ട്രേറ്റ് കോടതിയിൽ നിന്ന് തിരുവനന്തപുരം ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതി-III ലേക്ക് മാറ്റി.
​മനു ആർ: തിരുവനന്തപുരം ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതി-IIIൽ നിന്ന് തലശ്ശേരി അഡീഷണൽ ചീഫ് ജുഡീഷ്യൽ മജിസ്‌ട്രേറ്റ് കോടതിയിലേക്ക് മാറ്റി നിയമിച്ചു.
​ഇന്ദുശേഖരൻ തമ്പി യു: കട്ടപ്പന ഗ്രാമന്യായാലയത്തിൽ നിന്ന് കാട്ടാക്കട ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതിയിലേക്ക് മാറ്റി.
​കെ. സുജകുമാരി: തിരുവനന്തപുരം ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതി-IIൽ നിന്ന് റാന്നി ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതിയിലേക്ക് മാറ്റി നിയമിച്ചു.
​ഇവർക്ക് പുറമെ നെടുമങ്ങാട്, കൊട്ടാരക്കര, പരവൂർ, നെയ്യാറ്റിൻകര, കൊച്ചി, കൊയിലാണ്ടി, ചേർത്തല, തിരൂർ, കൊടുങ്ങല്ലൂർ എന്നിവിടങ്ങളിലെ കോടതികളിലേക്കും സ്ഥലംമാറ്റം നൽകിയിട്ടുണ്ട്. അതേസമയം, കൊച്ചി ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതി-IIൽ നിന്ന് മാറ്റം ലഭിക്കുന്ന സുകന്യ എസ്. സംബന്ധിച്ച പ്രത്യേക നിയമന ഉത്തരവ് പിന്നീട് പുറപ്പെടുവിക്കുമെന്നും അഭ്യന്തര വകുപ്പ് അറിയിച്ചു.